ഇന്ത്യൻ ഫുട്​ബാൾ ഫെഡറേഷന്​ വിരുന്നൊരുക്കി സൗദി ഫുട്​ബാൾ ഫെഡറേഷൻ

റിയാദ്‌: സൗദി സന്ദർശനത്തിനെത്തിയ ആൾ ഇന്ത്യ ഫുട്​ബാൾ ഫെഡറേഷൻ ഭാരവാഹികൾക്ക്​ സൗദി ഫുട്​ബാൾ ഫെഡറേഷൻ ഹൃദ്യമായ വിരുന്നൊരുക്കി. ഫൈനൽ മത്സരത്തിന് ശേഷം നടന്ന ചടങ്ങിൽ സൗദി ഫുട്​ബാൾ ഫെഡറേഷൻ പ്രസിഡൻറ്​ യാസിർ അൽ മിസ്​ഹൽ സംസാരിച്ചു. ഇന്ത്യൻ ഫുട്ബളി​െൻറ വളർച്ചക്കും ഉന്നതിക്കും തങ്ങളുടെ എല്ലാവിധ സഹകരണവും പിന്തുണയും വാഗ്ദാനം ചെയ്യുന്നതായി അദ്ദേഹം പറഞ്ഞു.

ഇത് പ്രവാസികളായ ഇന്ത്യക്കാരെ സംബന്ധിച്ചിടത്തോളം വലിയൊരു അച്ചീവ്മെൻറ്​ ആണെന്നും ഇത് ചരിത്രത്തിൽ രേഖപ്പെടുമെന്നും ഇന്ത്യൻ അംബാസഡർ ഡോ. സുഹൈൽ അജാസ് ഖാൻ പറഞ്ഞു. രണ്ട് ഫുട്​ബാൾ ഫെഡറേഷനുകളെയും അഭിനന്ദിക്കുകയും ഭാവി പരിപാടികൾക്ക് എംബസിയുടെ ഭാഗത്ത് നിന്നുള്ള സഹകരണം ഉറപ്പു നൽകുകയും ചെയ്തു. സഹോദര്യത്തി​െൻറയും സ്നേഹത്തി​െൻറയും ഊഷ്മളമേറിയ സ്വീകരണമാണ് സൗദിയിൽ നിന്നും ലഭിച്ചതെന്ന് ആൾ ഇന്ത്യ ഫുട്​ബാൾ ഫെഡറേഷൻ പ്രസിഡൻറ്​ കല്യാൺ ചൗബെ പറഞ്ഞു. ഇരുവരും സൗദി ഭരണാധികാരികൾക്കും സൗദി ഫുട്​ബാൾ ഫെഡറേഷൻ ഭാരവാഹികൾക്കും നന്ദി രേഖപ്പെടുത്തി.

86-ാമത്​ സന്തോഷ്​ ട്രോഫി സെമി, ഫൈനൽ മത്സരങ്ങൾ നടത്തിപ്പിനാണ്​ ​ആൾ ഇന്ത്യ ഫുട്​ബാൾ ഫെഡറേഷൻ ഭാരവാഹികൾ സൗദിയിലെത്തിയത്​. ഈ മാസം ഒന്നിനും നാലിനുമാണ്​ റിയാദ് കിങ്​ ഫഹദ്​ ഇൻറർനാഷനൽ സ്​റ്റേഡിയത്തിൽ സെമി ഫൈനൽ, ഫൈനൽ മത്സരങ്ങൾ നടന്നത്​. മേഘാലയയുമായി ഫൈനലിൽ ഏറ്റുമുട്ടി ജേതാക്കളായ കർണാടക 86-ാമത് സന്തോഷ് ട്രോഫി കിരീടം കിങ്​ ഫഹദ് സ്​റ്റേഡിയത്തിൽ പ്രൗഢവും വർണാഭവുമായ ചടങ്ങിൽ വെച്ച് ഏറ്റുവാങ്ങി.

ചരിത്രത്തിലാദ്യമായി ഫൈനലിലെത്തിയ മേഘാലയയെ രണ്ടിനെതിരെ മൂന്ന് ഗോളുകൾക്കാണ് കർണാടക പരാജയപ്പെടുത്തിയത്. 54 വർഷത്തെ ഇടവേളക്ക് ശേഷമാണ് കർണാടക വിജയകിരീടം ചൂടുന്നത്. കർണാടക എന്ന പേരിൽ സംസ്ഥാനം നിലവിൽവന്ന ശേഷം ആദ്യമായിട്ടാണ് ഈ ട്രോഫി ലഭിക്കുന്നത്. സൗദി ഫുട്​ബാൾ ഫെഡറേഷൻ പ്രസിഡൻറ്​ യാസിർ അൽ മിസ്​ഹൽ, ഇന്ത്യൻ ഫുട്​ബാൾ ഫെഡറേഷൻ പ്രസിഡൻറ്​ കല്യാൺ ചൗബേ എന്നിവർ സംയുക്തമായി മെഡലുകളും ട്രോഫിയും ജേതാക്കൾക്ക് സമ്മാനിച്ചു. രണ്ടും മൂന്നും സ്ഥാനങ്ങൾ നേടിയവർക്കുള്ള മെഡലുകളും മികച്ച കളിക്കാർക്കുള്ള കാഷ് പ്രൈസുകളും ഇന്ത്യൻ അംബാസഡർ ഡോ. സുഹൈൽ അജാസ് ഖാൻ, ഇന്ത്യൻ ഫുട്​ബാൾ ഫെഡറേഷൻ വൈസ് പ്രസിഡൻറ്​ എൻ.എ. ഹാരിസ്, സെക്രട്ടറി ഡോ. ഷാജി പ്രഭാകരൻ എന്നിവർ വിതരണം ചെയ്തു. സൗദി ഇന്ത്യൻ ഫുട്​ബാൾ ഫെഡറേഷൻ ഭാരവാഹികൾ, കർണാടക ഫുട്​ബാൾ ഫെഡറേഷൻ പ്രസിഡൻറ്​ എൻ.എ. ഹാരിസ്, ഇന്ത്യൻ എംബസി ഉദ്യോഗസ്ഥർ എന്നിവർ സന്നിഹിതരായിരുന്നു.

സൗദി ഫുട്​ബാൾ ഫെഡറേഷൻ ഒരുക്കിയ വിരുന്ന്​ സൽക്കാരത്തിൽ ഇന്ത്യൻ ഫുട്​ബാൾ ഫെഡറേഷൻ അംഗങ്ങൾക്ക് പുറമെ ഇന്ത്യൻ എംബസി ഉദ്യോഗസ്ഥർ, എംബസി സ്​റ്റിയറിങ്​ കമ്മിറ്റി ചെയർമാൻ മുഹമ്മദ് സൈഗം ഖാൻ, പ്രവാസി ഭാരതീയ പുരസ്‌കാര ജേതാവ് ശിഹാബ് കൊട്ടുകാട്, ഗൾഫ് മാധ്യമം റീജനൽ മാനേജർ സലീം മാഹി, വിവിധ സംസ്​ഥാനങ്ങളെ പ്രതിനിധീകരിച്ച്​ സന്തോഷ് ഷെട്ടി, രവൽ ആൻറണി, അബ്​ദുൽ ജബ്ബാർ, സതീഷ്‌ തുടങ്ങിയവർ പങ്കെടുത്തു.