വിമാനം തെറ്റി റിയാദ്​ എയർപോർട്ടിൽ കുടുങ്ങി സുരേഷ്​; ഡൽഹി എയർപോർട്ടിൽ വീട്ടുകാർ കാത്തിരുന്നത്​ ഒരാഴ്​ച

റിയാദ്​: ലഗേജെത്തിയിട്ടും ആളെത്താത്ത ആധിയിൽ ഡൽഹി എയർപോർട്ടിൽ വീട്ടുകാർ ഒരാഴ്​ച കാത്തിരുന്നപ്പോൾ റിയാദ്​ എയ​ർപോർട്ടിൽ വിമാനത്തിലേക്കുള്ള വഴി​ കാണാതെ കുടുങ്ങി കഴിയുകയായിരുന്നു യു.പി മഹരാജ്​ ഗഞ്ച്​ സ്വദേശി സുരേഷ്​ പസ്വാൻ. ഹാഇലിൽ ആട്ടിടയനായി ജോലി ചെയ്​തിരുന്ന ഇദ്ദേഹത്തെ ആഗസ്​റ്റ്​ 25നാണ്​ തൊഴിലുടമ റിയാദ്​ എയർപോർട്ടിൽ കൊണ്ടാക്കിയത്​. അന്ന്​ രാത്രി 8.40ന്​ ഡൽഹിയിലേക്ക്​ പുറപ്പെടുന്ന നാസ്​ എയർലൈൻസ്​ വിമാനത്തിലായിരുന്നു പോകേണ്ടിയിരുന്നത്.​ ലഗേജ്​ ചെക്കിൻ, എമിഗ്രേഷൻ നടപടികൾ പൂർത്തിയാക്കി മൂന്നാം നമ്പർ​ ടെർമിനലിൽ ഗേറ്റ്​ തുറക്കുന്നതും​ കാത്തിരുന്നു​. എന്നാൽ, അദ്ദേഹമിരുന്ന ഏരിയ മാറിപ്പോയി. ശരിയായ ഗേറ്റ്​ കണ്ടെത്താൻ കഴിഞ്ഞില്ല. അവസാന സമയം വരെ അനൗൺസ്​ ചെയ്​തിട്ടും കാണാത്തിതിനാൽ വിമാനം അതി​െൻറ സമയത്ത്​ പറന്നു.

സുരേഷിനെ സ്വീകരിക്കാൻ കുടുംബാംഗങ്ങൾ ഡൽഹി എയർപോർട്ടിലെത്തിയിരുന്നു. വിമാനം വന്ന്​ സമയമേറെ കഴിഞ്ഞിട്ടും ആളെ കാണാതെ അധികൃതരോട്​ അ​േന്വഷിച്ചപ്പോഴാണ്​ ലഗേജ്​ മാത്രമേ വന്നിട്ടുള്ളൂ ആളെത്തിയിട്ടില്ല എന്ന്​ മനസ്സിലാകുന്നത്​. എത്തുന്ന ഓരോ വിമാനത്തിലും പ്രതീക്ഷയർപ്പിച്ച്​ എയർപോർട്ടിൽ ദിവസങ്ങളോളം കഴിഞ്ഞു. ഫോണിലേക്ക്​ വിളിച്ചുനോക്കിയിരുന്നെങ്കിലും കിട്ടിയില്ല. എന്ത്​ പറ്റിയെന്ന​റിയാതെ ആശങ്കയിലായി ബന്ധുക്കൾ.

ഇതിനിടെ റിയാദ്​ എ​യർപോർട്ടിലെ ഡ്യൂട്ടി മാനേജർ, മലയാളി സാമൂഹികപ്രവർത്തകൻ ശിഹാബ്​ കൊട്ടുകാടിനെ വിളിച്ചുപറഞ്ഞു, ഇന്ത്യാക്കാരനായ ഒരാൾ കുറച്ചുദിവസമായി മൂന്നാം നമ്പർ ടെർമിനലിലുണ്ടെന്ന്​​. മൗനിയാണ്​. ആഹാരം കഴിക്കുന്നില്ല, കുളിക്കുന്നില്ല, വസ്​ത്രം മാറുന്നില്ല, ഒരേയിരിപ്പാണ്​ എന്നെല്ലാം മാനേജർ വിദശീകരിച്ചു. ശിഹാബ്​ ഉടൻ ഇന്ത്യൻ എംബസി കമ്യൂണിറ്റി വെൽഫെയർ സെക്രട്ടറി മൊയിൻ അക്തറിനെ വിവരം അറിയിച്ചു. അവിടെ പോയി നോക്കി വേണ്ടത്​ ചെയ്യാൻ അദ്ദേഹം നിർദേശിച്ചു.

