പി.വി. അൻവറി​ന്റെ ആരോപണം; നിഷ്പക്ഷ അന്വേഷണം വേണം -പ്രവാസി വെൽഫെയർ

അൽ ഖോബാർ: പി.വി. അൻവർ ഉന്നയിച്ച ആരോപണം നിഷ്പക്ഷമായ അന്വേഷണം നടത്തി യാഥാർഥ്യം പുറത്തുകൊണ്ട് വരണമെന്ന് പ്രവാസി വെൽഫെയർ അൽ ഖോബാർ കണ്ണൂർ-കാസർകോട്​ മേഖലാ എക്സിക്യൂട്ടീവ് കമ്മിറ്റി ആവശ്യപ്പെട്ടു.

വെൽഫെയർ പാർട്ടിയടക്കമുള്ള പാർട്ടികൾ തുടർച്ചയായി ചൂണ്ടിക്കാണിച്ച് കൊണ്ടിരുന്ന പിണറായി ഗവൺമെന്റിന്റെ ഫാഷിസ്റ്റ് ദാസ്യവേല ഇപ്പോൾ ഭരണപക്ഷ എം.എൽ.എ തന്നെ പരസ്യമായി തെളിവ് സഹിതം വെളിപ്പെടുത്തിയപ്പോൾ, അദ്ദേഹത്തെ വർഗശത്രുവായി പ്രഖ്യാപിച്ച് ആക്രമിക്കാനാണ് ഗവൺമെൻറും മാർക്‌സിസ്​റ്റ്​ പാർട്ടിയും ശ്രമിക്കുന്നത്.

എ.ഡി.ജി.പിയെ മാറ്റിനിർത്തി നിഷ്പക്ഷമായ അന്വേഷണം നടത്തി യാഥാർഥ്യം പുറത്തുകൊണ്ട് വരണമെന്നും തക്കതായ നിയമനടപടികൾ കൈക്കൊള്ളണമെന്നും പിണറായി മുഖ്യമന്ത്രി സ്ഥാനം രാജിവെക്കണമെന്നും യോഗം അംഗീകരിച്ച പ്രമേയത്തിൽ ശക്തമായി ആവശ്യപ്പെട്ടു.

പ്രസിഡൻറ്​ ഖലിലുറഹ്​മാൻ അന്നട്ക അധ്യക്ഷത വഹിച്ചു. സംഘടനയുടെ 10ാം വാർഷികത്തോടനുബന്ധിച്ച് സൗജന്യ മെഡിക്കൽ ക്യാമ്പ് നടത്താനും തീരുമാനിച്ചു. സജീർ തലശ്ശേരി സ്വാഗതവും സി.ടി. റഹീം നന്ദിയും പറഞ്ഞു.