ത്വാഇഫിൽ വിദേശസേന എത്തിയെന്ന പ്രചാരണം അടിസ്ഥാനരഹിതം -സൗദി പ്രതിരോധ മന്ത്രാലയം

റിയാദ്​: ത്വാഇഫിലെ കിങ്​ ഫഹദ്​ എയർബേസിലേക്ക്​ വിദേശ സേന എത്തിയെന്ന പ്രചാരണം അടിസ്ഥാന രഹിതമെന്ന്​ സൗദി പ്രതിരോധ മന്ത്രാലയം. ത്വാഇഫിൽ വിദേശ രാജ്യങ്ങളുടെ സൈന്യം എത്തിയെന്ന വാർത്ത പ്രചരിക്കുന്നുണ്ട്​. ഇത്​​​​ അടിസ്ഥാനരഹിതമാണെന്ന്​ പ്രതിരോധ മന്ത്രാലയ വക്താവ് ബ്രിഗേഡിയർ ജനറൽ തുർക്കി അൽ മാലികി പറഞ്ഞു.

യമനിലെ വിമത സൈനിക വിഭാഗമായ ഹൂതികളുടെ കേന്ദ്രങ്ങളിലെ അമേരിക്കൻ-ബ്രിട്ടീഷ് ആക്രമണ പശ്ചാത്തലത്തിലാണ്​ ഇത്തരത്തിൽ വാർത്തകൾ പ്രചരിച്ചത്​. സൗദിയിലേക്ക്​ വിദേശ സേനകൾ എത്തിയെന്ന നിലയിലാണ്​ ചില മാധ്യമങ്ങൾ അഭ്യൂഹം പ്രചരിപ്പിച്ചത്​.

ഹൂതികൾക്കെതിരെ അമേരിക്കൻ, ബ്രിട്ടീഷ് സേനകൾ ആക്രമണം ആരംഭിക്കുന്നതിന് തൊട്ടുമുമ്പായിരുന്നു ഇത്​. ഉടൻ​ നിഷേധവുമായി സൗദി പ്രതിരോധ മന്ത്രാലയ വക്താവ്​ രംഗത്ത്​ എത്തുകയായിരുന്നു​​. ഇത്​ സംബന്ധിച്ച് പ്രതിരോധമന്ത്രാലയത്തി​ന്റെ ആദ്യ പ്രതികരണമാണിത്​.