മസ്​ജിദുൽ ഹറാമിൽ പ്രതിദിന ആഭ്യന്തര ഉംറ തീർഥാടകരുടെ എണ്ണം 60,000 ആക്കി

ജിദ്ദ: ആഭ്യന്തര ഉംറ തീർഥാടകരുടെ എണ്ണം പ്രതിദിനം 60,000 ആയി ഉയർത്തുമെന്ന്​ ഹജ്ജ്​ ഉംറ മന്ത്രാലയം വ്യക്തമാക്കി. നാളെ മുതൽ ഇതു​ നടപ്പിൽ വരും. ആരോഗ്യ മുൻകരുതൽ നടപടികൾക്ക്​ അനുസൃതമായാണ്​ തീർഥാടകരുടെ എണ്ണം വർധിപ്പിക്കുന്നതെന്ന്​ ഹജ്ജ്​ ഉംറ മന്ത്രാലയം പറഞ്ഞു.

കോവിഡിനെ തുടർന്ന്​ നിർത്തിവെച്ച ഉംറ തീർഥാടനം പുനരാരംഭിച്ചത്​ ആരോഗ്യ മന്ത്രാലയം, ഹജ്ജ്​ മന്ത്രാലയം തുടങ്ങി ബന്ധപ്പെട്ട വകുപ്പുകളുടെ കർശനമായ നിർദേശങ്ങൾക്ക്​ അനുസൃതമായാണ്​.

കോവിഡ്​ സാഹചര്യത്തിൽ ഉംറക്ക് നേരത്തെ​ നിശ്ചയിച്ച നടപടിക്രമങ്ങൾ തുടരും. ഉംറക്കും മസ്​ജിദുൽ ഹറാമിലെ നമസ്​കാരത്തിനും അനുമതി പത്രം ലഭിക്കുന്നതിനുള്ള അംഗീകൃത പ്ലാറ്റ്​ഫോമുകൾ 'തവക്കൽന' യും 'ഇഅ്​തമർന' യുമാണ്​.

വ്യാജ പ്ലാറ്റ്​ഫോമുകളിലും സൈറ്റുകളിലും പെട്ടുപോകുന്നത്​ കരുതിയിരിക്കണം. ഉംറക്ക്​ തിരിക്കുന്നതിനു മുമ്പ്​ ആപ്ലിക്കേഷനിൽ രജിസ്​റ്റർ ചെയ്​ത തീയതിയും സമയവും ഉറപ്പുവരുത്തണമെന്നും ഹജ്ജ്​ ഉംറ മന്ത്രാലയം വ്യക്തമാക്കി.

അതേ സമയം, ഉംറ തീർഥാടകരുടെ എണ്ണം പ്രതിദിനം 60,000 ആയി വർധിപ്പിക്കു​ന്നതോടെ കൂടുതൽ പേർക്ക് മസ്ജിദുൽ ഹറാമിലെത്തി​ ഉംറ നിർവഹിക്കാൻ അവസരം ലഭിക്കും. കോവിഡിനെ തുടർന്ന്​ നിർത്തിവെച്ച ഉംറ തീർഥാടനം പുനരാരംഭിച്ച സമയത്ത്​ പ്രതിദിനം 6,000 ​പേർക്ക് മാത്രമാണ്​ അനുമതി നൽകിയിരുന്നത്​.

പിന്നീട്​ ക്രമാനുഗതമായി തീർഥാടകരുടെ എണ്ണം വർധിപ്പിക്കുകയായിരുന്നു. കഴിഞ്ഞ റമദാനിൽ ഉംറക്കും നമസ്കാരത്തിനും കൂടുതൽ പേർക്ക്​ അനുമതി നൽകിയിരുന്നു. ഹജ്ജ്​ കഴിഞ്ഞ്​ ദുൽഹജ്ജ്​ 15 ന് ഉംറ തീർഥാടനം പുനരാരംഭിച്ചപ്പോൾ പ്രതിദിനം 20,000 പേർക്ക്​ എന്ന തോതിലായിരുന്നു ഹറമിലേക്ക്​ പ്രവേശനം നൽകിയിരുന്നത്​.

അനുമതി പത്രം നേടിയിരിക്കുക, 18 വയസ്സ്​ പൂർത്തിയായിരിക്കുക എന്നതായിരുന്നു മസ്​ജിദുൽ ഹറാമിലേക്ക്​ പ്രവേശനത്തിനു നേരെത്തെയുള്ള നിബന്ധന. ഹജ്ജിനു ശേഷം ഉംറക്കെത്തുന്നവർ വാക്സിനെടുത്തിരിക്കണമെന്നും കൂടി നിബന്ധനയായി നിശ്ചയിട്ടുണ്ട്​.