കാറ്റിലും മഴയിലും മദീനയിൽ രണ്ട്​ മരണം

മദീന: ബുധനാഴ്​ച രാത്രിയിലുണ്ടായ കാറ്റിലും മഴയിലും മദീനയിൽ രണ്ടു മരണം. വഴിയോരത്ത്​ സ്ഥാപിച്ച സർക്കാർ ഒാഫീസും അതിനോട്​ ചേർന്നുണ്ടായിരുന്ന പോർട്ടബിൾ താമസകേന്ദ്രങ്ങളും തകർന്നാണ്​​ രണ്ടുപേർ മരിച്ചത്​. ആറ്​ ഉദ്യോഗസ്​ഥർക്ക്​ പരിക്കേറ്റു.

തീർഥാടകർ ഉൾപ്പെടെയുള്ള യാത്രക്കാർക്ക്​ സേവനം നൽകുന്നതിന്​ മദീന നഗരത്തിൽ നിന്ന്​ ഒമ്പത്​ കിലോമീറ്ററകലെ മക്ക ^ മദീന എക്​സ്​പ്രസ്​ ഹൈവേയുടെ ഒാരത്ത്​ സജ്ജീകരിച്ചതാണ്​ താൽക്കാലിക ഒാഫീസും താമസകേന്ദ്രങ്ങളും. ശക്തമായ കാറ്റിൽ പോർട്ടബിൾ കാബിനുകൾ ആടിയുലയുകയും നിരങ്ങി നീങ്ങി ഒാഫീസ്​ കെട്ടിടത്തിൽ ഇടിക്കുകയും ചെയ്​താണ്​ അപകടമുണ്ടായത്​.