തബൂക്കിൽ മഴ, മക്ക മേഖലയിൽ കനത്ത ജാഗ്രത

ജിദ്ദ: മഴക്കുള്ള സാധ്യത കണക്കിലെടുത്ത് മക്ക മേഖലയിൽ കനത്ത ജാഗ്രത. സിവിൽ ഡിഫൻസ്​, സൗദി റെഡ് ക്രസൻറ്​ എന്നിവക്ക്​ കീഴിൽ മേഖലയുടെ വിവിധ ഭാഗങ്ങളിൽ എല്ലാ മുൻകരുതലും തയാറെടുപ്പുകളും പൂർത്തിയാക്കിയതായാണ്​ റിപ്പോർട്ട്​. തിങ്കളാഴ്​ച മുതൽ ബുധനാഴ്​ച വരെ രാജ്യത്തെ വിവിധ മേഖലകളിലും മക്ക, ജിദ്ദ, ത്വാഇഫ്​, ജമൂം, ഖുലൈസ്, മീസാൻ, അൽലെയ്ത്ത്, അദമ്, അർദിയാത്ത് എന്നിവിടങ്ങളിൽ മഴയുണ്ടാകുമെന്ന്​ ദേശീയ കാലാവസ്ഥ കേന്ദ്രം മുന്നറിയിപ്പ്​ നൽകിയതിനെ തുടർന്നാണിത്​​.

മുന്നറിയിപ്പ്​ വന്നതിനെ തുടർന്ന്​ കമാൻഡ് ആൻഡ് കൺട്രോൾ റൂം പൂർണ സജ്ജമായതായി മക്ക മേഖല റെഡ്​ക്രസൻറ്​​ മേധാവി ഡോ. മുസ്​തഫ ബിൻ ജമീൽ ബൽജൂൻ പറഞ്ഞു. 98 ആംബുലൻസ് കേന്ദ്രങ്ങൾ, 160 ആംബുലൻസ്​ വോളന്റിയർ ടീമുകൾ, രണ്ട് എയർ ആംബുലൻസ് വിമാനങ്ങൾ, മറ്റ്​ വാഹനങ്ങൾ തുടങ്ങിയവ ഒരുക്കിയിട്ടുണ്ട്​. ജിദ്ദയുടെ മധ്യഭാഗത്തും വടക്കുഭാഗത്തും ബഹ്‌റ പാലം, അൽ-ഇവാ പാലം എന്നിവിടങ്ങളിലുമായി നാല് അടിയന്തര സഹായ കേന്ദ്രങ്ങൾ സ്ഥാപിച്ചിട്ടുണ്ട്​.

പ്രദേശങ്ങളിലെ പൗരന്മാരോടും താമസക്കാരോടും ജാഗ്രത പുലർത്താനും നിർദേശങ്ങൾ പാലിക്കാനും റെഡ്​ക്രസൻറ്​ മേധാവി ആവശ്യപ്പെട്ടു. സിവിൽ ഡിഫൻസും ആളുകളോട്​ ജാഗ്രത പുലർത്താൻ നിർദേശിച്ചിട്ടുണ്ട്​. കാലാവസ്ഥ വ്യതിയാനം തുടരുന്നതിനാൽ ദൂരക്കാ​ഴ്​ച കുറയും. ഡ്രൈവിങ്​ നടത്തുന്നവർ ആവശ്യമായ മുൻകരുതലെടുക്കണമെന്നും റോഡ്​ സുരക്ഷ സേന ഉണർത്തി. അതേ സമയം, തബൂക്കിന്റെ വിവിധ ഭാഗങ്ങളിൽ ചൊവ്വാഴ്​ച രാവിലെ സമാന്യം നല്ല മഴയുണ്ടായി. ഹഖ്ൽ, ദുബ, ഉംലജ്, അൽവജ്ഹ്​ എന്നിവിടങ്ങളിലാണ്​ മഴയുണ്ടായത്​.

വാദി അൽഖശബിയയിലെ ഒഴുക്ക് കാരണം അൽഉല - മദീന റോഡ് വഴിതിരിച്ചുവിട്ടതായി റോഡ്​ സുരക്ഷ സേന അറിയിച്ചു. ഒഴുക്കും ഉയർന്ന ജലനിരപ്പും കാരണമാണ്​ അൽഉല - മദീന റോഡ് രണ്ട് ഭാഗത്തേക്കും താത്കാലികമായി 237 കിലോമീറ്റർ അടച്ചതെന്നും ബദൽ റോഡ് അൽഉല - ഖൈബർ റോഡ്​ ആയിരിക്കുമെന്ന്​ റോഡ്​ സുരക്ഷ സേന ട്വിറ്ററിൽ അറിയിച്ചു. മുൻകരുതലെന്നോണം തബൂക്ക്​ മേഖലയിലെ മറ്റ്​ ചില റോഡുകളും അടച്ചിരുന്നു​. മദീന, അറാർ, അൽജൗഫ്​ എന്നിവിടങ്ങളിൽ ചൊവ്വാഴ്​ച മഴയുണ്ടായതായി റിപ്പോർട്ടുണ്ട്​.