2.8 കിലോമീറ്റർ നീളത്തിൽ ഇഫ്​താർ വിരുന്ന്​, പങ്കെടുത്തത് 20,000ലധികം പേർ; സൗദിക്ക്​ വീണ്ടും​ ലോക റെക്കോഡ്

റിയാദ്​: ഏറ്റവും നീളമുള്ള ഇഫ്​താർ ടേബിൾ ഒരുക്കിയതിന്​ സൗദിക്ക്​ വീണ്ടും ലോക റെക്കോഡ്. വിവിധ രാജ്യങ്ങളിൽ നോമ്പ്​ തുറപ്പിക്കുന്നതിനുള്ള ഖാദിമുൽ ഹറമൈൻ ഇഫ്​താർ പദ്ധതിയുടെ ഭാഗമായി ഇന്തോ​നേഷ്യയിൽ ഒരുക്കിയ സമൂഹ നോമ്പുതുറയാണ്​​ ആസിയാൻ രാജ്യങ്ങളുടെ ചരിത്രത്തിലെ ഏറ്റവും വലിയ ഇഫ്താർ എന്ന നിലയിൽ പുതിയ റെക്കോഡ് സൃഷ്​ടിച്ചത്​. സൗദി മതകാര്യ വകുപ്പാണ്​ സംഘാടകർ​. ‘മോറി’ എൻസൈക്ലോപീഡിയ ഓഫ് റെക്കോർഡ്‌സ് സർട്ടിഫിക്കറ്റ് രണ്ടാം തവണയാണ്​ സൗദി അറേബ്യ ഒരുക്കുന്ന ഇഫ്​താറിന്​ ലഭിക്കുന്നത്​. ഇന്തോനേഷ്യയിലെ സോളോ നഗരത്തിലുള്ള ‘മനഹൻ’ സ്‌പോർട്‌സ് ട്രാക്കിൽ 2800 മീറ്റർ നീളത്തിലായിരുന്നു ഇഫ്​താർ ടേബിൾ. 20,000ലധികം ആളുകൾ സമൂഹ നോമ്പുതുറയിൽ പ​​െങ്കടുത്തു.

ഇസ്‌ലാമിക സാഹോദര്യം പ്രോത്സാഹിപ്പിക്കുന്നതിനുള്ള സൗദിയുടെ ശ്രമങ്ങളെ പ്രതിഫലിപ്പിക്കുന്നത്​ കൂടിയായിരുന്നു സമൂഹ ഇഫ്​താർ. ഗവർണർ, രാഷ്​ട്രീയ, മതനേതാക്കൾ, പണ്ഡിതർ, ജീവകാരുണ്യ പ്രവർത്തകർ എന്നിവരും പ​ങ്കെടുത്തു. 590 തൊഴിലാളികളുടെയും സൂപ്പർവൈസർമാരുടെയും മേൽനോട്ടത്തിൽ 20 പ്രാദേശിക റെസ്​റ്ററൻറുകൾ ഇഫ്​താർ മേശ തയാറാക്കുന്നതിൽ പങ്കെടുത്തു.

മഴയിൽനിന്ന് സംരക്ഷിക്കുന്നതിനുള്ള കുടകൾ, 15 ആംബുലൻസുകൾ, ശുചീകരണ, ഓപ്പറേറ്റിങ്​ സേവനങ്ങൾ, ജനത്തി​െൻറ സുരക്ഷക്കും സംഘാടനത്തിനുമായി സെക്യൂരിറ്റി സംവിധാനം എന്നിവ ട്രാക്കിലുടനീളം സജ്ജീകരിച്ചു. ഈ പരിപാടിയുടെ പ്രചരണാർത്ഥം പരസ്യ ബിൽബോർഡുകൾ സോളോ നഗരത്തിൽ ഉടനീളം സ്ഥാപിച്ചിരുന്നു. ഇന്തോനേഷ്യൻ മാധ്യമങ്ങൾ ‘സ്നേഹത്തി​െൻറയും ഇസ്​ലാമിക സാഹോദര്യത്തി​െൻറയും സന്ദേശം’ എന്നാണ് വിശേഷിപ്പിച്ചത്. ലോകത്ത്​ ഏറ്റവും കൂടുതൽ മുസ്​ലിം ജനസംഖ്യയുള്ള ഇന്തോനേഷ്യയിലെ ജനങ്ങളെ പിന്തുണയ്ക്കുന്നതിനുള്ള സൗദി അറേബ്യയുടെ താൽപ്പര്യത്തെ പ്രതിഫലിപ്പിക്കുന്നതാണ്​ ഇതെന്നും ഇസ്​ലാമിക മൂല്യങ്ങൾ ഉൾക്കൊള്ളുന്ന ജനങ്ങൾ തമ്മിലുള്ള സാഹോദര്യബന്ധം ശക്തിപ്പെടുത്തുന്നതാണെന്നും പലരും പ്രശംസിച്ചു.

ഭരണകൂട നിർദേശങ്ങൾക്ക്​ അനുസൃതമായി ഏറ്റവും ഉയർന്ന നിലവാരമുള്ള പരിപാടികൾ നടപ്പാക്കാനുള്ള സൗദി മതകാര്യ മന്ത്രി ഡോ. അബ്​ദുൽ ലത്തീഫ്​ ആലുശൈഖി​െൻറ നേതൃത്വത്തിലുള്ള മന്ത്രാലയത്തി​െൻറ താൽപര്യവുമാണ്​ ഇങ്ങനെയൊരു നേട്ടം കൈവരിക്കാനായതെന്ന്​ സൗദി മതകാര്യ വകുപ്പ് വക്താവ് അബ്​ദുല്ല അൽ അനസി പറഞ്ഞു. ജക്കാർത്തയിലെ സൗദി എംബസി മതകാര്യവകുപ്പ്​ അറ്റാഷെ, മതകാര്യ മന്ത്രാലയം, വിവിധ ഇന്തോനേഷ്യൻ സംസ്ഥാനങ്ങളിലെ ഔദ്യോഗിക അസോസിയേഷനുകൾ എന്നിവയുടെ സംയുക്തസഹകരണത്തിലാണ്​ ഇഫ്​താർ ഒരുങ്ങിയത്​.

മാനുഷിക പദ്ധതികളിലൊന്നാണ് നോമ്പുകാർക്ക് നോമ്പ് തുറക്കാനുള്ള ഖാദിമുൽ ഹറമൈൻ പദ്ധതിയെന്ന് അൽഅനസി ചൂണ്ടിക്കാട്ടി. ലോകമെമ്പാടുമുള്ള 61ലധികം രാജ്യങ്ങൾ പദ്ധതിയിലുൾപ്പെടുന്നു. ഈന്തപ്പഴം 102 രാജ്യങ്ങളിലും ഖുർആൻ 45 രാജ്യങ്ങളിലും വിതരണം ചെയ്യുന്നു. ഇത് ഇസ്​ലാമിനെയും മുസ്​ലിംകളെയും പിന്തുണയ്ക്കുന്നതിലും ആഗോളതലത്തിൽ ഇസ്​ലാമിക ഐക്യം ശക്തിപ്പെടുത്തുന്നതിലും സൗദിയുടെ മുൻനിര പങ്കിനെ പ്രതിഫലിപ്പിക്കുന്നുവെന്ന് സർക്കാർ വക്താവ്​ പറഞ്ഞു.