താനും എയർ എന്ത്യ താളംതെറ്റലിന്‍റെ ഇരയെന്ന് ടി. സിദ്ദീഖ്

റിയാദ്​: എയർ ഇന്ത്യ എക്സ്പ്രസിന്‍റെ സമയനിഷ്ഠയിലുള്ള അനാസ്ഥക്ക്​ താനും ഇരയായി മാറി​യെന്നും അപ്പോഴാണ്​ ഗൾഫ്​ സെക്​ടറിലെ പ്രവാസി യാത്രക്കാർ അനുഭവിക്കുന്ന ദുരിതത്തിന്‍റെ വ്യാപ്​തി മനസിലായ​തെന്നും ടി. സിദ്ദീഖ്​ എം.എൽ.എ. ജനുവരി 30നായിരുന്നു തനിക്ക്​ റിയാദിലേക്ക്​ പുറപ്പെടേണ്ടിയിരുന്നത്​. അന്ന്​​ രാത്രി എട്ടിന്​ ​കോഴിക്കോട്​ നിന്ന്​ പുറപ്പെടേണ്ട വിമാനം പറന്നുയർന്നത്​ പിറ്റേന്ന് രാവിലെ എട്ടിനായിരുന്നു.

കുട്ടികളും കുടുംബങ്ങളുമടക്കം 146ഓളം യാത്രക്കാരാണ്​ ബുദ്ധിമുട്ടിലായത്​. ഇത് ഇടക്കിടെയുണ്ടാവുന്ന സ്ഥിരം സാഹചര്യമായി മാറിയിട്ടുണ്ട്​​. ഈ പ്രശ്​നം​ ഗൾഫ്​ സെക്​ടറിൽ മാത്രമേ നടക്കുന്നുള്ളൂ എന്നതാണ്​ പ്രത്യേകത. മറ്റൊരു സെക്​ടറിലും ഇതുണ്ടാവുന്നില്ല. ഏറ്റവും കൂടുതൽ ആളുകൾ യാത്ര ചെയ്യാനുണ്ടാവുന്ന സന്ദർഭങ്ങളിലാവ​ട്ടെ ടിക്കറ്റ്​ നിരക്കുയർത്തുന്ന മറ്റൊരു അന്യായവും പതിവാണ്​.

ഇതുരണ്ടും​ അഡ്രസ്​ ചെയ്യേണ്ട വിഷയങ്ങളാണ്​. ഇതിനൊരു അറുതിയുണ്ടായാലേ തീരൂ. ഉയർത്താൻ പറ്റുന്ന വേദികളിലും അധികാരികളുടെ മുന്നിലുമെല്ലാം ഈ പ്രശ്​നം താനുന്നയിക്കുമെന്നും പരിഹാരത്തിനായി ശ്രമിക്കുമെന്നും ടി. സിദ്ദീഖ് വാർത്താസമ്മേളനത്തിൽ​ പറഞ്ഞു.