ഫലസ്തീൻ: പരിഹാരം തേടി അറബ്​, ഇസ്​ലാമിക മന്ത്രിതല സംഘം ചൈനയിലെത്തി

ജിദ്ദ: ഗസ്സക്കെതിരെ അധിനിവേശകരായ ഇസ്രായേൽ നടത്തുന്ന അക്രമണം അവസാനിപ്പിക്കാനും മേഖലയിൽ സമാധാനം സ്ഥാപിക്കാനും അറബ്, ഇസ്‌ലാമിക രാജ്യങ്ങളുടെ മന്ത്രിമാരടങ്ങുന്ന സംഘം ചൈനയിലെത്തി. റിയാദിൽ നടന്ന അറബ്​-ഇസ്​ലാമിക്​ ഉച്ചകോടി നിയോഗിച്ച സമിതിയാണ്​ സമാധാന പുനഃസ്ഥാപനത്തിന്​ പിന്തുണയും പരിഹാരമാർഗങ്ങളും തേടി ലോക പര്യടനം ആരംഭിച്ചത്​. തുടക്കം ചൈനയിൽനിന്നാണ്​.

സൗദി വിദേശകാര്യ മന്ത്രി അമീർ ഫൈസൽ ബിൻ ഫർഹാ​െൻറ നേതൃത്വത്തിൽ തിങ്കളാഴ്​ച രാവിലെയാണ്​ സംഘം​ ചൈനയിലെത്തിയത്​. ജോർദാൻ, ഈജിപ്ത്, ഫലസ്തീൻ വിദേശകാര്യ മന്ത്രിമാർ, ഒ.​െഎ.സി സെക്രട്ടറി ജനറൽ എന്നിവരാണ്​ സംഘത്തിലുള്ളത്​​. ഖത്തർ, തുർക്കി, ഇന്തോനേഷ്യ, നൈജീരിയ എന്നിവയുടെ വിദേശകാര്യ മന്ത്രിമാരും അറബ് ലീഗ് സെക്രട്ടറി ജനറലും സംഘത്തിൽ ചേരും. ഗസ്സയിൽ വെടിനിർത്തൽ കരാർ നടപ്പാക്കുന്നതിനുള്ള അന്താരാഷ്​ട്ര സമ്മർദങ്ങൾക്കായി സുരക്ഷ കൗൺസിലിലെ സ്ഥിരാംഗ രാജ്യങ്ങളിലു​ൾപ്പെടെ വരുംദിവസങ്ങളിൽ സംഘം സന്ദർശിക്കും.

ഗസ്സയിൽ അടിയന്തര വെടിനിർത്തൽ പ്രഖ്യാപിക്കണമെന്നും അവിടേക്കുള്ള ദുരിതാശ്വാസ സഹായം വർധിപ്പിക്കണമെന്നും മന്ത്രി അമീർ ഫൈസൽ ബിൻ ഫർഹാൻ ആവശ്യപ്പെട്ടു. ഇസ്രായേലി​െൻറ ചെയ്​തികൾ തടയാൻ അന്താരാഷ്​ട്ര സമൂഹം ഇടപെടണമെന്നും സ്വന്തം ഉത്തരവാദിത്തം നിറവേറ്റണമെന്നും അദ്ദേഹം ആവശ്യപ്പെട്ടു. ഞങ്ങൾക്ക് ഇനിയും കൂടുതൽ ശ്രമങ്ങൾ ആവശ്യമാണ്. ഗസ്സ പ്രതിസന്ധി അവസാനിപ്പിക്കാൻ ചൈനയുമായും മറ്റ്​ രാജ്യങ്ങളുമായും സംസാരിക്കാനും സഹകരിച്ച്​ പ്രവർത്തിക്കാനും ഞങ്ങൾ ആഗ്രഹിക്കുന്നു. സാഹചര്യത്തി​െൻറ ഗൗരവത്തെ ഞങ്ങൾ ശരിക്കും മനസ്സിലാക്കുകയും ഗസ്സ പ്രതിസന്ധി അവസാനിപ്പിക്കാൻ പ്രവർത്തിക്കുകയും ചെയ്യുന്നുവെന്നും വിദേശകാര്യ മന്ത്രി പറഞ്ഞു.

