ഉത്സവത്തിലാറാടി റിയാദ് സീസൺ​​; ആസ്വദിക്കാനെത്തിയവരുടെ എണ്ണം 10 ലക്ഷം കവിഞ്ഞു

റിയാദ്​: ഉത്സവത്തിലാറാടി റിയാദ് സീസൺ തുടരുന്നു. ഇതുവരെ പരിപാടികൾ ആസ്വദിക്കാ​നെത്തിയവരുടെ എണ്ണം 10 ലക്ഷം കവിഞ്ഞു. സീസൺ ​തുടങ്ങി ഒരാഴ്​ചക്കിടയിലാണ്​ ഇത്രയും സന്ദർശകരെത്തിയതെന്ന്​ പൊതുവിനോദ അതോറിറ്റി ചെയർമാൻ തുർക്കി ആലുശൈഖ്​ പറഞ്ഞു. 'സങ്കൽപത്തിനും അപ്പുറം' എന്ന തലക്കെട്ടിൽ ആരംഭിച്ച സീസൺ പരിപാടികൾ രാജ്യത്തിനകത്തും പുറത്തും നിന്നുള്ള നിരവധി സന്ദർശകരെയാണ്​ ആകർഷിച്ചത്​.

സീസണിലെ മിന്നുന്ന ഷോകളും ആവേശം നിറച്ച വൈവിധ്യമാർന്ന വിനോദ പരിപാടികളും അവർ ആസ്വദിച്ചു. പല രാജ്യങ്ങളുടെയും ജീവിത അന്തരീക്ഷം ഒരിടത്ത്​ ഒരു സമയത്ത്​ അനുഭവിക്കാൻ സാധിച്ചു എന്നതാണ് ആസ്വാദകർക്ക് ലഭിച്ച സൗകര്യം. ഗെയിമുകൾ, റസ്​റ്റോറൻറുകൾ, കഫേകൾ, പാർട്ടികൾ, നാടകങ്ങൾ, വിനോദത്തിന്റെ വിവിധ മേഖലകളിലെ നിരവധി അന്താരാഷ്​ട്ര പ്രദർശനങ്ങൾ എന്നിവ സീസണിലെ വിനോദ പ്രവർത്തനങ്ങളിൽ ഉൾപ്പെടുന്നു. സസ്‍പെൻസിന്റെയും ആധുനികതയുടെയും സവിശേഷമായ ചേരുവ പ്രദാനം ചെയ്യുന്നുവെന്നതാണ്​ റിയാദ് സീസണിന്റെ സവിശേഷത. വിനോദ മേഖല വ്യവസായത്തി​ന്റെ നിലവാരം ഉയർത്തുന്നതിനും ഏറ്റവും പ്രമുഖ വിനോദ കേന്ദ്രങ്ങളിലൊന്നായി രാജ്യത്തിന്റെ സ്ഥാനം മാറ്റുന്നതിനും ഇതെല്ലാം സഹായിച്ചതായും പൊതുവിനോദ അതോറിറ്റി ചെയർമാൻ പറഞ്ഞു.