നികുതി, വാറ്റ് അപ്ഡേറ്റുകൾ, ഇ-ഇൻവോയ്സിങ്​ സെമിനാർ

റിയാദ്: നികുതി, വാറ്റ് അപ്‌ഡേറ്റുകളും ഇ-ഇൻവോയ്‌സിങ്ങി​ന്റെ ആമുഖവും സംബന്ധിച്ച് സെമിനാർ നടന്നു. ബത്ഹയിലെ ഡി-പാലസ് ഹോട്ടലിൽ ‘ഫിൻപാൽ’ കൺസൾട്ടിങ്​ ഏജൻസി സംഘടിപ്പിച്ച പരിപാടിയിൽ ഈ മേഖലയിലെ ഏറ്റവും പുതിയ സംഭവവികാസങ്ങളെക്കുറിച്ച് വ്യവസായ വിദഗ്ദരും പ്രഫഷനലുകളും ചർച്ച നയിച്ചു.

സൗദി അറേബ്യയിലെ വികസിച്ചുകൊണ്ടിരിക്കുന്ന നികുതി ഭൂപ്രകൃതിയെക്കുറിച്ചുള്ള ഉൾക്കാഴ്ചകൾ നൽകാൻ ലക്ഷ്യമിട്ടുള്ള സമഗ്രമായ അജണ്ടയാണ് സെമിനാറിൽ അവതരിപ്പിച്ചത്. സോളിഡാരിറ്റി ഇൻഷുറൻസ്​ മുൻ ഗവൺമെന്റ്​ റിലേഷൻസ് ആൻഡ്​ എച്ച്.ആർ മാനേജർ മൗസാദ് അൽ എനേസി സെമിനാർ ഉദ്ഘാടനം ചെയ്തു.

റിയാദിലെ ഫിൻപാൽ മേധാവി മുഹമ്മദ് നിഫ്രാസ് മുഖ്യ പ്രഭാഷണം നടത്തി. ഏറ്റവും പുതിയ നികുതി നിയന്ത്രണങ്ങളും ഇ-ഇൻവോയ്‌സിങ്ങി​ന്റെ നേട്ടങ്ങളും ഇൻവോയ്‌സിങ് സിസ്​റ്റം അപ്‌ഡേറ്റ് ചെയ്യേണ്ടതി​ന്റെ പ്രാധാന്യവും അദ്ദേഹം എടുത്തുപറഞ്ഞു.

ആദ്യ സെഷൻ സൗദിയിലെ വാറ്റ്, ടാക്സ് അപ്ഡേറ്റുകൾ എന്നിവയിൽ ശ്രദ്ധ കേന്ദ്രീകരിച്ച് പ്രമുഖ സൗദി നികുതി വിദഗ്ദനായ പി.സി. ആഷിഖ് റഹ്​മാൻ, സമീപകാല മാറ്റങ്ങളെക്കുറിച്ചും ബിസിനസുകൾക്കുള്ള അവയുടെ പ്രത്യാഘാതങ്ങളെക്കുറിച്ചും ആഴത്തിലുള്ള വിശകലനം നൽകി.

മാട്രിക്സ് കോംസെക്കിലെ ബിസിനസ് ഡെവലപ്‌മെൻറ്​ ഹെഡ് ഷാജൽ മൊഹിയുദ്ദീൻ നയിച്ച ഇ-ഇൻവോയ്‌സിങ്ങി​ന്റെ ആമുഖത്തെക്കുറിച്ചുള്ള സെഷനും സെമിനാറിൽ അവതരിപ്പിച്ചു. സാമ്പത്തിക ഇടപാടുകളിൽ സുതാര്യതയും കാര്യക്ഷമതയും വർദ്ധിപ്പിക്കുന്നതി​ന്റെ പങ്ക് ഊന്നിപ്പറയുന്ന ഇ-ഇൻവോയ്‌സിങ്ങി​ന്റെ സാങ്കേതികവും നിയന്ത്രണപരവുമായ വശങ്ങൾ അവതരിപ്പിച്ചു.

സൗദി വ്യവസായി മാജിദ് സുലൈമാൻ അൽ ഫുവൈരിസ് പി.സി. ആഷിഖ് റഹ്​മാനും ഷാജൽ മൊഹിയുദ്ദീനും ആദരഫലകങ്ങൾ നൽകി. അഹമ്മദ് സഹൽ, മുഹമ്മദ് അസ്​ലം എന്നിവരും പരിപാടിയിൽ പ​ങ്കെടുത്തു. എ. ഹസ്ന സ്വാഗതവും ഹസനുൽ ബന്ന നന്ദിയും പറഞ്ഞു.