കൊല്ലപ്പെട്ട തോമസിന്റെ കുടുംബം മാപ്പ് നൽകി; സൗദിയിൽ വധശിക്ഷയിൽനിന്ന് സക്കീറിന് മോചനം ​

ദമ്മാം: അപ്രതീക്ഷിത വാക്കുതർക്കത്തെത്തുടർന്ന്​ സ്വന്തം സുഹൃത്തി​നെ കുത്തിക്കൊന്ന കൊല്ലം സ്വദേശിക്ക്​ ഒടുവിൽ മോചനം. കേരള മുൻ മുഖ്യമന്ത്രി ഉമ്മൻ ചാണ്ടിയുടെയുടേയും സൗദിയിലെ സാമൂഹികപ്രവർത്തകരുടേയും ഇടപെടലാണ്​ ഒമ്പത് വർഷ​ത്തെ കാത്തിരുപ്പുകൾക്കൊടുവിൽ മരണത്തി​ന്റെ വാൾത്തലയിൽനിന്ന്​ ഈ ചെറുപ്പക്കാരന്​ ജീവിതം തിരികെ നൽകിയത്​.

കൊല്ലം, പള്ളിത്തോട്ടം, ഗാന്ധിനഗർ സ്വദേശി എച്ച്​.ആൻ.സി കോമ്പൗണ്ടിൽ താമസിക്കുന്ന സക്കീർ ഹുസൈനാണ് (32) കൊല്ലപ്പെട്ട കോട്ടയം, കോട്ടമുറിക്കൽ, ചാലയിൽവീട്ടിൽ തോമസ്​ മാത്യൂവിന്റെ (27) കുടുംബത്തി​ന്റെ ദയയിൽ ജീവിതത്തിലേക്ക്​ തിരികെയെത്തിയത്​. മരണം കാത്തുകിടന്ന ഒമ്പതുവർഷത്തെ തടവിന് ഒടുവിൽ വ്യാഴാഴ്ച ദമ്മാമിൽനിന്ന്​ ശ്രീലങ്കൻ എയർലൈൻസിൽ സക്കീർ നാട്ടിലെത്തി. കൊല്ലപ്പെട്ടയാളുടെ കുടുംബത്തിന് ഉമ്മൻ ചാണ്ടി ദിയാധനം (മോചനദ്രവ്യം) നൽകുകയായിരുന്നു.

2009ലെ ഒരു ഓണനാളിലാണ്​ ദമ്മാമിലെ മലയാളി സമൂഹത്തെ നടുക്കിയ കൊലപാതകം നടന്നത്​. ഒരു ലാൻഡ്രിയിലെ ജീവനക്കാരായിരുന്നു സക്കീർ ഹു​സൈനും തോമസ്​ മാത്യൂവും​. ഓണദിവസം കൂട്ടുകാരെല്ലാം കൂടി സദ്യയുണ്ടാക്കി ഒപ്പമിരുന്ന്​ കഴിച്ചിരുന്നു. ശേഷം വൈകീട്ട് ഒന്നിച്ച്​ കൂടിയിരുന്ന്​ സംസാരിക്കുന്നതിനിടയിലു​ണ്ടായ തർക്കങ്ങൾക്കൊടുവിൽ സക്കീർ ഹു​സൈൻ തോമസ്​ മാത്യുവിനെ അടുക്കളിയിൽ നിന്ന്​ കത്തിയെടുത്ത്​ കുത്തുകയായിരുന്നു. തോമസ്​ മാത്യു തൽക്ഷണം മരിച്ചു.

പൊലീസ് സക്കീർ ഹുസൈനെ അറസ്റ്റ് ചെയ്തു. ​വിചാരണക്കോടതി എട്ടു വർഷത്തെ തടവും ശേഷം തലവെട്ടാനുമാണ്​ വിധിച്ചത്​. സംഭവം നടക്കുമ്പോൾ സക്കീർ ഹുസൈന്​ 23 വയസ്സായിരുന്നു​ പ്രായം. ലക്ഷംവീട്​ കോളനിയിൽ താമസിക്കുന്ന വൃദ്ധരായ മാതാപിതാക്കളെ സഹായിക്കാൻ ഗൾഫിലെത്തിയ സക്കീർ ഒരുനിമിഷത്തെ എടുത്തുചാട്ടം കാരണം കൊലപാതകിയായി ജയിലിലാവുകയായിരുന്നു.

