ഉംറക്കും മദീന സന്ദർശനത്തിനുമുണ്ടായിരുന്ന പ്രായപരിധി ഒഴിവാക്കി

ജിദ്ദ: മക്ക, മദീന ഇരുഹറമുകളിൽ പ്രവേശിക്കുന്നതിനായി നേരത്തെ നിശ്ചയിച്ച പ്രായപരിധി എടുത്തുമാറ്റി.​ തീർഥാടകർക്കും സന്ദർശകർക്കും ഇരുഹറമുകളിൽ പ്രവേശിക്കുന്നതിന്​ പ്രത്യേക പ്രായം ആവശ്യമില്ലെന്ന്​ ഹജ്ജ്​ ഉംറ മന്ത്രാലയം വ്യക്തമാക്കിയതായി​ പ്രാദേശിക പത്രങ്ങളാണ്​ റിപ്പോർട്ട്​ ചെയ്​തത്​. ഇനി മുതൽ ഏത് പ്രായക്കാർക്കും മക്കയിലും മദീനയിലും പ്രവേശനം അനുവദിക്കും.

കോവിഡ്​ പ്രതിരോധ മുൻകരുതലായി​ കഴിഞ്ഞ ദിവസം വരെ ഇരുഹറമുകളിലെ പ്രവേശനത്തിന്​ പ്രത്യേക പ്രായപരിധി നിബന്ധനയായി നിശ്ചയിച്ചിരുന്നു​. അതാണ്​​ ഇപ്പോൾ എടുത്തു കളഞ്ഞിരിക്കുന്നത്​.

തവക്കൽന ആപ്ലിക്കേഷനിൽ ഇമ്യൂൺ സ്​റ്റാറ്റസ്​ ഉണ്ടായിരിക്കണമെന്നും ഇഅ്​തമർന ആപ്ലിക്കേഷനിലൂടെ ആവശ്യമായ പെർമിറ്റ്​ നേടിയിരിക്കണമെന്നും ഹജ്ജ്​ ഉംറ മന്ത്രാലയം ഊന്നിപ്പറഞ്ഞിട്ടുണ്ട്​.