സൗദി കാർഷിക മേള റിയാദിൽ നാളെ സമാപിക്കും

റിയാദ്: സൗദി അറേബ്യയിലെ ഏറ്റവും വലിയ കാർഷിക പ്രദർശനമേളക്ക്​ റിയാദിൽ വ്യാഴാഴ്​ച സമാപനം കുറിക്കും. റിയാദ് ഇൻറർനാഷനൽ എക്സിബിഷൻ സെന്ററിൽ തിങ്കളാഴ്ച ഉച്ചയോടെ ആരംഭിച്ച ചതുർദിന മേള വ്യാഴാഴ്ച രാത്രി 9.30 ഓടെയാണ് അവസാനിക്കുക . രാജ്യത്തിനകത്തും പുറത്തും നിന്നായി കാർഷികോൽപാദന, അനുബന്ധ വ്യവസായ രംഗത്തെ 450-ലധികം കമ്പനികളാണ്​ പങ്കെടുക്കുന്നത്​. കർഷകർക്കും ഈ മേഖലയിലെ വ്യവസായികൾക്കും നിക്ഷേപകർക്കും പ്രയോജനകരമാണ്​ മേള.

കാർഷിക മേഖലയിലെ ഏറ്റവും പുതിയ സാങ്കേതിക വിദ്യകളും ഫാമുകളുടെ പരിപാലനവും മെഷിനറികളുടെ ഉപയോഗവുമെല്ലാം മേളയിൽ പരിചയപ്പെടുത്തുന്നുണ്ട്. സൗദി അറേബ്യയിലേക്ക് ഉൽപന്നങ്ങൾ ഇറക്കുമതി ചെയ്യുന്നവർക്കും സൗദിയിൽനിന്നുള്ള ഉൽപന്നങ്ങൾ പുറംരാജ്യങ്ങളിലേക്ക് കയറ്റിയയക്കുന്ന കമ്പനികൾക്കും ലോകത്തിന്റെ വിവിവിധ കോണുകളിലുള്ള കാർഷിക വാണിജ്യ മേഖലയിലെ വിദഗ്ദ്ധരേയും പ്രതിനിധികളെയും കാണാനും വാണിജ്യ വിനിമയത്തിന് തുടക്കം കുറിക്കാനുമുള്ള അവസരം കൂടിയാണിത്.

കാർഷിക മേഖലയിലും സസ്യശാസ്ത്ര രംഗത്തും പഠനവും ഗവേഷണ പരീക്ഷണങ്ങളും നടത്തുന്ന വിദ്യാർഥികൾക്കും മേള പ്രയോചനപ്പെടും. കാർഷിക ഉൽപന്നങ്ങൾക്ക് പുറമെ വെറ്റിനറി മെഡിസിനിക്കുകളും ഫാമുകളുടെ ഹൈജീൻ സിസ്റ്റങ്ങളും പ്രദർശനത്തിനുണ്ട്. ഈത്തപ്പഴവും മുന്തിരിയും മാതളവും ഒലീവും കാപ്പിയും അത്തിപ്പഴവും മാങ്ങയും സൗദിയിലെ പ്രധാന കൃഷികളിൽ ചിലതാണ്. കാർഷിക രംഗത്തെ പുതിയ ടെക്നോളോജിക്കളെ കുറിച്ചറിയാനും വിദേശ രാജ്യങ്ങളുടെ കർഷക രീതികൾ കാണാനും തബൂക്, ത്വാഇഫ്, അബഹ, അൽ-ബാഹ തുടങ്ങി സൗദിയുടെ കാർഷിക മേഖലകളിൽനിന്ന് കുടുംബമായും സ്ഥാപനങ്ങളെ പ്രതിനിധീകരിച്ചും സന്ദർശകർ മേളയിലേക്കെത്തുന്നുണ്ട്.

സൗദിയിലെ പ്രമുഖ പാലുൽപന്ന കമ്പനിയായ അൽ-മറായി ഉൾപ്പടെ ചെറുതും വലുതുമായ കമ്പനികൾ അവരുടെ ഉൽപന്നങ്ങൾ പ്രദർശനത്തിനെത്തിച്ചിട്ടുണ്ട്. ഹാളിനകത്ത് റഷ്യയുടെ ഉൽപന്നങ്ങളും മെഷിനറികളും പ്രദർശിപ്പിക്കാൻ പ്രതേക പവലിയൻ തന്നെ ഒരുക്കിയിട്ടുണ്ട്. വീടുകളുടെ അകത്തും പുറത്തും നിർമിക്കുന്ന പൂന്തോട്ടങ്ങളെ കുറിച്ചുള്ള വിവരങ്ങളും ആവശ്യമായ പൂക്കളും വളങ്ങളും ചട്ടികളും മറ്റ് പരിചരണ വസ്തുക്കളും പൂന്തോട്ടങ്ങളുടെ നിർമിതികളെ മനോഹരമാക്കാനുള്ള മാർഗനിർദേശവും മേളയിലുണ്ട്.

സന്ദർശകർക്ക് പ്രദർശന നഗരിയിലേക്ക് പ്രവേശിക്കാൻ ബാഡ്​ജ്​ നിർബന്ധമാണ്. പൂർണമായും സൗജന്യമായ പാസ്​ നേരിട്ട് എത്തിയോ ഓൺലൈൻ വഴിയോ നേടാനാകും