സൗദിയിൽ ഇന്ന്​ ആറ്​ വിദേശികളും ഒരു സ്വദേശിയും മരിച്ചു; 392 പേർ സുഖം പ്രാപിച്ചു 

റിയാദ്​: വെള്ളിയാഴ്​ച സൗദി അറേബ്യയിൽ കോവിഡ്​ ബാധിച്ച്​ ആറ്​ വിദേശികളും ഒരു സ്വദേശിയും മരിച്ചു. ജിദ്ദയിലാണ്​ നാലു പേർ മരിച്ചത്​. മക്കയിൽ മുന്നുപേരും. 46നും 75നും ഇടയിൽ പ്രായമുള്ളവരാണ്​ മരിച്ചവർ. പുതുതായി 1344 പേരിൽ രോഗബാധ കണ്ടെത്തി. ഇതോടെ രാജ്യത്താകെ റിപ്പോർട്ട്​ ചെയ്യപ്പെട്ട കോവിഡ്​ ബാധിതരുടെ എണ്ണം 24097 ആയി. 

പുതിയ രോഗികളിൽ 17 ശതമാനം സ്വദേശികളും 83 ശതമാനം വിദേശികളുമാണ്​. കഴിഞ്ഞ 24 മണിക്കൂറിനിടെ 392 പേർ സുഖം പ്രാപിച്ചു. ഒരു ദിവസം ഇത്രയധികം പേർ സുഖം പ്രാപിക്കുന്നത്​ ആദ്യമായാണെന്നും രോഗമുക്തരുടെ എണ്ണം 3555 ആയി ഉയ​ർന്നെന്നും ആരോഗ്യമന്ത്രാലയ വക്താവ്​ ഡോ. മുഹമ്മദ്​ അബ്​ദു അൽഅലി വാർത്താസമ്മേളനത്തിൽ പറഞ്ഞു. 

ചികിത്സയിൽ കഴിയുന്ന 20373 ആളുകളിൽ 117 പേർ ഗുരുതരാവസ്ഥയിൽ തീവ്രപരിചരണ വിഭാഗത്തിലാണ്​. രോഗികളെ കണ്ടെത്താൻ ആരോഗ്യ വകുപ്പ്​ രാജ്യവ്യാപകമായി നടത്തുന്ന ഫീൽഡ്​ സർവേ 15ാം ദിവസത്തിലെത്തി. വീടുകളിലും മറ്റ്​ താമസകേന്ദ്രങ്ങളിലും ചെന്നുള്ള മെഡിക്കൽ ടീമി​​െൻറ പരിശോധന തുടരുകയാണ്​. നാലുപേർ കൂടി മരിച്ചതോടെ ജിദ്ദയിൽ മരണസംഖ്യ 41 ആയി. മൂന്നുപേരുടെ കൂടി മരണത്തോടെ മക്കയിൽ 72 ആയി.

പുതിയ രോഗികൾ: റിയാദ്​ 228, മദീന 237, മക്ക 207, ജുബൈൽ 171, ജിദ്ദ 124, ദമ്മാം 114, ബേഷ്​ 37, ഖോബാർ 33, ത്വാഇഫ്​ 27, ദറഇയ 14, ഹുഫൂഫ്​ 12, ബുറൈദ 12, നാരിയ 9, യാംബു 9, തബൂക്ക്​ 7, സുൽഫി 6, മഖ്​വ 5, മുസാഹ്​മിയ 5, റാസതനൂറ 3, അൽഖർജ്​ 3, അബ്​ഖൈഖ്​ 2, ഹാഇൽ 2, ബൽജുറഷി 1, ഖുൻഫുദ 1, അറാർ 1, റഫ്​ഹ 1, സാജർ 1

മരണസംഖ്യ: മക്ക 72, ജിദ്ദ 41, മദീന 32, റിയാദ്​ 7, ഹുഫൂഫ്​ 4, ദമ്മാം 3, ജുബൈൽ 2, അൽഖോബാർ 2, ജീസാൻ 1, ഖത്വീഫ് 1​, ഖമീസ്​ മുശൈത്ത് 1​, ബുറൈദ 1, അൽബദാഇ 1, തബൂക്ക്​  1.