ത്വാഇഫ്​ മരുഭൂമിയിൽ ശക്തമായ​ ചുഴലിക്കാറ്റ്​

ത്വാഇഫ്​: ത്വാഇഫ്​ മരുഭൂമിയിൽ കാഴ്ചക്കാരിൽ അമ്പരപ്പുളവാക്കും വിധം ശക്തമായ​ ചുഴലിക്കാറ്റ് വീശി.​ നഗരത്തിന്​ വടക്കുള്ള ഹിജ്​ൻ പാലത്തിന്​ കിഴക്ക്​ അൽഅസ്​ബ്​ ഭാഗത്തെ മരുഭൂമിയിലാണ്​​ അപൂർവ പ്രതിഭാസമായി ചുഴലിക്കാറ്റ് ആഞ്ഞടിച്ചതെന്നാണ്​ റിപ്പോർട്ട്​. ഇത്​​ പ്രദേശവാസികളെ ഭീതിയിലാഴ്ത്തിയിട്ടുണ്ട്​. ചുഴലിക്കാറ്റി​ന്‍റെ വീഡിയോ സൗദി ട്വിറ്ററാറ്റികൾ പങ്കുവെച്ചിട്ടുണ്ട്​. എന്നാൽ​ ഇത്​ സാധാരണ ചുഴലിക്കാറ്റാണെന്നും എപ്പോഴും​​ ആവർത്തിക്കില്ലെന്നും കാലാവസ്ഥ കേന്ദ്രം വക്താവ്​ വ്യക്തമാക്കി.

ത്വാഇഫിലെ മരുഭൂമിയിലുണ്ടായ ചുഴലിക്കാറ്റിന്‍റെ വിഡിയോ സമൂഹ മാധ്യമങ്ങളിൽ പ്രചരിച്ചതിനെ തുടർന്നാണ്​ കാലാവസ്ഥ കേന്ദ്രത്തിന്‍റെ വിശദീകരണം. ത്വാഇഫ്​ ഗവർണറേറ്റിലെ അന്തരീക്ഷത്തിലൊരു പ്രതിഭാസം ഉണ്ടായിട്ടുണ്ട്​. അത്​ ചുഴലിക്കാറ്റായി മാറിയതാണ്​. ഇത് പലപ്പോഴും ശക്തമായ ഇടിമിന്നലുമായി ബന്ധപ്പെട്ടിരിക്കുന്നു. ഇടുങ്ങിയ പരിധിക്കുള്ളിലും പരിമിതമായ കാലയളവിലുമാണ്​ ഇത്​ സംഭവിക്കുന്നത്. മുൻ വർഷങ്ങളിൽ ഈ സാഹചര്യം ആവർത്തിക്കുന്നത് കേന്ദ്രം നിരീക്ഷിച്ചിരുന്നതായും വക്താവ്​ പറഞ്ഞു. ഇങ്ങനെ കാറ്റ്​ വീശാൻ സാധ്യതയുള്ള സ്ഥലങ്ങളിലേക്ക്​ ആരും പോകരുത്​. ഇത്തരം സന്ദർഭങ്ങളിൽ ആവശ്യമായ മുൻകരുതൽ എടുക്കണമെന്നും ശ്രദ്ധയിൽപ്പെട്ടാൽ കാലാവസ്ഥ കേന്ദ്രത്തെ അറിയിക്കണമെന്നും വക്താവ്​ ഉപദേശിച്ചു.