കേരളം അന്യായമായി കേന്ദ്ര സർക്കാറിനാൽ അവഗണിക്കപ്പെടുന്നു​ -ടി. സിദ്ദീഖ്​

റിയാദ്​: കേരളം അന്യായവും നീതിരഹിതവുമായി കേന്ദ്ര സർക്കാറിനാൽ അവഗണിക്കപ്പെടുകയാണെന്നും ഇപ്പോൾ കേന്ദ്രബജറ്റിൽ ക​ണ്ടത്​ അതാണെന്നും കെ.പി.സി.സി വർക്കിങ്​ പ്രസിഡൻറ്​ ടി. സിദ്ദീഖ്​ എം.എൽ.എ. ചൂരൽമല ദുരന്തത്തിലും എയിംസി​ന്‍റെ കാര്യത്തിലും ഇതേ അവഗണനയാണ്​ കേരളം നേരിടുന്നത്​. ഇങ്ങനെയുള്ള അവഗണനക്കും അനീതിക്കുമെതിരെ കേരള സർക്കാറിനോടൊപ്പം പടപൊരുതാൻ യു.ഡി.എഫ്​ തയാറാണ്​. കേന്ദ്രസർക്കാറിന്‍റെ വീഴ്​ചയെ കേരളത്തിലെ ഭരണപക്ഷവും പ്രതിപക്ഷവും ഒരുമിച്ചുനിന്നാണ്​​ എതിർക്കുന്നത്​. എന്നാൽ കേരള സർക്കാറിന്‍റെ വീഴ്​ചയെ ആ നിലക്കും യു.ഡി.എഫ് ശക്തമായി നേരിടുമെന്നും ടി. സിദ്ദീഖ്​ വാർത്താസമ്മേളനത്തിൽ പറഞ്ഞു. ​

ചൂരൽമലയിൽ ഉരുൾപൊട്ടലിൽ കാണാതായ മനുഷ്യർക്ക്​ വേണ്ടിയുള്ള തെരച്ചിൽ പ്രധാനമന്ത്രിയുടെ വയനാട്​ സന്ദർശനത്തിന്​ തലേദിവസം അവസാനിപ്പിച്ചതാണ്​. പിന്നീടൊന്നുമുണ്ടായില്ല. ഇന്നിപ്പോൾ 32 മനുഷ്യരെയാണ്​ കാണാൻ ബാക്കിയുള്ളത്​. അവർ മരിച്ചതായി ഡിക്ലയർ ചെയ്യാനുള്ള നടപടികളിലേക്ക്​ കടന്നിരിക്കുകയാണ്​. എന്നാൽ അവരുടെ ഉറ്റവരെ ഒന്ന്​ വിളിച്ചിരുത്തി ആശ്വസിപ്പിക്കാൻ പോലും കേരള സർക്കാർ പിന്നീടൊന്നും ചെയ്​തില്ല. ഇങ്ങനെ ദുരിതബാധിതരോട്​ വൈകാരികമായും ഭരണപരമായും വീഴ്​ചകൾ കേരള സർക്കാരിനുണ്ടായിട്ടുണ്ട്​. പ്രധാനമന്ത്രിയുടെ സന്ദർശനമല്ലാതെ കേന്ദ്രസർക്കാരിൽ നിന്ന്​ വേറൊന്നുമുണ്ടായില്ല. കണ്ണിൽ ചോരയില്ലാത്ത അവഗണനയാണ്​ അവിടെനിന്നുണ്ടായത്​.

ഇടതുഭരണത്തി​ന്‍റെ രണ്ടാഘാതങ്ങൾ പതിറ്റാണ്ട് ശ്രമിച്ചാലും തിരിച്ചു പിടിക്കാനാവാത്ത വിധം ​കേരളത്തെ ആപത്തിലെത്തിച്ചിരിക്കുകയാണെന്ന വസ്​തുതയും കാണാതിരുന്നുകൂടാ. അതീവ ഗുരുതരമായ സാമൂഹിക പ്രശ്​നങ്ങളായി മാറിയിരിക്കുകയാണ്​ അവ. ലഹരിയുടെ ഇടമായി കേരളം മാറിയതാണ്​ ഒന്ന്​. രണ്ട്​ യുവതലമുറയുടെ വിദേശകുടിയേറ്റമാണ്​ രണ്ടാമത്തേത്​. ഇത്​ രണ്ടും കേരളത്തി​ന്‍റെ സാമൂഹിക പ്രതലത്തിലേൽപിച്ചിരിക്കുന്ന ആഘാതത്തെ മനസിലാക്കാനോ അതിന്​ പരിഹാരം കാണാനുള്ള പദ്ധതികളും പരിപാടികളും ആവിഷ്​കരിക്കാനോ സംസ്ഥാന സർക്കാർ ഇതുവരെ തയാറായി​ട്ടില്ല.

മലയോര സംരക്ഷണ യാത്ര ശക്തമായി ഇത്തരം വിഷയങ്ങളെല്ലാം ഉന്നയിച്ച്​ പ്രതിപക്ഷ നേതാവി​ന്‍റെ നേതൃത്വത്തിൽ തുടരുകയാണ്​. കോൺഗ്രസ്​ നേതാക്കളെല്ലാം ഒറ്റക്കെട്ടായി ആ ജാഥക്കൊപ്പമാണ്​. യു.ഡി.എഫ്​ മൊത്തം അതിന്​ പിന്തുണ നൽകുകയാണ്​. ഇടതുഭരണത്തിൽ പൊറുതിമുട്ടിയ ജനങ്ങളൊന്നാകെ അതിനൊപ്പമാണ്​. എന്നാൽ കോൺഗ്രസിൽ എന്തൊക്കെയോ പ്രശ്​നങ്ങളാണെന്ന്​ ഇടതുസർക്കാർ മാധ്യമങ്ങളെ കൂട്ടുപിടിച്ച് ഇഷ്​ടാനുസരണം നരേഷൻ നിർമിക്കുകയാണെന്നും അതിന് നികേഷ് കുമാറിനെയും ജോൺ ബ്രിട്ടാസിനെയും ഉപയോഗിക്കുകയാണെന്നും ടി. സിദ്ദീഖ്​ ആരോപിച്ചു.

ഒ.ഐ.സി.സി റിയാദ്​ സെൻട്രൽ കമ്മിറ്റിയുടെ 14-ാം വാർഷികാഘോഷങ്ങളിൽ പങ്കെടുക്കാൻ റിയാദിലെത്തിയതാണ്​ ടി. സിദ്ദീഖ്​ എം.എൽ.എ. വാർത്താസമ്മേളനത്തിൽ ഒ.ഐ.സി.സി ഭാരവാഹികളായ അബ്​ദുല്ല വല്ലാഞ്ചിറ, സലീം കളക്കര, ഫൈസൽ ബാഹസ്സൻ, നവാസ് വെള്ളിമാടുകുന്ന്, റഷീദ് കൊളത്തറ, സുരേഷ് ശങ്കർ, സക്കീർ ദാനത്ത് എന്നിവർ പ​ങ്കെടുത്തു.