വാക്​സിനെടുക്കാതെ വരുന്നവരെ പാർപ്പിക്കാൻ ക്വാറൻറീൻ കേന്ദ്രങ്ങൾക്ക്​ ലൈസൻസ്​

ജിദ്ദ: രാജ്യത്തിന് പുറത്തു നിന്ന് വാക്‌സിനെടുക്കാതെ വരുന്ന കമ്പനി തൊഴിലാളിക​ളെ താമസിപ്പിക്കാൻ പ്രത്യേക സമ്പർക്കവിലക്ക്​ കേന്ദ്രങ്ങൾക്ക്​ ലൈസൻസ് അനുവദിക്കാൻ സൗദി അധികൃതർ.​

സ്​ഥാപനസമ്പക്കവിലക്ക്​ കേന്ദ്രങ്ങൾക്ക്​ ലൈസൻസ് നൽകാൻ മുനിസിപ്പൽ ഗ്രാമകാര്യ ഭവന മന്ത്രാലയമാണ്​ നടപടി തുടങ്ങിയത്​. കോവിഡിനെ ഇല്ലാതാക്കാൻ ബന്ധപ്പെ​ട്ട വകുപ്പുകളുമായി ഏ​കോപിപ്പിച്ചാണ്​ വിവിധ പ്രവേശന കവാടങ്ങൾ വഴി രാജ്യത്തേക്ക്​ വരുന്നവരെ സുരക്ഷിത രീതിയിൽ സ്വീകരിക്കുന്നതിനും താമസിപ്പിക്കുന്നതിനുമുള്ള സമ്പർക്കവിലക്ക്​ കേന്ദ്രങ്ങൾക്ക്​ ലൈസൻസ്​ നൽകുന്നത്​.

കേന്ദ്രങ്ങൾക്കുണ്ടായിരിക്കേണ്ട സൗകര്യങ്ങളും പാലിക്കേണ്ട നിബന്ധനകളും മന്ത്രാലയം വ്യക്തമാക്കി. സ്ഥലം, കെട്ടിടം, ഡിസൈൻ, കെട്ടിട നിലവാരം, ടോയ്‌ലറ്റുകൾ, ലൈറ്റിങ്​, വെൻറിലേഷൻ, സെൻട്രൽ അടുക്കള, ​ജീവനക്കാർ, തൊഴിലാളികൾ, സൗകര്യങ്ങളും സേവനങ്ങളും ഉൾപ്പെടെയുള്ള കാര്യങ്ങളെ അടിസ്ഥാനമാക്കിയാണ്​​ ലൈസൻസ്​ നൽകുക.

താമസക്കെട്ടിടങ്ങൾ വൃത്തിയുള്ളതാകണം, റിപ്പയറിങ് ജോലികൾ​ നടത്തണം, അണുവിമുക്തമാക്കുന്നതിന് കീട നിയന്ത്രണ കമ്പനിയുമായി കരാർ ഉണ്ടാക്കണം, കെട്ടിടങ്ങളും അവിടുത്തെ സൗകര്യങ്ങളും വൃത്തിയാക്കാനും അണുവിമുക്തമാക്കാനും ക്ലീനിങ്​ കമ്പനിയുമായി കരാർ ഉണ്ടാക്കണം, കാവലിനും നിരീക്ഷണത്തിനും കാമറകളും സെക്യൂരിറ്റി ജീവനക്കാരും ഉണ്ടായിരിക്കണം, ആവശ്യമായ ടോയ്​ലറ്റുകൾ ഉണ്ടായിരിക്കണം, ക്യു.ആർ. കോഡ് ഫോമിലൂടെ വരുന്ന ആളുകൾക്ക്​ ബുക്കിങ് നൽകാനുള്ള വെബ്‌സൈറ്റ്​ ഉണ്ടാകണം, പ്രവേശന കവാടങ്ങളിൽ നിന്ന്​ ആളുകളെ സ്വീകരിക്കാനും സ്ഥാപനസമ്പർക്കവിലക്ക്​ ആസ്ഥാനത്തേക്ക് കൊണ്ടുപോകാനും സൗകര്യമുണ്ടായിരിക്കണം, ഓരോ യാത്രക്കാരനും രണ്ടു കോവിഡ്​ പരിശോധനകൾ നടത്തുന്നതിന് അംഗീകൃത മെഡിക്കൽ ലബോറട്ടറികളുമായി കരാർ ഉണ്ടാക്കണം, കോവിഡിനെയും ക്വാറൻറീനെയും കുറിച്ച്​ ബോധവത്​കരണം നടത്തണം, വരുന്നവർ തവക്കൽന ആപ്പിൽ രജിസ്​റ്റർ ചെയ്തിട്ടുണ്ടെന്ന് ഉറപ്പാക്കണം എന്നിവയാണ്​ നിബന്ധനകൾ. റിയാദ്, ജിദ്ദ, ദമ്മാം, ദഹ്‌റാൻ എന്നിവിടങ്ങളിൽ ക്വാറൻറീൻ കേന്ദ്രങ്ങൾ തുടങ്ങാനുള്ള ലൈസൻസിനായി ഇതിനകം 25 അപേക്ഷകൾ ലഭിച്ചതായി അധികൃതർ അറിയിച്ചു. ഇത്രയും കെട്ടിടങ്ങളിലായി 3,276 പേരെ താമസിപ്പിക്കാൻ കഴിയും. 1,669 ആളുകളെ താമസിപ്പിക്കാൻ ശേഷിയുള്ള 10 കെട്ടിടങ്ങൾക്ക്​ ലൈസൻസ്​ നൽകി. അതിൽ ആളുകളെ താമസിപ്പിക്കാൻ തുടങ്ങിയിട്ടുണ്ട്​.

സ്​ഥാപന സമ്പർക്കവിലക്ക്​​ യോഗ്യതയുള്ള കെട്ടിടങ്ങളുടെ അപേക്ഷ ലഭിച്ചാൽ നിർദിഷ്​ട ആവശ്യകതകളും മാനദണ്ഡങ്ങളും പാലിച്ചിട്ടുണ്ടോയെന്ന്​ ഉറപ്പുവരുത്തിയാൽ ഉടൻ തന്നെ ലൈസൻസ്​ അനുവദിക്കും​​. അംഗീകൃത സമ്പർക്കവിലക്ക്​കേന്ദ്രങ്ങളുടെ വിവരങ്ങൾ മന്ത്രാലയത്തി​െൻറ ഇലക്ട്രോണിക് പ്ലാറ്റ്‌ഫോമിൽ പ്രസിദ്ധീകരിക്കും.

എല്ലാ കേന്ദ്രങ്ങളും മുൻകരുതലുകളും പ്രതിരോധ നടപടികളും പാലിക്കണമെന്നും ആതുരശ​ുശ്രൂഷക്ക്​ ആവശ്യമായ സൗകര്യങ്ങളൊരുക്കുന്നതിൽ അലംഭാവം കാണിക്കരുതെന്നും മുനിസിപ്പൽ-ഗ്രാമകാര്യ-ഭവന മന്ത്രാലയം എല്ലാവരോടും ആവശ്യപ്പെട്ടു. എല്ലാ നടപടിക്രമങ്ങളും പൊതുജനാരോഗ്യ അതോറിറ്റിയുടെ തുടർച്ചയായ വിലയിരുത്തലിന് വിധേയമായിരിക്കുമെന്നും മന്ത്രാലയം പറഞ്ഞു.