സൗദിയുടെ സുരക്ഷ അമേരിക്കക്ക്​ പരമപ്രധാനം -സ്​റ്റേറ്റ്​ സെക്രട്ടറി

റിയാദ്​: സൗദി അറേബ്യയുടെ സുരക്ഷ അമേരിക്കക്ക്​ പരമപ്രധാനമാണെന്ന്​ സ്​റ്റേറ്റ്​ സെക്രട്ടറി മൈക്​ പോംപി. തീവ്രവാദത്തിനെതിരായ സൗദിയുടെ പോരാട്ടത്തിൽ അമേരിക്ക ഒപ്പം നിൽക്കും. വിഷൻ 2030 വഴി സൗദി അറേബ്യ സൃഷ്​ടിക്കുന്ന നേട്ടങ്ങളിൽ തങ്ങളും പ്രചോദിതരാണെന്നും അദ്ദേഹം പറഞ്ഞു. സ്​ഥാനാരോഹണത്തിന്​ ശേഷമുള്ള ത​​​െൻറ ആദ്യ വിദേശപര്യടനത്തിന്​ സൗദിയിലെത്തിയ പോംപി, വിദേശകാര്യമന്ത്രി ആദിൽ ജുബൈറുമൊത്ത്​ റിയാദിൽ സംയുക്​ത വാർത്ത സമ്മേളനം നടത്തുകയായിരുന്നു. 
ഇറാനെ തടയാൻ നിലവിലെ ആണവകരാർ പര്യാപ്​തമല്ല. കരാർ ഒപ്പിടലിന്​ ശേഷം ഇറാ​​​െൻറ നീക്കങ്ങൾ കൂടുതൽ മോശമാകുകയായിരുന്നു. ഭീകരവാദത്തി​​​െൻറ ഏറ്റവും വലിയ പ്രായോജകരാണ്​ അവർ. യമനിലെ ഹൂതികൾക്ക്​ ആയുധങ്ങൾ നൽകി മേഖലയെ അസ്​ഥിരപ്പെടുത്താൻ അവർ ശ്രമിച്ചുകൊണ്ടേയിരിക്കുന്നു. ^ മൈക്​ പോംപി പറഞ്ഞു. 
ഇറാനുമേൽ കൂടുതൽ നിയ​ന്ത്രണങ്ങൾ കൊണ്ടുവരേണ്ടതുണ്ടെന്ന്​ സൗദി വിദേശകാര്യമന്ത്രി ആദിൽ ജുബൈർ പറഞ്ഞു. ഹൂതികൾക്ക്​ ആയുധങ്ങൾ നൽകി അന്താരാഷ്​ട്ര നിയമങ്ങൾ അവർ നിരന്തരം ലംഘിച്ചുവരികയാണ്​. അമേരിക്കൻ പ്രസിഡൻറ്​ ഡോണൾഡ്​ ട്രംപി​​​െൻറ ഇറാൻ നയത്തിന്​ എല്ലാ പിന്തുണയും ഞങ്ങൾ നൽകും. ആണവകരാർ വിഷയത്തിൽ പ്രത്യേകിച്ചും. ^ ആദിൽ ജുബൈർ പറഞ്ഞു. യമനിൽ രാഷ്​ട്രീയ പരിഹാരം കണ്ടെത്തുന്നതിനുള്ള മാർഗങ്ങളെ കുറിച്ചും ഇരുവരും ചർച്ച നടത്തി. സൗദിക്ക്​​ പിന്നാലെ ജോർഡനും ഇസ്രയേലും മൈക്​ പോംപി സന്ദർശിക്കുന്നുണ്ട്​.