പഴയ കൊട്ടാരങ്ങൾ ആഡംബര ഹോട്ടലുകളാകുന്നു

ജിദ്ദ: ചരിത്രപരവും സാംസ്കാരികവുമായി അറിയപ്പെട്ട കൊട്ടാരങ്ങൾ വികസിപ്പിച്ച്​ ആഡംബര ഹോട്ടലുകളാക്കി മാറ്റുന്നു. ഇതിനായി 'ബോട്ടിക് ഗ്രൂപ്'എന്ന സംരംഭം കിരീടാവകാശിയും പൊതുനിക്ഷേപ നിധി​ ചെയർമാനുമായ അമീർ മുഹമ്മദ്​ ബിൻ സൽമാൻ പ്രഖ്യാപിച്ചു​. കൊട്ടാരങ്ങളെ പുനരുദ്ധരിച്ച് ലക്ഷ്വറി ബോട്ടിക് ഹോട്ടലുകളാക്കി മാറ്റുന്നതാണ്​ പദ്ധതിയെന്ന്​ കിരീടാവകാശി വ്യക്തമാക്കി. രാജ്യത്തി​ന്‍റെ സംസ്കാരത്തോടൊപ്പം ദേശീയ പൈതൃകത്തെ പുനരുജ്ജീവിപ്പിക്കാനും അസാധാരണവും അതുല്യവുമായ ആതിഥേയ അനുഭവം ഒരുക്കാനുമാണിത്​​. സ്വകാര്യ നിക്ഷേപകരുമായി സഹകരിച്ചാണ്​ നടപ്പാക്കുക.

ആദ്യഘട്ടത്തിൽ മൂന്ന് ചരിത്രസ്ഥലങ്ങൾ വികസിപ്പിക്കും. ജിദ്ദയിലെ അൽഹംറ പാലസ്​, റിയാദിലെ തുവൈഖ്​ പാലസ്​, റെഡ്​ പാലസ്​​ എന്നിയാണ്​ നവീകരിക്കുന്നത്​​. 33 ലക്ഷ്വറി സ്യൂട്ടുകളും 44 ആഡംബര വില്ലകളും ഉൾപ്പെടെ 77 മുറികൾ ഉൾപ്പെടുന്നതായിരിക്കും ജിദ്ദയിലെ അൽഹംറ പാലസ്​. 40 ലക്ഷ്വറി സ്യൂട്ടുകളും 56 ആഡംബര വില്ലകളും ഉൾപ്പെടെ 96 മുറികൾ ഉൾപ്പെടുന്നതായിരിക്കും റിയാദിലെ തുവൈഖ് പാലസ്​. 46 ലക്ഷ്വറി സ്യൂട്ടുകളും 25 ആഡംബര അതിഥി മുറികളും ഉൾപ്പെടെ 71 മുറികൾ അടങ്ങുന്നതായിരിക്കും റിയാദിലെ റെഡ്​ പാലസ്​.

അത്യാഡംബര ആതിഥേയ മേഖലയെ സമ്പുഷ്ടമാക്കി പ്രാദേശിക സമ്പദ്‌ വ്യവസ്ഥയുടെ വികസനത്തിനും സംഭാവന നൽകുന്ന ആധുനിക ജീവിതശൈലിയും 'ബോട്ടിക്​ ഗ്രൂപ്'സമന്വയിപ്പിക്കും. മികച്ച അന്താരാഷ്ട്ര റസ്റ്റാറൻറുകൾക്കായി കമ്പനി നിരവധി ഓപ്ഷൻ നൽകും. പുതിയ വിനോദ കേന്ദ്രങ്ങളിൽ വിശ്രമത്തിനുള്ള അന്തരീക്ഷം പ്രദാനം ചെയ്യും. കൂടാതെ ഒരോ അതിഥിക്കും പ്രത്യേക സേവനങ്ങളും നൽകുമെന്നും കിരീടാവകാശി പറഞ്ഞു. കിരീടാവകാശിയുടെ '​ബോട്ടിക്​ ഗ്രൂപ്പി'‍​ന്‍റെ പ്രഖ്യാപനം രാജ്യത്തെ പൊതുനിക്ഷേപ നിധിയുടെ പങ്കി​ന്‍റെ സ്ഥിരീകരണമാണെന്ന്​ നിധി ഗവർണർ യാസിർ അൽറുമയാൻ പറഞ്ഞു.

സൗദി സമ്പദ്‌ വ്യവസ്ഥയെ വൈവിധ്യവത്കരിക്കാനുള്ള ഫണ്ടി​​ന്‍റെ ലക്ഷ്യങ്ങൾ കൈവരിക്കുന്നതിന് ഇത്​ സംഭാവന ചെയ്യും​. സൗദി വിപണിയിലെ ടൂറിസം സാധ്യത വൈവിധ്യവത്കരിക്കുന്നതിനും സഹായിക്കും. വിഷൻ 2030 ​ന്‍റെ ലക്ഷ്യങ്ങൾക്ക്​ അനുസൃതമായി പ്രമുഖ വിനോദസഞ്ചാര സാംസ്​കാരിക കേ​ന്ദ്രമെന്ന നിലയിൽ പ്രാദേശികമായും അന്തർദേശീയമായും രാജ്യത്തി​​ന്‍റെ സ്ഥാനം വർധിപ്പിക്കുമെന്നും സൗദി നിക്ഷേപനിധി​ ഗവർണർ പറഞ്ഞു.