റമദാൻ: മക്കയിലും മദീനയിലും  സിവിൽ ഡിഫൻസ്​ ഒരുക്കം പൂർത്തിയായി

ജിദ്ദ: മക്കയിലും മദീനയിലും റമദാനിലെ അടിയന്തിര സേവനങ്ങൾക്കായുള്ള എല്ലാ ഒരുക്കങ്ങളും പൂർത്തിയായതായി സിവിൽ ഡിഫൻസ്​ അറിയിച്ചു. റമദാൻ പദ്ധതികൾ വിശദീകരിക്കാൻ വിളിച്ച വാർത്തസ​മ്മേളനത്തിലാണ്​ ഇക്കാര്യം വ്യക്​തമാക്കിയത്​. ബന്ധപ്പെട്ട വകുപ്പുകളുമായി സഹകരിച്ച്​ തീർഥാടകർക്കും സന്ദർശകർക്കും അപകടങ്ങളിൽ നിന്ന്​ സുരക്ഷ നൽകുന്നതിന്​ ആവശ്യമായ എല്ലാ നടപടികളും സ്വീകരിച്ചിട്ടുണ്ട്. റമദാനിൽ വർധിച്ച തിരക്കുണ്ടാകുമെന്നതിൽ വേണ്ട ഉദ്യോഗസ്​ഥരെ ഒരുക്കിയിട്ടുണ്ട്​. അപകട സാധ്യതകളുടെ വിവിധ വശങ്ങൾ സൂക്ഷ്​​മമായി പഠിച്ചാണ്​ റമദാൻ അടിയന്തിര പ്രവർത്തന പദ്ധതി ഒരുക്കിയിരിക്കുന്നതെന്ന്​ മക്ക മേഖല സിവിൽ ഡിഫൻസ്​ മേധാവി കേണൽ സാലിം അൽമത്​റഫി പറഞ്ഞു. ബോധവത്​കരണം, മക്കയുടെ വിവിധ ഭാഗങ്ങളിൽ തിരക്കിന്​ അനുസരിച്ച്​ അടിയന്തിര സേവനത്തിന്​ പ്രത്യേക സംഘങ്ങൾ, ഏകീകൃത സുരക്ഷ ഒാപറേഷൻ സ​​െൻററിൽ മുഴുസമയം പ്രതിനിധികൾ, ഹറമുകളിലേക്ക്​ ആവശ്യമായ സേവനങ്ങൾക്ക്​ പ്രത്യേക സംഘങ്ങൾ എന്നിവ റമദാൻ പദ്ധതികളിലുൾപ്പെടും.

സന്നദ്ധ സേവകരുടെ എണ്ണം 68ൽ നിന്ന്​ 150 ആക്കി​. സ്​ത്രീകളും സേവനത്തിന്​ രംഗത്തുണ്ടാകുമെന്ന്​ മക്ക സിവിൽ ഡിഫൻസ്​ മേധാവി പറഞ്ഞു. തീർഥാടകർ താമസിക്കുന്ന എല്ലാ സ്​ഥലങ്ങളിലും സുരക്ഷ നിബന്ധനകൾ പാലിച്ചിട്ടുണ്ടോയെന്ന്​ പരിശോധിച്ചു ഉറപ്പുവരുത്തുമെന്ന്​ മക്ക സിവിൽ ഡിഫൻസ്​ മേധാവി കേണൽ അബ്​ദുല്ല അൽഖുറശി പറഞ്ഞു. അപകട ഭീഷണിയുള്ള കെട്ടിടങ്ങളിൽ തീർഥാടകരെ താമസിപ്പിക്കാൻ അനുവദിക്കില്ല. അടിയന്തിര രക്ഷാപ്രവർത്തനത്തിന്​ ഹറമിന്​ അടുത്ത്​ അടിയന്തിര വിഭാഗവും മോ​േട്ടാർ സൈക്കിൾ യൂനിറ്റുകളുമുണ്ടാകും. ഹറമിനകത്തും പുറത്തുമായി 50 ഒാളം സ്​ഥലങ്ങൾ കേ​ന്ദ്രീകരിച്ച്​ സിവിൽ ഡിഫൻസ്​ സംഘങ്ങൾ സേവനത്തിനുണ്ടാകും. സാമൂഹിക മാധ്യമങ്ങളിലൂടെ ആളുകളെ ബോധവത്​കരിക്കും.

വിവിധ ഭാഷകളിലുള്ള ​ലഘുലേഖകൾ വിതരണം ചെയ്യുമെന്നും മക്ക സിവിൽ ഡിഫൻസ്​ മേധാവി പറഞ്ഞു.ഒാപറേഷൻ, സുരക്ഷ പ്ര​തിരോധം, ബോധവത്​കരണം എന്നിങ്ങനെ മൂന്നായി തിരിച്ചുള്ള പ്രവർത്തനങ്ങളാണ്​ മദീനയിലേതെന്ന്​ മദീന​ മേഖല സിവിൽ ഡിഫൻസ്​ മേധാവി ജനറൽ അബ്​ദുറഹ്​മാൻ അൽഹർബി പറഞ്ഞു. റമദാനിൽ അടിയന്തിര സേവന വിഭാഗങ്ങളുടെയും സിവിൽ ഡിഫൻസ്​ കേന്ദ്രങ്ങളുടെയും എണ്ണം കൂട്ടുമെന്നും മദീന സിവിൽ ഡിഫൻസ്​ മേധാവി പറഞ്ഞു.അതേ സമയം, ഹറമിനടുത്ത ഹോട്ടലുകളിലും താമസ കേന്ദ്രങ്ങളിലും സിവിൽ ഡിഫൻസിന്​ കീഴിൽ കെട്ടിട സുരക്ഷ പരിശോധന തുടങ്ങി. റമദാനിൽ മക്കയിലെത്തുന്ന തീർഥാടകരുടെ വർധവ്​ കണക്കിലെടുത്താണ്​ ഹോട്ടലുകൾ, ഫർണിഷ്​ഡ്​ അപാർട്ടുമ​​െൻറുകൾ, കച്ചവട കേ​ാംപ്ലക്​സുകൾ എന്നി കേന്ദ്രീകരിച്ച്​ പരിശോധന നടന്നുവരുന്നത്​. സിവിൽ ഡിഫൻസ്​ സർട്ടിഫിക്കറ്റ്​ , അടിയന്തിര കവാടങ്ങൾ, അഗ്​നിശമന സംവിധാനങ്ങൾ, മുന്നറിയിപ്പ്​ ഉപകരണങ്ങൾ എന്നിവ ഉദ്യോഗസ്​ഥർ പരിശോധിച്ചു ഉറപ്പുവരുത്തുന്നുണ്ട്​. അംഗീകൃത എൻജിനീയറിങ്​ ഒാഫീസുകളും സുരക്ഷ സ്​ഥാപനങ്ങളുമായി സഹകരിച്ചാണ്​ പരിശോധന​.