സൗദി കെ.എം.സി.സി ദേശീയ ഫുട്ബാൾ: ദമ്മാം ബദർ എഫ്.സിക്ക് കിരീടം
text_fieldsസൗദി കെ.എം.സി.സി ദേശീയ ഫുട്ബാൾ ടൂർണമെന്റിൽ ജേതാക്കളായ ദമ്മാം ബദർ എഫ്.സി കിരീടവുമായി
റിയാദ്: പ്രഥമ സൗദി കെ.എം.സി.സി ഫുട്ബാൾ ടൂർണമെന്റിൽ ദമ്മാം ബദർ എഫ്.സിക്ക് കിരീടം. മൂന്ന് മാസമായി സൗദിയുടെ വിവിധ പ്രവിശ്യകളിലായി നടന്ന ടൂർണമെന്റിന്റെഫൈനലിൽ ജിദ്ദയിലെ സബീൻ എഫ്.സി ക്ലബിനെ പരാജയപ്പെടുത്തിയാണ് ബദർ എഫ്.സി സൗദിയിലെ മികച്ച പ്രവാസി ക്ലബുകളുടെ പട്ടികയിൽ ഇടം നേടിയത്. റിയാദ് മലസിലെ റയൽ മഡ്രിഡ് സ്റ്റേഡിയത്തിൽ നടന്ന ടൂർണമെന്റിന്റെ ഫൈനൽ കാണാൻ സൗദിയുടെ വിവിധ ഭാഗങ്ങളിൽനിന്ന് ഫുട്ബാൾ പ്രേമികൾ ഒഴുകിയെത്തി.
പാണക്കാട് മുനവ്വറലി ശിഹാബ് തങ്ങൾ, അഡ്വ. ഹാരിസ് ബീരാൻ എം.പി, കെ.പി. മുഹമ്മദ്കുട്ടി എന്നിവർ മുഖ്യാതിഥികളായിരുന്നു. ഒന്നാം പകുതിയുടെ 29ാം മിനിറ്റിൽ മുഹമ്മദ് അജ്സൽ നേടിയ മനോഹര ഗോളിലൂടെ ബദർ എഫ്.സിയാണ് അക്കൗണ്ട് തുറന്നത്.
ഇരു പകുതികളിലുമായി ഗോൾ മടക്കാൻ പോരാടിയ സബീൻ എഫ്.സിക്ക് മുന്നിൽ ഗോൾ മാത്രം പിറന്നില്ല. രണ്ടാം പകുതിയുടെ 14ാം മിനിറ്റിൽ അജ്സൽ നൽകിയ മനോഹര പാസ് ഹാദിയുടെ ബൂട്ടിലൂടെ ജിദ്ദയുടെ ഗോളിയെയും മറികടന്ന് വലകുലുക്കിയപ്പോൾ ബദർ എഫ്.സി വിജയം ഉറപ്പാക്കി.
കളിയിലുടനീളം മികച്ച മുന്നേറ്റങ്ങൾ നടത്തിയ ബദർ എഫ്.സിയുടെ മുഹമ്മദ് അജ്സലിനെ മാൻ ഓഫ് ദി മാച്ച് പുരസ്കാരത്തിന് തിരഞ്ഞെടുത്തു. ടൂർണമെൻറിലെ ടോപ് സ്കോററായി സബീൻ എഫ്.സിയുടെ ഫസലുറഹ്മാനെയും ബെസ്റ്റ് ഗോൾ കീപ്പറായി ബദർ എഫ്.സിയുടെ മുഹമ്മദ് സാദിഖിനെയും മികച്ച ഡിഫൻഡറായി സബീൻ എഫ്.സിയുടെ അൻസിൽ റഹ്മാനെയും മികച്ച പ്ലയറായി ബദ്ർ എഫ്.സിയുടെ ഹസ്സനെയും തിരഞ്ഞെടുത്തു.
