ഉംറ തീർഥാടനത്തിന്​ തുടക്കം, ആത്മീയ ഹർഷത്തിൽ ഹറം

ജിദ്ദ: ഭക്തിയുടെ നിറവിൽ ഉംറ തീ​ർഥാടനത്തിന്​ തുടക്കം. കോവിഡിനെ തുടർന്ന്​ ഏഴു​ മാസത്തോളമായി നിർത്തിവെച്ച​ ഉംറ തീർഥാടനമാണ്​ ഞായറാഴ്​ച​ പുലർച്ചെ പുനരാരംഭിച്ചത്​. ഘട്ടംഘട്ടമായി ഉംറ പുനരാംരംഭിക്കുമെന്ന തീരുമാനം കഴിഞ്ഞയാഴ്​ചയാണ്​ സൗദി ആഭ്യന്തര മന്ത്രാലയം എടുത്തത്​​.

ആദ്യഘട്ടമായി പ്രതിദിനം 6,000 പേരെന്ന നിലയിൽ ആഭ്യന്തര തീർഥാടകർക്കാണ്​ ഞായറാഴ്​ച മുതൽ പ്രവേശനം അനുവദിച്ചത്​​. ഒക്​ടോബർ 18ന്​ രണ്ടാംഘട്ടത്തിൽ പ്രതിദിന സംഖ്യ 15,000ഉം നവംബർ ഒന്നിന്​ മൂന്നാം ഘട്ടത്തിൽ 20,000ഉം ആയി ഉയർത്തും.

രാജ്യത്തെ സ്വദേശികളും വിദേശികളുമായ തീർഥാടകർക്കാണ് ഞായറാഴ്​ച മുതൽ​ ഉംറക്ക്​ അനുമതി. രാജ്യത്തി​െൻറ വിവിധ ഭാഗങ്ങളിൽനിന്ന്​ മുൻകൂട്ടി അപേക്ഷിച്ച്​ അനുമതി പത്രം വാങ്ങിയ തീർഥാടകർ ഞായറാഴ്​ച പുലർച്ചെ മുതലേ ഉംറയിൽ ഏർപ്പെട്ടു. ഹജ്ജ്​ ഉംറ മന്ത്രാലയം പുറത്തിറക്കിയ 'ഇഅ്​തമർനാ' എന്ന മൊബൈൽ ആപ്പിൽ രജിസ്​റ്റർ ചെയ്​താണ്​ അനുമതി പത്രം നേടേണ്ടത്.

ഇതിനകം വിദൂര സ്ഥലങ്ങളിലുള്ളവർ ശനിയാഴ്​ച ഉച്ചയോടെ തന്നെ മക്കയിലേക്ക്​ പുറപ്പെട്ടിരുന്നു. മീഖാത്തുകളിൽനിന്ന്​ ഇഹ്​റാമിൽ പ്രവേശിച്ച്​ രാത്രിയോടെ മക്കയിലെത്തി​. നിശ്ചിത സ്ഥലങ്ങളിൽ ഒരുമിച്ച്​ കൂടിയ തീർഥാടകരെ​ പിന്നീട്​ ബസുകളിലാണ്​ ഹറമിലെത്തിച്ചത്​​.

ശനിയാഴ്​ച അർധരാത്രി മുതൽ തന്നെ ഹറമിലേക്ക്​ തീർഥാടകരുടെ വരവ്​ തുടങ്ങിയിരുന്നു. ഹറമിലെത്തിയ തീർഥാടകരെ ഇരുഹറം കാര്യാലയം, ഹജ്ജ്​ മന്ത്രാലയം, അനുബന്ധ വകുപ്പുകൾ എന്നിവയുടെ ഉദ്യോഗസ്​ഥർ ചേർന്ന്​ സ്വീകരിച്ചു.

രാവിലെ ഉംറ തുടങ്ങിയ ആദ്യ സംഘത്തിൽ 1,000 പേരാണുണ്ടായിരുന്നത്​. ഹറമിൽ പ്രവേശിച്ച തീർഥാടകരെ 100 പേരടങ്ങുന്ന സംഘങ്ങളായി തിരിച്ച്​​ ത്വവാഫിനും സഅ്​ഇന്നും അയച്ചു​. മൂന്നു മണിക്കൂറാണ്​ ഉംറ നിർവഹണത്തിന്​ അനുവദിച്ചിരിക്കുന്ന സമയം.

ആദ്യസംഘം ഉംറ നിർവഹിച്ചുപോയ ഉടനെ ഹറം അണുമുക്തമാക്കിയ ശേഷമാണ്​ രണ്ടാമത്തെ സംഘത്തിലെ 1000 പേരെ ഹറമിൽ പ്രവേശിപ്പിച്ചത്​. ഉച്ചക്ക്​ മുമ്പ്​ തന്നെ മൂന്നാമത്തെ സംഘവും ഹറമിലെത്തി ഉംറ നിർവഹിച്ചു.

ഉച്ചകഴിഞ്ഞ്​ ബാക്കി മൂന്ന്​ സംഘങ്ങൾ കൂടി ഉംറ നിർവഹിക്കും. പ്രതിദിനം 6,000 പേരെ ആറ് സംഘങ്ങളായി തിരിച്ച്​ ആറ്​​ സമയങ്ങളിലായി ഹറമിൽ പ്രവേശിപ്പിച്ചാണ്​ ഉംറ നിർവഹണം. ഇതിനകം 108,041 പേർക്കാണ്​ ഉംറക്കുള്ള അനുമതി പത്രം നൽകിയിരിക്കുന്നത്​. 6,000 പേർ വീതം എല്ലാ ദിവസവും ഹറമിലെത്തി ഉംറ നിർവഹിക്കും.