സക്കീർ ഹുസൈ​ന്റെ അയൽവാസികളായ ജസ്​റ്റിൻ ഈ വിഷയം പ്രവാസി സമ്മാൻ ജോതാവ്​ കൂടിയായ സൗദിയിലെ സാമൂഹികപ്രവർത്തകൻ ശിഹാബ്​ കൊട്ടുകാടി​ന്റെ ശ്രദ്ധയിൽപ്പെടുത്തി. ജസ്​റ്റി​ന്റെ ഭാര്യ അനിത​ സക്കീർ ഹുസൈന്റെ നിരാലംബമായി പോയ കുടുംബത്തിന്​ ആവശ്യമായ സഹായവുമായി ഒപ്പം നിന്നു. ശിഹാബ് കൊട്ടുകാട് തോമസ് മാത്യുവിന്റെ കുടുംബത്തെ ബന്ധപ്പെട്ട് സക്കീർ ഹുസൈന്റെ മോചനത്തിന് സഹായം തേടി. ഒപ്പം ഉമ്മൻ ചാണ്ടിയുടെ മുന്നിൽ വിഷയം എത്തിച്ച് ഇടപെടലിന് അഭ്യർഥിച്ചു. ഉമ്മൻ ചാണ്ടി തോമസ്​ മാത്യുവി​ന്റെ ഇടവകപള്ളി വികാരിയുടെ സഹായത്തോടെ കുടുംബത്തിന്റെ മാപ്പ് ലഭ്യമാക്കാൻ ശ്രമം തുടങ്ങി. മോചനദ്രവ്യമായി ഒരു തുക കുടുംബത്തിന് നൽകാനും ഉമ്മൻ ചാണ്ടി മുൻകൈയെടുത്തു.

മാപ്പ് നൽകാൻ തയ്യാറായ കുടുംബത്തിന്റെ സമ്മതപത്രം അഡ്വ. സജി സ്​റ്റീഫ​ന്റെ സഹായത്തോടെ ലഭ്യമാക്കി. ശിഹാബ് കൊട്ടുകാട് കുടുംബത്തിന്റെ മാപ്പുസാക്ഷ്യം സൗദിയിൽ കോടതിയിൽ ഹാജരാക്കി. 2020ലായിരുന്നു ഇത്. തുടർന്ന് കോടതി വധശിക്ഷ ഒഴിവാക്കി. എന്നാൽ പൊതുഅവകാശപ്രകാരമുള്ള തടവുശിക്ഷ പൂർത്തിയാകാനാണ് കാത്തിരുന്നത്.​ ശേഷം നടപടിക്രമങ്ങൾ പൂർത്തിയാക്കിയാണ്​ വ്യാഴാഴ്​ച സക്കീർ നാട്ടിലേക്ക്​ മടങ്ങിയത്​. പാസ്​പോർട്ട്​ കാലാവധി കഴിഞ്ഞതിനാൽ ഇന്ത്യൻ എംബസ്സി ഔട്ട്​ പാസ്​ നൽകിയിരുന്നു.

സക്കീർഹുസൈനെ നാട്ടിലെത്തിക്കുന്നതുവരെ ശിഹാബ്​ കൊട്ടുകാട്​ നിരവധി തവണയാണ്​ ദമ്മാമിലെ പോലീസ്​ സ്​റ്റേഷനുകളിലും കോടതികളിലും ജയിലിലുമായി കയറിയിറങ്ങിയത്​. ഒരുകൂട്ടം മനുഷ്യസ്​നേഹികളുടെ കൂട്ടായ പരിശ്രമമാണ്​ സക്കീറി​ന്റെ ജീവൻ തിരികെ നൽകിയത്​. തോമസ്​ മാത്യുവി​ന്റെ മാതാവും പിതാവും സഹോദരിയും സഹോദരനുമൊക്കെ ഒരു മനസ്സോടെ മാപ്പു നൽകിയതോടെയാണ്​ സക്കീറി​ന്റെ ജീവിതം തിരികെ കിട്ടിയത്​. റിയാദിലെ സാമൂഹികപ്രവർത്തകൻ സലീം പാറയിലും ദമ്മാം ജയിലിലെ ഉദ്യോഗസ്ഥൻ ബസ്സാമും ആവശ്യമായ സഹായം നൽകി.