തുടർന്ന്​ ശിഹാബും പാലക്കാട്​ കൂട്ടായ്​മ ഭാരവാഹികളായ കബീർ പട്ടാമ്പി, റഊഫ്​ പട്ടാമ്പി എന്നിവരും എയ​ർപോർട്ടിലെത്തി. അധികൃതരുടെ അനുമതിയോടെ അകത്തു കയറി സുരേഷിനോട്​ സംസാരിച്ചു. എന്നാൽ, മാനസികമായി തകർന്ന അവസ്ഥയിലായിരുന്ന അയാൾക്ക്​ കാര്യമായി​ട്ടൊന്നും സംസാരിക്കാനായില്ല. കൈയിലുള്ള ഫോൺ വാങ്ങി അതിൽനിന്ന്​ അവസാനം വിളിച്ചയാളുടെ നമ്പറെടുത്ത്​​ വിളിച്ചു. ദമ്മാമിൽ ജോലി ചെയ്യുന്ന ബന്ധുവാണ്​ ഫോണെടുത്തത്​​. കുറച്ചുദിവസമായി സുരേഷിനെ കുറിച്ച്​ ഒരു വിവരവുമില്ലാതെ പ്രയാസത്തിലായിരുന്നെന്നും ബന്ധുക്കൾ ഡൽഹി എയർപോർട്ടിൽ കാത്തിരിക്കുകയാണെന്നും അദ്ദേഹം പഞ്ഞു. അദ്ദേഹം നൽകിയ സുരേഷി​െൻറ ഭാര്യയുടെ നമ്പറി​ലേക്ക്​ വിളിച്ച്​ ശിഹാബ്​ വിവരം അറിയിച്ചു. ആൾ ജീവനോടെയുണ്ടെന്നറിഞ്ഞപ്പോൾ അവർക്ക്​ ആശ്വാസമായി.

എത്രയും വേഗം നാട്ടിലെത്തിക്കാനായിരുന്നു പിന്നീടുള്ള ശ്രമം. എംബസി എല്ലാ സഹായവും വാഗ്​ദാനം ചെയ്​തു. ടിക്കറ്റെടുത്ത്​ രണ്ടാം നമ്പർ ടെർമിനലിൽ എത്തിച്ചാൽ നാട്ടിലെത്തിക്കാമെന്ന്​ എയർ ഇന്ത്യ ഉറപ്പ്​ നൽകി. ഇതനുസരിച്ച്​ എയർ ഇന്ത്യയുടെ ടിക്കറ്റ്​ എടുക്കുകയും ചെയ്​തു. ടെർമിനൽ ഷിഫ്​റ്റിങ്ങിന്​ എയർപോർട്ട്​ അധികൃതരും തയാറായി. ആറേഴ്​ ദിവസമായി ഒരേ വസ്​ത്രം ധരിച്ചിരുന്നതിനാൽ മുഷിഞ്ഞിരുന്നു. മാറാൻ വേറെ വസ്​ത്രങ്ങളൊന്നും കൈവശമില്ലായിരുന്നു. പാസ്​പോർട്ട്​ അല്ലാതെ മറ്റൊന്നുമുണ്ടായിരുന്നില്ല. ശിഹാബും സംഘവും പുറത്തുപോയി പുതിയ വസ്​ത്രങ്ങൾ വാങ്ങിക്കൊണ്ടുവന്നു. എന്നാൽ, വസ്​ത്രം മാറാനോ ഇരുന്നിടത്ത്​ നിന്ന്​ അനങ്ങാനോ സുരേഷ്​ തയാറായില്ല. കഠിനപ​രിശ്രമം നടത്തി പുതിയ വസ്​ത്രമണിയിച്ചെങ്കിലും കുറച്ചധികം ദൂരമുള്ളതിനാൽ മൂന്നാം നമ്പർ ടെർമിനലിൽനിന്ന്​ രണ്ടാം നമ്പർ ടെർമിനിലേക്ക്​ കൊണ്ടുപോകൽ എളുപ്പമല്ലെന്ന്​ മനസിലായി.

എയർ ഇന്ത്യ വിമാനം ഞായറാഴ്​ച രാത്രി 9.30നാണ്​. മൂന്നാം നമ്പർ ടെർമിനലിൽനിന്ന്​ രാത്രി 8.40ന്​ പുറപ്പെടുന്ന നാസ്​ വിമാനത്തിൽ കയറ്റിവിടാമെന്ന്​ ഒടുവിൽ തീരുമാനമായി. പുതിയ ടിക്കറ്റെടുത്തു. ആളെ സുരക്ഷിതമായി ഡൽഹിയിൽ കുടുംബാംഗങ്ങളുടെ അടുത്തെത്തിക്കാൻ ഒരു സഹയാത്രികനെ ചുമതലപ്പെടുത്തി വിടുകയും ചെയ്​തു. ടെർമിനലിൽ വഴിമുട്ടിയപ്പോഴുണ്ടായ മാനസികാഘാതത്തിൽനിന്ന്​ പൂർണമായി മുക്തനാവാൻ കഴി​ഞ്ഞില്ലെങ്കിലും തിങ്കളാഴ്​ച ഉച്ചയോടെ ഡൽഹിയിൽ ഉറ്റവരുടെ അടുത്തെത്തി.