ഹൂതികളുടെ ഭീകര​തക്കെതിരെ ശക്തമായി പ്രതികരിക്കുമെന്ന്​ സൗദി

ജിദ്ദ: ഭീകരത നിറഞ്ഞ ഹൂതികളുടെ എല്ലാ പ്രവൃത്തികളോടും ശക്തമായി പ്രതികരിക്കുമെന്ന് സൗദി അറേബ്യ. യമനിലെ വിമത സായുധസംഘമായ ഹൂതികൾ അയൽ രാജ്യങ്ങളിലെ നിരപരാധികളായ ജനങ്ങളെയും അവരുടെ വസ്തുക്കളെയും രാജ്യങ്ങളിലെ സുപ്രധാന സ്ഥാപനങ്ങളെയും ലക്ഷ്യമിടുകയാണ്​. കൂടാതെ തദ്ദേശീയവും അന്തർദേശീയവുമായ സമാധാനത്തിനും സുരക്ഷയ്ക്കും ഭീഷണി സൃഷ്ടിക്കുന്നു. ഹൂതികളുടെ നിരവധി ഭീകരാക്രമണങ്ങൾക്ക് രാജ്യം വിധേയമായിട്ടുണ്ടെന്ന്​ സൗദി വി​ദേശകാര്യ മന്ത്രാലയം വ്യക്തമാക്കി.

സ്​ഫോടക വസ്​തുക്കൾ ഘടിപ്പിച്ച ഡ്രോണുകൾ ഉപയോഗിച്ച് ബോധപൂർവവും സുസംഘടിതവുമായ രീതിയിൽ നിരവധി ആ​​ക്രമണ ശ്രമങ്ങൾ ഹൂതി ഭീകരരിൽ നിന്നുണ്ടായി. എന്നാൽ ലക്ഷ്യം തൊടുന്നതിന്​ മുമ്പ്​ തന്നെ അവയെ നേരിടുന്നതിൽ സഖ്യസേന ഓരോ തവണയും വിജയം വരിച്ചു. രണ്ട് സാമ്പത്തിക സ്ഥാപനങ്ങൾ ലക്ഷ്യമിട്ട് യു.എ.ഇക്ക്​ നേരെ നടന്ന ആക്രമണം ഹീനവും ശത്രുതാപരവുമാണ്​. അബുദാബി അന്താരാഷ്​ട്ര വിമാനത്താവളം ലക്ഷ്യമാക്കി മൂന്ന് ഡ്രോണുകൾ ഉപയോഗിച്ച് നടത്തിയ ആക്രമണം സാധാരണക്കാരായ നിരപരാധികളുടെ മരണത്തിനും നിരവധിയാളുകൾക്ക്​ പരിക്കേൽക്കുന്നതിനും ഇടയാക്കി. ഇറാൻ പിന്തുണയുള്ള ഹൂതി എന്ന ഭീകര സംഘടനയാണ്​​ ഇതിന്​ പിന്നിലെന്ന്​ സ്ഥിരീകരിച്ചതാണ്​. സൗദിക്കും യു.എ.ഇക്കും നേരെയുള്ള എല്ലാ ആക്രമണാത്മക സമീപനങ്ങളെയും തള്ളിക്കക്കുകയും ഭീകരാക്രമണങ്ങളെ അപലപിക്കുകയും ചെയ്യുന്നതായി സൗദി വിദേശകാര്യ മന്ത്രാലയം വ്യക്തമാക്കി.

