മഴവില്ലഴകിൽ റിയാദ്​ മെട്രോ; ഒടുവിൽ ഓറഞ്ച്​ നിറവുമണിഞ്ഞു

റിയാദ്​: ആദ്യം നീലയും വയലറ്റും മഞ്ഞയും പിന്നീട്​ ചുവപ്പും പച്ചയും ഒടുവിൽ ഓറഞ്ചും വർണങ്ങളണിഞ്ഞ്​ റിയാദ്​ മെട്രോ മഴവില്ലഴകിൽ. യാത്രക്കാരുടെ സംതൃപ്​തി കൊണ്ട്​ ഏഴാമത്തെ നിറവുമെഴുതി സൗദി തലസ്ഥാന നഗരം പൊതുഗതാഗതത്തി​െൻറ കാര്യത്തിൽ പുതിയൊരു യുഗപ്പിറവി സാധ്യമാക്കിയിരിക്കുന്നു. നഗരത്തി​െൻറ മുക്കുമൂലകളെ ബന്ധിപ്പിക്കുന്ന ബസുകളും പരസ്​പര ബന്ധിതമായ ആറ്​ മെട്രോ ലൈനുകളും ചേർന്ന്​ കണ്ണിമുറിയാത്ത ഒരു പൊതുഗതാഗത ശൃംഖലയാണ്​ ഞായറാഴ്​ച ഓറഞ്ച്​ ട്രാക്കിലെ മെട്രോ കൂടി ചലിച്ചുതുടങ്ങിയതോടെ യാഥാർഥ്യമായത്​.

ബസും ട്രയിനും ചേർന്ന്​ ഊടും പാവുമിട്ട്​ നെയ്​തത് നഗരവാസികൾക്കും സന്ദർശകർക്കും പരാശ്രയം കൂടാതെ​​ സ്വൈര സഞ്ചാരം നടത്താനുള്ള ലോകത്തെ ഏറ്റവും മികച്ച പൊതുഗതാഗത സംവിധാനമാണ്​. റിയാദ്​ സിറ്റി റോയൽ കമീഷൻ നേതൃത്വം നൽകുന്ന കിങ്​ അബ്​ദുൽ അസീസ്​ ട്രാൻസ്​പോർട്ട്​ സിസ്​റ്റത്തിന്​ കീഴിലാണ്​ ഇത്​.

നഗരത്തി​െൻറ പടിഞ്ഞാറ്​ ഭാഗത്തെ ജിദ്ദ റോഡിൽനിന്ന്​ ഏറ്റവും കിഴക്കുള്ള ഖഷം അൽആൻ വരെ 41.1 കിലോമീറ്റർ നീളത്തിൽ കിടക്കുന്ന ഓറഞ്ച്​ ട്രാക്കാണ്​ ഞായറാഴ്​ച പ്രവർത്തനം ആരംഭിച്ചത്​. രാവിലെ ആറിന്​ ആദ്യ ഓറഞ്ച്​ ട്രെയിൻ ചലിച്ചു തുടങ്ങി. ഏറ്റവും കിഴക്കുഭാഗത്ത്​ കൂടെ പോകുന്ന സെക്കൻഡ്​ ഈസ്​റ്റേൺ റിങ്​ റോഡുമായി ചേരുന്ന ഈ മെട്രോ ട്രാക്കി​ൽ ആകെ 22 സ്​റ്റേഷനാണ്​ നിശ്ചയിച്ചിട്ടുള്ളതെങ്കിലും പണിപൂർത്തിയായി പ്രവർത്തനക്ഷമമായത്​ അഞ്ച്​ സ്​റ്റേഷനുകൾ മാത്രമാണ്​. ജിദ്ദ റോഡ്​, തുവൈഖ്​, അദ്ദൗവു, ഹാറൂൺ അൽ റഷീദ്​, നസീം എന്ന്​ സ്​റ്റേഷനുകളാണ്​ ഞായറാഴ്​ച പ്രവർത്തനം ആരംഭിച്ചത്​. ഈ അഞ്ച്​ സ്​റ്റേഷനുകളിൽ മാത്രമേ നിലവിൽ ട്രയിന്​​ സ്​റ്റോപ്പുള്ളൂ. ബാക്കി 17 സ്​റ്റേഷനുകൾ വൈകാതെ പ്രവർത്തനം ആരംഭിക്കും. ഈ ലൈനിലെ ഏറ്റവും വലിയ സ്​റ്റേഷൻ ബത്​ഹയോട്​ ചേർന്നുള്ള ദീരയിലെ ‘ഖസറുൽ ഹുകൂം’ സ്​റ്റേഷനാണ്​. പണി പൂർത്തിയാക്കുന്ന ഘട്ടത്തിലാണ്​.