ഫലസ്തീനികളെ ഗസ്സയിൽനിന്ന് മാറ്റിപ്പാർപ്പിക്കുന്ന കാര്യത്തിൽ തങ്ങളുടെയും മൊത്തം അറബ് ലോകത്തി​െൻറയും നിലപാട് വ്യത്യസ്​തമാണെന്ന്​ ഈജിപ്​ത്​ വിദേശകാര്യ മന്ത്രി സാമിഹ്​ ശുക്​രി പറഞ്ഞു. സ്വന്തം ദേശത്ത്​ നിന്ന്​ അവരെ കുടിയിറക്കുന്നതിനെ ഞങ്ങൾ അംഗീകരിക്കുന്നില്ല. അവരെ കുടിയിറക്കിയാൽ അത്​ മേഖലയിലും ലോകത്താകെയും സമാധാനവും സുരക്ഷവും സ്ഥിരതയും അപകടത്തിലാകുമെന്നും അദ്ദേഹം മുന്നറിയിപ്പ്​ നൽകി.

ഗസ്സയിലേക്കുള്ള സഹായം തടയുക എന്ന ഇസ്രായേലി​െൻറ നയം ആസൂത്രിതമാണ്​. ബോംബാക്രമണത്തി​െൻറയും ഉപരോധത്തി​െൻറയും കടുത്ത നടപടികളിലൂടെ ഫലസ്തീനികളെ ഗസ്സ വിട്ടുപോകാൻ പ്രേരിപ്പിക്കുക എന്നതാണ്​ അവരുടെ ഗൂഢലക്ഷ്യം. അന്താരാഷ്​ട്ര നിയമസാധുത സംരക്ഷിക്കാൻ സുരക്ഷാ കൗൺസിലിന് ഉത്തരവാദിത്തമുണ്ട്​. ഫലസ്തീനികൾക്കെതിരായ ആക്രമണങ്ങൾ തടയാൻ ചൈനയെപ്പോലുള്ള വൻശക്തികളുടെ ശക്തമായ പങ്ക് ഞങ്ങൾ പ്രതീക്ഷിക്കുന്നുവെന്നും മന്ത്രി കൂട്ടിച്ചേർത്തു.

ഫലസ്തീൻ ജനതയ്‌ക്കെതിരെ ഇസ്രായേലികൾ നടത്തിയ ക്രൂരമായ കുറ്റകൃത്യങ്ങളെക്കുറിച്ച് ചർച്ച ചെയ്യാനാണ് ഞങ്ങൾ ബീജിങ്ങിലെത്തിയതെന്ന്​ ഫലസ്തീൻ വിദേശകാര്യ മന്ത്രി റിയാദ് അൽ മാലികി പറഞ്ഞു. ഫലസ്തീനികളെ ഇല്ലാതാക്കാനും അവരുടെ അവകാശങ്ങൾ ഹനിക്കാനുമാണ് ഇസ്രായേൽ ശ്രമിക്കുന്നത്​. ഇത് ദ്വിരാഷ്​ട്രമെന്ന പരിഹാരത്തെ ഇല്ലായ്​മ ചെയ്യുന്നതാണെന്നും മന്ത്രി കൂട്ടിച്ചേർത്തു.

ഇസ്രായേലി​െൻറ കുറ്റകൃത്യങ്ങൾ തടയുന്നതിന് പ്രതിരോധ നടപടികൾ കൈക്കൊള്ളുക, ഗസ്സ, ജറുസലേം, വെസ്​റ്റ്​ ബാങ്ക് എന്നിവിടങ്ങളിൽ അവർ നടത്തിയ കുറ്റകൃത്യങ്ങളുടെ ഉത്തരവാദിത്തം അവരെ കൊണ്ട്​ ഏറ്റെടുപ്പിക്കുക, അടിയന്തര ദുരിതാശ്വാസമെത്തിക്കാൻ സുരക്ഷിത ഇടനാഴികൾ തുറക്കുക, ഫലസ്​തീനിൽ ഉടനടി വെടിനിർത്തുക, രാഷ്​ട്രീയ പരിഹാര പ്രക്രിയ ആരംഭിക്കുക എന്നിവയാണ്​ മന്ത്രിതല സമിതിയുടെ പര്യടന ലക്ഷ്യം.