യമനിൽ നാശം വിതയ്ക്കുകയും അവിടുത്തെ സാധാരണക്കാരും നിരപരാധികളുമായ ജനതയെ കൊല്ലുകയും ചെയ്ത തിന്മയുടെയും ഭീകരതയുടെയും ശക്തികളാണ്​ ഹൂതികൾ. മേഖലയുടെ സുരക്ഷയും സുസ്ഥിരതയും ഇല്ലാതാക്കുക എന്ന ലക്ഷ്യത്തോടെ ഭീകരപ്രവർത്തനങ്ങൾ പ്രചരിപ്പിച്ചുകൊണ്ടിരിക്കുകയാണ്​. യമനിലെ എല്ലാ പാർട്ടികളെയും ഒരുമിച്ച് കൊണ്ടുവരുന്ന സമഗ്രമായ ഒരു രാഷ്ട്രീയ പരിഹാരത്തിലേക്ക് എത്താൻ നിരവധി രാഷ്ട്രീയ പരിഹാരങ്ങൾ അവതരിപ്പിച്ചിട്ടുണ്ട്​. എന്നിട്ടും, സൗദിയിലും യു.എ.ഇയിലും ഭീരുത്വം നിറഞ്ഞ ആക്രമണം നടത്താൻ ഹൂതി ശ്രമം തുടരുകയാണ്​.

അന്താരാഷ്ട്ര കപ്പൽ ചാലുകൾ ലക്ഷ്യമാക്കി മാനുഷിക സഹായം തടസ്സപ്പെടുത്തുകയാണ്​. എല്ലാ അന്താരാഷ്ട്ര നിയമങ്ങളുടെയും മാനദണ്ഡങ്ങളുടെയും നഗ്​നമായ ലംഘനം തുടരുകയാണെന്നും മ​ന്ത്രാലയം കുറ്റപ്പെടുത്തി. സൗദിക്കും സഹോദര രാജ്യമായ യു.എ.ഇക്കും​ നേരെ നടത്തുന്ന ആക്രമണങ്ങൾ ഗൾഫ്​ മേഖലയിൽ കരുതിക്കൂട്ടി അസ്ഥിരതയും അരക്ഷിതാവസ്ഥയും സൃഷ്ടിക്കാനുള്ള ഹൂതികളുടെ ശ്രമമാണെന്ന് സൗദി വിദേശകാര്യമന്ത്രി അമീർ ഫൈസൽ ബിൻ ഫർഹാൻ പ്രസ്താവിച്ചു.

സുരക്ഷയുടെയും സ്ഥിരതയുടെയും അന്തരീക്ഷത്തിന്​ വൻ ഭീഷണിയായി ഹൂതികൾ മാറുകയാണെന്നും ട്വിറ്ററിൽ അദ്ദേഹം കുറിച്ചു. സൗദിയും സഖ്യരാജ്യങ്ങളും ചേർന്ന്​ അന്തർദേശീയ തലത്തിൽ തന്നെ യമനിൽ സമാധാനം കൊണ്ടുവരുന്നതിനുള്ള ശ്രമങ്ങൾ തുടരുകയാണ്​. യമൻ പ്രതിസന്ധിക്ക്​ സൗദി തന്നെ മുൻകൈയെടുത്ത്​ കണ്ടെത്തിയ രാഷ്ട്രീയ പരിഹാരം മേശപ്പുറത്തിരിക്കുകയാണ്​. അത്​ പ്രായോഗികമാക്കുന്നതിനുള്ള എല്ലാ തയാറെടുപ്പുകളും തങ്ങൾ പൂർത്തിയാക്കിയിരിക്കുകയാണെന്നും മന്ത്രി പറഞ്ഞു.

അതേസമയം ഹൂതികളു​ടെ മര്‍ക്കടമുഷ്‌ടി നിറഞ്ഞ സമീപനങ്ങളെ കൈകാര്യം ചെയ്യാനും അവരുടെ ഹീന നീക്കങ്ങളെ സൗദിയുടെയും ഗൾഫ്​ മേഖലയുടെയും സുരക്ഷക്കായി ശക്തമായി പ്രതിരോധിക്കാനും തങ്ങൾ സദാ സന്നദ്ധമായിരിക്കുകയാണെന്നും മന്ത്രി കൂട്ടിച്ചേർത്തു.