റിയാദ് ഇന്ത്യൻ ഇസ്ലാഹി സെന്റർ 40ാം വാർഷികം സമാപിച്ചു
text_fieldsറിയാദ് ഇന്ത്യൻ ഇസ്ലാഹി സെന്റർ 40ാം വാർഷിക സമാപന സമ്മേളനം ശൈഖ് ഡോ. അബ്ദുല്ല ബിൻ ഉമർ അൽമർശദ്
ഉദ്ഘാടനം ചെയ്യുന്നു
റിയാദ്: സൗദി മതകാര്യ വകുപ്പിന്റെയും ദഅ്വ ആൻഡ് അവയർനസ് സൊസൈറ്റികളുടെയും അംഗീകാരമുള്ള റിയാദ് ഇന്ത്യൻ ഇസ്ലാഹി സെന്റർ കഴിഞ്ഞ ഒരു വർഷമായി ആചരിച്ചുവന്ന 40ാം വാർഷിക പരിപാടികൾ സമാപിച്ചു. ‘നാൽപ്പതിന്റെ നിറവിൽ നവോത്ഥാനത്തിന്റെ പുതിയ കാലത്തേക്ക്’ എന്ന ശീർഷകത്തിൽ നടന്ന സമാപന സമ്മേളനത്തിൽ ആയിരക്കണക്കിനാളുകൾ പങ്കെടുത്തു. വൈകീട്ട് ഏഴിന് സമ്മേളനം ദഅ്വ ആൻഡള അവയർനസ് സൊസൈറ്റി ഡയറക്ടർ ശൈഖ് ഡോ. അബ്ദുല്ല ബിൻ ഉമർ അൽമർശദ് ഉദ്ഘാടനം ചെയ്തു. സെന്റർ പ്രസിഡന്റ് അബ്ദുൽ ഖയ്യും ബുസ്താനി അധ്യക്ഷതവഹിച്ചു.
അൻസാർ നന്മണ്ട, ഐ.എസ്.എം സ്റ്റേറ്റ് ജനറൽ സെക്രട്ടറി ഷുക്കൂർ സ്വലാഹി ആലപ്പുഴ എന്നിവർ മുഖ്യപ്രഭാഷണങ്ങൾ നിർവഹിച്ചു. ദഅ്വ ആൻഡ് അവയർനസ് സൊസൈറ്റി പ്രബോധക വിഭാഗം മേധാവി ശൈഖ് മാഹിർ ബിൻ അബ്ദുല്ല അൽഹമാമി മുഖ്യാതിഥിയായി പങ്കെടുത്തു. സംഘാടകസമിതി കൺവീനർ മുഹമ്മദ് സുൽഫിക്കർ സ്വാഗതവും സെന്റർ ജനറൽ സെക്രട്ടറി അബ്ദുറസാഖ് സ്വലാഹി നന്ദിയും പറഞ്ഞു. ഫർഹാൻ ഇസ്ലാഹി ഖിറാഅത്ത് നിർവഹിച്ചു.
ലേൺ ദ ഖുർആൻ അന്താരാഷ്ട്ര ഓൺലൈൻ ഫൈനൽ പരീക്ഷ വിജയികൾക്കുള്ള രണ്ടര ലക്ഷം രൂപയുടെ സമ്മാന വിതരണവും കെ.എൻ.എം വിദ്യാഭ്യാസ ബോർഡ് സൗദിയിൽ നടത്തിയ അഞ്ച്, ഏഴ് ക്ലാസുകളിലെ പൊതുപരീക്ഷയിൽ റിയാദ് സലഫി മദ്റസയിൽനിന്നും പരീക്ഷയെഴുതിയ കുട്ടികളിൽ മുഴുവൻ വിഷയങ്ങളിലും എ പ്ലസ് നേടിയ കുട്ടികളെ ആദരിക്കൽ ചടങ്ങും സമ്മേളനത്തിൽ നടന്നു. കെ.എൻ.എം സംസ്ഥാന കമ്മിറ്റി പ്രഖ്യാപിച്ച ലഹരി വിരുദ്ധ പ്രതിജ്ഞയിൽ ആയിരങ്ങൾ പങ്കാളികളായി.
രാവിലെ എട്ടിന് ആരംഭിച്ച പരിപാടി രാത്രി 10.30 വരെ നീണ്ടുനിന്നു. രാവിലെ നടന്ന വളന്റിയർ മീറ്റിൽ ക്യാപ്റ്റൻ ഇഖ്ബാൽ വേങ്ങര സ്വാഗതവും അബ്ദുൽ വഹാബ് പാലത്തിങ്ങൽ നന്ദിയും പറഞ്ഞു.
സംഘാടകസമിതി കൺവീനർ മുഹമ്മദ് സുൽഫിക്കർ പ്രവർത്തനങ്ങൾ വിശദീകരിച്ചു. ഉച്ചക്ക് രണ്ട് മുതൽ നാലു വേദികളിലായി വിവിധ പരിപാടികൾ അരങ്ങേറി. സലഫി മദ്റസ ഒരുക്കിയ ‘മുക്തി- ലഹരി മരണത്തിന്റെ വ്യാപാരി’ ലഹരി വിരുദ്ധ എക്സിബിഷൻ കുട്ടികളുടെ അവതരണ മികവിനാൽ ശ്രദ്ധേയമായി.
ലഹരി വിരുദ്ധ പാനൽ ഡിസ്കഷനിൽ ഡോ. എസ്. അബ്ദുൽ അസീസ്, ഖുദ്റത്തുള്ള നദ്വി, ഉസാമ മുഹമ്മദ്, വി.ജെ. നസറുദ്ദീൻ, അഡ്വ. അബ്ദുൽ ജലീൽ എന്നിവർ സംസാരിച്ചു. അബ്ദുസ്സലാം ബുസ്താനി, സാജിദ് കൊച്ചി എന്നിവർ പാനൽ ഡിസ്കഷൻ നിയന്ത്രിച്ചു. ഐ.എസ്.എം നടത്തുന്ന ലഹരിവിരുദ്ധ കാമ്പയിൻ സൗദിതല ഉദ്ഘാടനം ഡോ. എസ്. അബ്ദുൽ അസീസ്, പി. നൗഷാദ് അലി എന്നിവർ നിർവഹിച്ചു. ‘പ്രപഞ്ചം: വിവരണാതീതമായ അത്ഭുതം’ ഡോം ലൈവ് ഷോയും അരങ്ങേറി.
കുട്ടികൾക്കായി ‘വിങ്സ്’ എന്ന പേരിൽ പ്രത്യേക പരിപാടിയും നടന്നു. വിവിധ ഗെയിമുകളും ‘കുട്ടിവര’ എന്ന പേരിൽ പ്രത്യേക മത്സരവും നടന്നു.

Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.