ഇതോടൊപ്പം ബ്ലൂ ട്രാക്കിലെ അൽ മുറൂജ്​, ബാങ്ക്​ അൽ ബിലാദ്​, കിങ്​ ഫഹദ്​ ലൈബ്രറി എന്നീ മൂന്നു സ്​റ്റേഷനുകൾ കൂടി ഞായറാഴ്​ച തുറന്നിട്ടുണ്ട്​. 38 കിലോമീറ്റർ ദൈർഘ്യമുള്ള ബ്ലൂ ട്രാക്കിൽ ആകെ 25 സ്​റ്റേഷനുകളാണുള്ളത്​. 21 സ്​റ്റേഷനുകൾ തുറന്നു. ഇനി ബാക്കിയുള്ള നാല് സ്​റ്റേഷനുകൾ രണ്ടും ബത്​ഹയിലാണ്​. അൽ ബത്​ഹ, മ്യൂസിയം സ്​റ്റേഷനുകൾ. ഇത്​ കൂടി തുറന്നാലേ ബത്​ഹയിൽനിന്ന്​ കൂടുതലാളുകൾക്ക്​ ട്രയിൻ സൗകര്യം പൂർണാർഥത്തിൽ ഉപയോഗപ്പെടുത്താനാവൂ.

റെഡ്​ ട്രാക്ക്​ കടന്നുപോകുന്ന കിങ്​ സഊദ്​ യൂനിവേഴ്​സിറ്റിയോട്​ ചേർന്നുള്ള മെട്രോ സ്​റ്റേഷനിലേക്ക്​ വിശാലമായ കാമ്പസിനുള്ളിൽനിന്ന്​ ഷട്ടിൽ ബസ്​ സർവിസിനും ഞായറാഴ്​ച തുടക്കമായി. എല്ലാ ദിവസവും രാവിലെ ഏഴ്​ മുതൽ വൈകീട്ട്​ ആറ്​ വരെ ഇടതടവില്ലാതെ ബസ്​ സർവിസുണ്ടാവും.

നവംബർ 27ന്​ സൗദി ഭരണാധികാരി സൽമാൻ രാജാവ്​ ഔദ്യോഗിക ഉദ്​ഘാടനം നിർവഹിച്ച ​റിയാദ്​ മെട്രോയിൽ യാത്രാഗതാഗതം ആരംഭിച്ചത്​ ഡിസംബർ ഒന്ന്​ മുതലാണ്​. ബ്ലൂ, യെല്ലോ, പർപ്പിൾ എന്നീ മൂന്ന്​ ട്രാക്കുകളിലാണ്​ ആദ്യം സർവിസ്​ ആരംഭിച്ചത്​​. ഡിസംബർ 15ഓടെ റെഡ്​, ഗ്രീൻ ​ട്രാക്കുകളിലും സർവിസ്​ തുടങ്ങി. ഒടുവിൽ ഓറഞ്ച്​ ട്രാക്കിലും സർവിസ്​ ആരംഭിച്ചതോടെ റിയാദ്​ മെട്രോ പദ്ധതി പൂർണമായി. ബ്ലൂ ലൈനിൽ അവശേഷിക്കുന്ന നാലും ഓറഞ്ച്​ ലൈനിലെ 17ഉം സ്​റ്റേഷനുകളും കൂടി പ്രവർത്തനം ആരംഭിച്ചാലേ പൂർണാർഥത്തിൽ മെട്രോയുടെ പ്രയോജനം പൊതുജനങ്ങൾക്ക്​ ലഭിക്കൂ. മെട്രോക്ക്​ മുമ്പ്​ തന്നെ നഗരത്തി​െൻറ മുക്കുമൂലകളെയും മെട്രേ സ്​റ്റേഷനുകളെയും തമ്മിൽ ബന്ധിപ്പിച്ചുകൊണ്ട്​ ബസ്​ സർവിസ്​ ആരംഭിച്ചിരുന്നു. ആകെ ആയിരത്തോളം ബസുകളാണ്​ ദിനംപ്രതി സർവിസ്​ നടത്തുന്നത്​.

അതേസമയം ആരംഭിച്ച സർവിസുകളി​െലല്ലാം യാത്രക്കാരുടെ വലിയ തിരക്കാണ്​ അനുഭവപ്പെടുന്നത്​. ഒരു മാസത്തിനുള്ളിൽ യാത്രക്കാരുടെ എണ്ണം 35 ലക്ഷം കവിഞ്ഞു. അവശേഷിക്കുന്ന സ്​റ്റേഷനുകൾ കൂടി തുറക്കുന്നതോടെ യാത്രക്കാരുടെ എണ്ണം പതിന്മടങ്ങായി ഉയരും.