സൗദി മന്ത്രിസഭായോഗത്തിൽ അധ്യക്ഷത വഹിച്ച് കിരീടാവകാശി

ജിദ്ദ: സൗദി മന്ത്രിസഭാ യോഗത്തിൽ അധ്യക്ഷത വഹിച്ച് കിരീടാവകാശിയും പ്രധാനമന്ത്രിയു​മായ അമീർ മുഹമ്മദ്​ ബിൻ സൽമാൻ. ചൊവാഴ്​ച റിയാദിലെ അൽയമാമ കൊട്ടാരത്തിലാണ്​ കിരീടാവകാശിയുടെ അധ്യക്ഷതയിൽ മന്ത്രിസഭ യോഗം ചേർന്നത്​. ഉപപ്രധാനമന്ത്രിയായിരുന്ന കിരീടാവകാശിയെ സൽമാൻ രാജാവ് അടുത്തിടെ പ്രധാനമന്ത്രിയായി നിയമിച്ചിരുന്നു​.

അൾജീരിയൻ പ്രസിഡൻറുമായി കിരീടാവകാശി നടത്തിയ ഫോൺ സംഭാഷണത്തിന്റെ ഉള്ളടക്കം, ഇരുരാജ്യങ്ങൾ തമ്മിലുള്ള സഹകരണം വികസിപ്പിക്കുന്നതിനുള്ള വഴികൾ എന്നിവ മന്ത്രിസഭാ യോഗം അവലോകനം ചെയ്​തു. കൂടാതെ കഴിഞ്ഞ കുറച്ച് ദിവസങ്ങളിലെ രാജ്യത്തി​ന്റെ വിദേശനയത്തി​ന്റെ മൊത്തത്തിലുള്ള പ്രവർത്തനം, പ്രാദേശികവും അന്തർദേശീയവുമായ സംഘടനകളിലുടെ നടത്തിയ ശ്രമങ്ങൾ തുടങ്ങിയവയും മന്ത്രിസഭ ചർച്ച ചെയ്​തു.

കാലാവസ്ഥാ വ്യതിയാനം സംബന്ധിച്ച് ഐക്യരാഷ്ട്രസഭാ സമ്മേളനത്തോടനുബന്ധിച്ച് നവംബറിൽ ഈജിപ്തിൽ 'ഗ്രീൻ മിഡിൽ ഈസ്റ്റ് ഇനിഷ്യേറ്റീവ്' ഉച്ചകോടി, 'ഗ്രീൻ സൗദി ഇനിഷ്യേറ്റീവ് ഫോറം' രണ്ടാമത് സമ്മേളനം എന്നിവ നടക്കുമെന്ന കിരീടാവകാശിയുടെ പ്രഖ്യാപനം, ഗൾഫ്-ഉത്തരാഫ്രിക്കൻ മേഖലയും ലോകവും നേരിടുന്ന പാരിസ്ഥിതിക, കാലാവസ്ഥാ വെല്ലുവിളികളെ അഭിമുഖീകരിക്കുന്നതിനുള്ള കൂട്ടായ പ്രവർത്തനത്തെ പിന്തുണക്കുന്ന രാജ്യത്തി​ന്റെ പ്രതിബദ്ധതയാണ് പ്രതിഫലിപ്പിക്കുന്നുതെന്ന്​ മന്ത്രിസഭ വിലയിരുത്തി.

അതെസമയം കഴിഞ്ഞ ഏതാനും ആഴ്​ചകളായി ജിദ്ദയിലായിരുന്ന സൽമാൻ രാജാവ്​ ചൊവ്വാഴ്​ച വൈകീട്ട്​ തലസ്ഥാന നഗരമായ റിയാദിലേക്ക്​ തിരിച്ചു. ജിദ്ദ വിമാനത്താവളത്തിൽ സൽമാൻ രാജാവിനെ യാത്രയയക്കാൻ മേഖല ഗവർണർ അമീർ ഖാലിദ് അൽഫൈസൽ എത്തിയിരുന്നു.