ലബനാനെതിരെ സൗദി കടുത്ത നടപടിക്ക്​; അംബാസഡറെ തിരിച്ചുവിളിച്ചു, എല്ലാ ഇറക്കുമതികളും നിർത്തലാക്കി

ജിദ്ദ: രാജ്യത്തിനെതിരെ അപമാനകരമായ പ്രസ്​താവന നടത്തിയ ലബനാനെതിരെ കടുത്ത നടപടിക്ക്​ സൗദി അറേബ്യ. ലബനാനിലെ തങ്ങളുടെ അംബാസഡറെ തിരിച്ചുവിളിച്ചു. വെള്ളിയാഴ്​ച വൈകീട്ടാണ്​​ കൂടിയാലോചന നടത്താൻ അംബാസഡറെ തിരിച്ചുവിളിക്കാൻ തീരുമാനിച്ച വിവരം സൗദി അറേബ്യ പുറത്തുവിട്ടത്​​.

അടുത്ത 48 മണിക്കൂറിനുള്ളിൽ സൗദിയിലെ ലബനാൻ അംബാസഡ​റോട്​ രാജ്യം വിട്ടുപോകാനും ആവശ്യപ്പെട്ടിട്ടുണ്ട്​. രാജ്യത്തി​െൻറയും ജനങ്ങളുടെയും സുരക്ഷ സംരക്ഷിക്കുന്നതിന് ആവശ്യമായ എല്ലാ നടപടികളും സ്വീകരിക്കേണ്ടതി​െൻറ പ്രാധാന്യം കണക്കിലെടുത്ത് സൗദിയിലേക്ക്​ ലബനാനിൽ നിന്നുള്ള എല്ലാ ഇറക്കുമതികളും നിർത്താനും സൗദി അറേബ്യ തീരുമാനിച്ചു​.

ലബനാൻ ഇൻഫർമേഷൻ മന്ത്രി കഴിഞ്ഞ ദിവസം സൗദി അറേബ്യക്കെതി​രായി നടത്തിയ അപമാനകരമായ പ്രസ്​താവനയെ അപലപിച്ച്​​ ഈ മാസം 27ന്​ സൗദി വി​ദേശകാര്യ മന്ത്രാലയം ഇറക്കിയ പ്രസ്​താവനയുടെ ചുവടുപിടിച്ചാണ്​​ പുതിയ തീരുമാനങ്ങൾ. സൗദിയെക്കുറിച്ചും അതി​െൻറ നയങ്ങളെക്കുറിച്ചും ലബനാൻ അധികൃതർ പുറത്തിറക്കിയ പ്രസ്​താവന വസ്​തുതാവിരുദ്ധവും വ്യാജവും അപലപനീയമാണെന്നും അതിനെ തള്ളിക്കളയുന്നുവെന്നും സൗദി വ്യക്തമാക്കി​​.

ലബനാനിൽനിന്ന്​ ചരക്കുകളുടെ മറവിൽ സൗദിയിലേക്ക്​ മയക്കുമരുന്ന്​ കടത്തുന്നത്​ തടയണ​െമന്ന തങ്ങളുടെ ആവശ്യം സ്വീകരിക്കുന്നതിൽ അലംഭാവം, തീവ്രവാദഗ്രൂപ്പായ ഹിസ്​ബുള്ളക്ക്​ പിന്തുണ നൽകൽ, അവർക്ക്​ എല്ലാ തുറമുഖങ്ങളിലുമുള്ള ആധിപത്യം, സൗദിയിലെ ജനങ്ങളെ ലക്ഷ്യമിട്ടുള്ള കുറ്റകൃത്യങ്ങളിൽ ഉൾപ്പെട്ടവർക്കെതിരെ ശിക്ഷാനടപടികൾ സ്വീകരിക്കാതിരിക്കൽ, ജുഡീഷ്യൽ സഹകരണത്തിനുള്ള റിയാദ്​ ഉടമ്പടി ലംഘടിച്ച്​ രാജ്യം ആവശ്യപ്പെട്ട ആളുകളെ കൈമാറാതിരിക്കൽ എന്നീ കാരണങ്ങളും ലെബനാന്​ എതിരെ കടുത്ത തീരുമാനമെടുക്കുന്നതിലേക്ക്​ നയിച്ചതായി സൗദി പ്രസ്​ ഏജൻസി റിപ്പോർട്ട്​ ചെയ്​തു.