അഫ്ഗാനിസ്ഥാനിൽ ബാഹ്യ ഇടപെടലില്ലാത്ത രാഷ്​ട്രീയ പരിഹാരത്തിലെത്തണം -ഒ.ഐ.സിയിലെ സൗദി പ്രതിനിധി

ജിദ്ദ: ബാഹ്യ ഇടപെടലില്ലാതെ അഫ്​ഗാനിസ്ഥാനിലെ പ്രതിസന്ധിക്ക്​ രാഷ്​ട്രീയ പരിഹാരമുണ്ടാകണമെന്ന്​ ഒ.ഐ.സിയിലെ സൗദി സ്ഥിരം പ്രതിധിനി ഡോ. സ്വാലിഹ്​ സുഹൈബാനി പറഞ്ഞു. ജിദ്ദയിൽ നടന്ന ഒ.ഐ.സി സമ്മേളനത്തിൽ സംസാരിക്കുകയായിരുന്നു അദ്ദേഹം. പതിറ്റാണ്ടുകൾ മുമ്പ്​ അഫ്ഗാനിസ്ഥാനിലെ പ്രതിസന്ധികളുടെ തുടക്കം മുതൽ അഫ്​ഗാൻ ജനതക്കൊപ്പം നിലകൊണ്ടിട്ടുണ്ട്​. മാന്യമായ ഇടപെടൽ ഇപ്പോഴും തുടരുന്നു.

മൂന്ന്​ വർഷം മുമ്പ്​ അഫ്​ഗാനിസ്ഥാനിൽ ഒ.ഐ.സി സമാധാന സമ്മേളനം സംഘടിപ്പിച്ചു. മുസ്​ലിം വേൾഡ്​ ലീഗും അവിടെ സമാധാനം സ്ഥാപിക്കാൻ ധാരാളം ശ്രമങ്ങൾ നടത്തി. ആ നിലപാടിലുറച്ചു അഫ്​ഗാനിസ്ഥാനിൽ സമാധാനവും സ്ഥിരതയും ഉണ്ടാകുന്നതിനും അഫ്​ഗാൻ ജനതയെ ഒന്നിപ്പിക്കുന്നതിനും സൗദി അറേബ്യയുടെ പിന്തുണ ഉറച്ചതും ചരിത്രപരവുമാണെന്ന്​ ആവർത്തിക്കുന്നുവെന്ന്​​ സൗദി പ്രതിനിധി പറഞ്ഞു.

അഫ്​ഗാനിസ്ഥാനിൽ സുരക്ഷയും സ്ഥിരതയും നിലനിർത്താനും ജനങ്ങളുടെ ജീവനും സ്വത്തും സംരക്ഷിക്കാനും താലിബാനും അഫ്​ഗാൻ പാർട്ടികളും പ്രവർത്തിക്കുമെന്ന് പ്രതീക്ഷിക്കുന്നു. ഒ.ഐ.സി അംഗരാജ്യങ്ങളുമായി സഹകരിച്ച് അഫ്​ഗാൻ ജനതയോടും ബാഹ്യ ഇടപെടലില്ലാതെ അവർ സ്വയം തീരുമാനിക്കുന്ന തെരഞ്ഞെടുപ്പുകളുമായും സഹകരിക്കുമെന്നും സൗദി പ്രതിനിധി പറഞ്ഞു.

അഫ്​ഗാനിസ്ഥാനിലെ അടിയന്തിര മാനുഷിക പ്രവർത്തനങ്ങൾക്ക് പിന്തുണ നൽകാനും വികസനം, സ്ഥിരത, പുനരധിവാസം എന്നിവക്കായുള്ള ശ്രമങ്ങളെ പിന്തുണക്കാനും ജനങ്ങളെ സുരക്ഷയും അഭിവൃദ്ധിയും കൈവരിക്കാൻ സഹായിക്കാനും രാജ്യാന്തര സമൂഹത്തോട്​ അദ്ദേഹം ആവ​ശ്യപ്പെട്ടു. ഐക്യത്തോടെ നിലകൊള്ളുക, സമാധാനം, അനുരഞ്ജനം, സുസ്ഥിരത എന്നിവക്ക്​ ഞങ്ങൾ ഒരുമിച്ചു നിൽക്കുമെന്ന​ ആത്മാർത്ഥമായ സന്ദേശം ഈ യോഗം നൽകുമെന്ന്​ പ്രതീക്ഷിക്കുന്നു.

വിദേശ ഇടപെടലുകളിൽ നിന്ന്​ മാറി അഫ്ഗാനിസ്ഥാനിലെ പ്രതിസന്ധിക്ക്​ സമഗ്രമായ ഒരു രാഷ്​ട്രീയ ഒത്തുതീർപ്പിലെത്താനുള്ള ശ്രമങ്ങൾ ത്വരിതപ്പെടുത്തണമെന്ന്​ ആവശ്യപ്പെടുന്നു. അഫ്​ഗാനിസ്ഥാന്റെ പരമാധികാരത്തെ ബഹുമാനിക്കുകയും അവിടുത്തെ ജനതയെ അതിന്റെ നിർമാണത്തിൽ പങ്കാളിയാക്കുകയും വേണം. സമാധാനം, സുസ്ഥിരത, സമൃദ്ധി എന്നിവ പുനസ്ഥാപിക്കാൻ അഫ്​ഗാൻ ജനതക്കൊപ്പം നിൽക്കേണ്ടതിന്റെ പ്രധാന്യം സൗദി പ്രതിനിധി ഊന്നിപ്പറഞ്ഞു.

അഫ്​ഗാനിസ്ഥാനിലെ സ്ഥിതിഗതികളും സംഭവവികാസങ്ങളും സൂഷ്​മമായി നിരീക്ഷിക്കുന്നത് തുടരാൻ ഒ.ഐ.സി എക്സിക്യൂട്ടീവ് കമ്മിറ്റിയോടും ജനറൽ സെക്രട്ടറിയേറ്റിനോടും അദ്ദേഹം ആവശ്യപ്പെട്ടു.