രാജ്യം കൊടും ചൂടിൽ

ജിദ്ദ: രാജ്യം കൊടും ചൂടിൽ ചുട്ടുപൊള്ളുന്നു. കിഴക്കൻ പ്രവി​ശ്യയിലെ ചില ഭാഗങ്ങളിൽ ഇന്നലെ ചൂട്​ 50 ഡിഗ്രിക്ക്​ മുകളിൽ രേഖപ്പെടുത്തിയതായി കാലാവസ്​ഥാവിഭാഗം അറിയിച്ചു. ഇത്​ അടുത്ത ആഴ്​ചയിലും തുടരുമെന്നാണ്​ സൂചന. റിയാദിൽ 48 ഡിഗ്രിയാണ്​ ഇന്നലെ രേഖപ്പെടുത്തിയ ചൂട്​. മക്ക,മദീന,റിയാദ്​,ഖസീം മേഖലകളിൽ ശക്​തമായ പൊടിക്കാറ്റിന്​ സാധ്യതയുണ്ട്​. അതേ സമയം അസീർ, ജീസാൻ മേഖലകളിൽ ചൂട്​ കുറവാണ്​. കഴിഞ്ഞ ദിവസങ്ങളിൽ അസീറിൽ ആലിപ്പഴവർഷവും മഴയും ലഭിച്ചു. ത്വാഇഫിലും പൊതുവെ ചൂട്​ കുറവാണ്​. ജിദ്ദ നഗരത്തിൽ ശക്​തമായ ചൂടുണ്ട്​.പകൽ സമയങ്ങളിൽ പുറത്തിറങ്ങാനാവാത്ത വിധത്തിലുള്ള ചൂട്​ ജിദ്ദയിലുമനുഭവപ്പെടുന്നുണ്ട്​. നിർജ്ജലീകരണത്തിന്​ സാധ്യതയുള്ളതിനാൽ ധാരാളം വെള്ളം കുടിക്കണമെന്ന്​ ആരോഗ്യവിദഗ്​ധർ പറഞ്ഞു. പകൽ സമയങ്ങളിൽ അത്യാവശ്യത്തിനല്ലാതെ പുറത്തിറങ്ങരുത്​. സൂര്യാതപമേൽക്കാനുള്ള സാധ്യത വളരെ കുടുതലാണ്​. തൊഴിലാളികളെ കൊണ്ട്​ ഉച്ചസമയങ്ങളിൽ പു​റംജോലി ചെയ്യി​ക്കരുതെന്ന്​ അധികൃതർ കർശന നിർദേശം നൽകിയിട്ടുണ്ട്​.

രാജ്യത്തെ ചില മേഖലകളിൽ വരും ദിവസങ്ങളിൽ ചൂട്​ കൂടുമെന്ന്​ കാലാവസ്​ഥ വിഭാഗം കഴിഞ്ഞ ആഴ്​ച പ്രവചിച്ചിരുന്നു.  ഇൗയാഴ്​ച മുതൽ 45^ 50 ഡിഗ്രിക്കിടയിൽ ചൂട്​ വർധിക്കുമെന്നായിരുന്നു അറിയിച്ചത്​. വെള്ളം കൂടുതൽ കുടിക്കാനും വാഹനങ്ങൾക്കുള്ളിൽ ഗ്യാസ്​ അടങ്ങിയ വസ്​തുക്കൾ വെക്കരുതെന്നും ഇന്ധനം ഫുൾടാങ്ക്​ നിറക്കരുതെന്നും  അധികൃതർ മുന്നറിയിപ്പ്​ നൽകിയിട്ടുണ്ട്​. വൈദ്യുതി ലോഡ്​ വർധിച്ചുണ്ടാവുന്ന അപകടങ്ങൾ ഒഴിവാക്കാൻ ശ്രദ്ധിക്കണമെന്ന്​ സ്വദേശികളോടും വിദേശികളോടും റിയാദ്​ മേഖല സിവിൽ ഡിഫൻസ്​ ഡയറക്ടറേറ്റ്​ ആവശ്യപ്പെട്ടിട്ടുണ്ട്​. സുരക്ഷ നിർദേ​ശങ്ങൾ മുഴുവനാളുകളും പാലിക്കണമെന്ന്​ റിയാദ്​ മേഖല സിവിൽ ഡിഫൻസ്​ വക്​താവ്​ കേണൽ മുഹമ്മദ്​ അൽഹമാദി പറഞ്ഞു. വൈദ്യുതി ഉപകരണങ്ങൾ കുറ്റമറ്റതാണെന്ന്​ ഉറപ്പുവരുത്തണം. ഒരു പോയിൻറിൽ  നിന്ന്​ കൂടുതൽ കണക്​ഷനെടുക്കരുത്​. ഇത്​​  ലോഡ്​ കൂടാൻ കാരണമാകും.

തുടർച്ചയായി ഫാനുകളും മറ്റ്​ ഉപകരണങ്ങളും പ്രവർത്തിക്കുന്നത്​​ കേബിൾ​ ചൂടാകാനും അഗ്​നിബാധയുണ്ടാകാനും കാരണമായേക്കും.  ആവശ്യമില്ലാതെ എയർകണ്ടീഷനറുകൾ പ്രവർത്തിപ്പിക്കരുതെന്നും സിവിൽ ഡിഫൻസ്​ വക്​താവ്​ നിർദേശിച്ചിട്ടുണ്ട്​.​. ഉറങ്ങുന്നതിനു മുമ്പ്​ ചാർജ്​​ ചെയ്യാനിട്ട ഉപകരണങ്ങൾ കണക്​ഷനിൽ നിന്ന്​ വേർപ്പെടുത്തണം. വീടുകളിൽ ഫയർ എക്​സിറ്റിങ്​ക്യൂഷർ, അലാറം തുടങ്ങിയ സംവിധാനങ്ങൾ ഒരുക്കണം.അടിയന്തിര ഘട്ടങ്ങളിൽ ചെയ്യേണ്ട കാര്യങ്ങൾ കുട്ടികളെ പഠിപ്പിക്കണം. യാത്ര പുറപ്പെടുന്നതിനു മുമ്പ്​ വാഹനങ്ങൾ പരിശോധിക്കണം. വാഹനം കൂടുതൽ ഹീറ്റാകുന്നത്​ തീ പിടിക്കാൻ കാരണമാകും. തീ പിടിക്കാൻ സാധ്യതയുള്ള സാധനങ്ങൾ വാഹനങ്ങളിൽ വെക്കരുത്​. വീട്ടിൽ നിന്ന്​ പുറത്തു പോകു​േമ്പാൾ പ്രത്യേകിച്ച്​ യാത്ര പോകു​േമ്പാൾ ഗ്യാസ്​ സിലിണ്ടർ, ഇലക്​ട്രിക്ക്​ ഉപകരണങ്ങൾ എന്നിവ ഒാഫ്​ ചെയ്​തിട്ടുണ്ടെന്ന്​ ഉറപ്പുവരുത്തണം.