ദമ്മാമിൽ വൻ കവർച്ച സംഘം പിടിയിൽ

ദമ്മാം: ദമ്മാം നഗരത്തി​​െൻറ വിവിധ ഭാഗങ്ങൾ കേന്ദ്രീകരിച്ച്​ പിടിച്ചുപറിയും മോഷണവും നടത്തിയ വൻ കവർച്ച സംഘം പൊലീസി​​െൻറ പിടിയിലായി. പലയിടങ്ങളിലായി നടന്ന 48 ഒാളം കവർച്ചക്കേസുകളിൽ തിരയുന്ന പ്രതികളാണ് പിടിയിലായത്. സുരക്ഷാ വിഭാഗത്തി​​െൻറ കീഴിലെ പ്രത്യേക അന്വേഷണ വിഭാഗമാണ് പ്രതികൾക്കായി വലവീശിയതെന്ന് കിഴക്കൻ പ്രവിശ്യ സുരക്ഷാ വിഭാഗം ഒൗദ്യോഗിക വക്താവ് സിയാദ് അൽറുവൈദി അറിയിച്ചു. അറബ് വംശജരായ മൂന്ന് യുവാക്കളാണ് അറസ്​റ്റിലായത്. സമാന കേസുകളിൽപെട്ട കൂടുതൽ പ്രതികൾക്കായി അന്വേഷണം തുടരും. 

മോട്ടോർ ബൈക്കുകളിലെത്തി വഴിയാത്രക്കാരിൽ നിന്ന്​ ബാഗുകളും പണവും മൊബൈൽ ഫോണുകളും തട്ടിയെടുക്കുകയാണ്​ സംഘത്തി​​െൻറ രീതി. കൃത്യത്തിനിടെ പ്രതികരിക്കുന്നവരെ ആക്രമിച്ച് രക്ഷപ്പെടുകയും ചെയ്യും. വിദേശ തൊഴിലാളികളുടെ താമസ സ്​ഥലങ്ങളിൽ കയറി ആയുധങ്ങൾ കാട്ടി ഭീഷണിപ്പെടുത്തി കൊള്ളയടിക്കുകയും ചെയ്​തിരുന്നു. പണമടങ്ങിയ ബാഗും മറ്റു തൊണ്ടി മുതലുകളും സംഘത്തിൽ നിന്ന് പിടിച്ചെടുത്തു. നഗരത്തി​​െൻറ വിവിധ ഭാഗങ്ങളിൽ നടന്നകവർച്ചക്കേസിൽ സംഘം കുറ്റസമ്മതം നടത്തിയതായി പോലീസ്​ പറഞ്ഞു.

മലയാളികടക്കമുള്ള ഏഷ്യക്കാരെയാണ്​ സംഘം പ്രധാനമായും ലക്ഷ്യംവെച്ചിരുന്നത്​. ദമ്മാമിലെ അദാമ, ബാദിയ്യ, ഗസ്സാസ്  തുടങ്ങിയ ഏരിയകളിലാണ്​ ഇത്തരം അക്രമ സംഭവങ്ങൾ കൂടുതൽ റിപ്പോർട്ട്​ ചെയ്യപ്പെടുന്നത്​. കവർച്ച സംഘത്തെ ഭയന്ന്  രാത്രി പുറത്തിറങ്ങാനാവാത്ത അവസ്ഥയാണെന്ന് അനുഭവസ്ഥർ പറയുന്നു. പ്രതികളെ തുടർനടപടികൾക്കായി ബന്ധപ്പെട്ട വകുപ്പുകൾക്ക്​ കൈമാറി.