വൈകീട്ട് 5.30ന് ആരംഭിച്ച വർണശബളമായ ഘോഷയാത്ര സ്റ്റേഡിയത്തിലേക്ക് ഒഴുകിയെത്തിയ ജനങ്ങൾക്ക് അവിസ്മരണീയമായ കാഴ്ചകളാണ് സമ്മാനിച്ചത്. നാഷനൽ കമ്മിറ്റിക്ക് കീഴിലുള്ള 40ഓളം സെൻട്രൽ കമ്മിറ്റികളുടെ വിവിധ കലാപരിപാടികൾ അടങ്ങിയ ഇനങ്ങൾ കാണികൾക്ക് ഇമ്പമേകി. നേരത്തെ റിയാദ്, ജിദ്ദ, യാംബു, ദമ്മാം തുടങ്ങിയ നഗരങ്ങളിലാണ് നാഷനൽ സോക്കർ മത്സരങ്ങൾ അരങ്ങേറിയത്.
സോക്കറിനോടനുബന്ധിച്ച് മികച്ച ഫുട്ബാൾ സംഘാടകനുള്ള എൻജി. സി. ഹാഷിം മെമ്മോറിയൽ അവാർഡ് ദമ്മാം ഇന്ത്യൻ ഫുട്ബാൾ പ്രസിഡൻറ് സമീർ കൊടിയത്തൂരിനും 2024ലെ ശിഹാബ് തങ്ങൾ ബിസിനസ് എക്സലൻസി അവാർഡ് വിജയ് വർഗീസ് മൂലനും പാണക്കാട് മുനവ്വറലി ശിഹാബ് തങ്ങൾ സമ്മാനിച്ചു.
പ്രഥമ കെ.എം.സി.സി ദേശീയ ഫുട്ബാൾ ടൂർണമെന്റിന്റെ അണിയറ ശിൽപികളായ മുജീബ് ഉപ്പട, ഉസ്മാനലി പാലത്തിങ്ങൽ എന്നിവർക്കുള്ള ഉപഹാരവും തങ്ങൾ കൈമാറി. അലി ഖഹ്താനിയുടെ നേതൃത്വത്തിലുള്ള അമ്പയർ പാനൽ മത്സരത്തിന് നേതൃത്വം നൽകി. സമാപന പരിപാടിയിൽ നാഷനൽ കമ്മിറ്റി പ്രസിഡൻറ് കുഞ്ഞുമോൻ കാക്കിയ അധ്യക്ഷത വഹിച്ചു. മുനവ്വറലി ശിഹാബ് തങ്ങൾ ഉദ്ഘാടനം ചെയ്തു.
റിയാദ് സെൻട്രൽ കമ്മിറ്റി പ്രസിഡൻറ് സി.പി. മുസ്തഫ ആമുഖഭാഷണം നടത്തി. ടൂർണമെന്റുമായി സഹകരിച്ച സ്ഥാപനങ്ങൾക്കുള്ള ഉപഹാരങ്ങൾ അഡ്വ. ഹാരിസ് ബീരാൻ എം.പി കൈമാറി. കെ.എം.സി.സി നേതാക്കളായ കെ.പി. മുഹമ്മദ് കുട്ടി, ഖാദർ ചെങ്കള, അഹമ്മദ് പാളയാട്ട്, ബഷീർ മൂന്നിയൂർ, വി.കെ. മുഹമ്മദ്, കരീം താമരശ്ശേരി.
സുലൈമാൻ മാളിയേക്കൽ, മുഹമ്മദ് സാലി നാലകത്ത്, ഉസ്മാനലി പാലത്തിങ്ങൽ, ആലിക്കുട്ടി ഒളവട്ടൂർ, ഹാരിസ് കല്ലായി, ഫൈസൽ ബാബു, നാസർ എടവനക്കാട്, അബൂബക്കർ അരിമ്പ്ര, മുഹമ്മദ് കുട്ടി കോഡൂർ, ബഷീർ ചേലേമ്പ്ര, സമീർ കൊടിയത്തൂർ, ഡൽഹി കെ.എം.സി.സി ജനറൽ സെക്രട്ടറി ഹലിം എന്നിവർ സംസാരിച്ചു. ജനറൽ സെക്രട്ടറി അഷ്റഫ് വേങ്ങാട്ട് സ്വാഗതവും സ്പോർട്സ് സമിതി കൺവീനർ മുജീബ് ഉപ്പട നന്ദിയും പറഞ്ഞു.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.