അബഹയിൽ കുന്നിൻ മുകളിലെ വിമാനം ഇനിയവിടെ ഉണ്ടാവില്ല

ജിദ്ദ: സൗദി അറേബ്യയുടെ തെക്ക്​ പടിഞ്ഞാറൻ മേഖലയായ​ അബ​ഹയിൽ കുന്നിൻ മുകളിൽ സ്ഥാപിച്ചിരിക്കുന്ന പഴയ വിമാനം നീക്കം ചെയ്യുന്നു. 'സമാ അബ​ഹ' ഗാർഡനോട്​ ചേർന്ന്​ കുന്നിനു മുകളിൽ സ്ഥാപിച്ചിട്ടുള്ള വിമാനത്തി​െൻറ ബോഡി നീക്കം ചെയ്യുമെന്ന്​ അസീർ മേഖല മുനിസിപ്പാലിറ്റിയാണ്​ അറിയിച്ചത്​.

വിമാനത്തി​െൻറ ബോഡി കാലഹരണപ്പെട്ടതും കേടുപാടുകളുള്ളതും ഉപയോഗ ശൂന്യമായതുമാണെന്നും അതിരിക്കുന്ന പ്രദേശം ഒഴിപ്പിച്ച്​ അവിടം കൂടി അസീർ മേഖല വികസനത്തിന്​ വേണ്ടി സജ്ജമാക്കുന്നതിനാണ്​​ വിമാനം നീക്കം ചെയ്യുന്നതെന്നും​ മുനിസിപ്പാലിറ്റി അധികൃതർ പ്രസ്​താവനയിൽ വ്യക്തമാക്കി. സ്വകാര്യ നിക്ഷേപകർ വിമാനം ഏതെങ്കിലും സംരംഭത്തിനായി ഉപയോഗപ്പെടുത്തുന്നതിൽ നിന്ന്​ പിൻവലിഞ്ഞതിനാൽ വിമാനം നിൽക്കുന്ന സ്ഥലം ഉപ​യോഗശൂന്യമായി കിടക്കുകയാണ്​.

പ്രദേശത്തെ പ്രകൃതിയുടെ സ്വഭാവിക സവിശേഷതകൾ പൂർണമായും സംരക്ഷിക്കാനും നിക്ഷേപകർക്ക്​ അനുയോജ്യമായ രീതിയിൽ ആ മേഖല വികസിപ്പിക്കാനുമാണ്​ ഉദ്ദേശിക്കുന്നതെന്നും അധികൃതർ പറഞ്ഞു. മദീന വിമാനത്താവളത്തിൽ നിന്ന്​ 2014ലാണ്​ പഴയ ജംബോ 747 വിമാനം ഇവിടെ എത്തിച്ചത്​. അന്നത്​ കരമാർഗം ട്രക്കിൽ വിവിധ പട്ടണങ്ങളിലൂടെ സഞ്ചരിച്ചാണ്​​ ടൂറിസ്​റ്റ്​ മേഖലയായ അബ​ഹയിലെത്തിയത്​. വിമാനത്തിനകം റസ്​റ്റോറൻറിനായി ഉപയോഗപ്പെടുത്താൻ നിക്ഷേപകർക്ക്​ നൽകാനായിരുന്നു മുനിസിപ്പാലിറ്റി പദ്ധതിയിട്ടിരുന്നത്​. ചില കാരണങ്ങളാൽ പദ്ധതി വിജയിക്കാതെ പോകുകയായിരുന്നു.

അബഹയിലെ സമാ ഗാർഡനടുത്ത്​ കുന്നിന്​ മുകളിൽ സ്ഥാപിച്ച പഴയ വിമാനം