സൗദിയിൽ ഇതുവരെ 'ഒമിക്രോൺ' റിപ്പോർട്ട്​ ചെയ്​തിട്ടില്ലെന്ന്​ ആരോഗ്യ മന്ത്രാലയം

ജിദ്ദ: കോവിഡി​ന്‍റെ പുതിയ വകഭേദമായ ഒമിക്രോൺ സൗദിയിൽ ഇതുവരെ റിപ്പോർട്ട്​ ചെയ്​തിട്ടില്ലെന്നും തുടർനടപടികളും നിരീക്ഷണ പ്രവർത്തനങ്ങളും ശക്തമായി തുടരുന്നുണ്ടെന്നും​ പൊതു ആരോഗ്യ അതോറിറ്റി ചീഫ്​ എക്​സിക്യൂട്ടീവ്​ ഓഫീസർ ഡോ. അബ്​ദുല്ല അൽഖുവൈസാനി പറഞ്ഞു. ദക്ഷിണാഫ്രിക്കയിലും നിരവധി ആഫ്രിക്കൻ രാജ്യങ്ങളിലും മറ്റും​ ഒമിക്രോൺ കണ്ടെത്തിയതിനെ തുടർന്ന്​ ലോകാരോഗ്യ സംഘടന ആശങ്ക പ്രകടിപ്പിച്ചിട്ടുണ്ട്​. പുതിയ വൈറസ്​ വകഭേദത്തെ പ്രതിരോധിക്കാനും വ്യാപനം തടയുന്നതിനും ആരോഗ്യ പ്രതിരോധ വിഭാഗം വേണ്ട മുൻകരുതൽ നടപടികൾ സംബന്ധിച്ച്​ നിരന്തരം അവലോകനം ചെയ്യുന്നുണ്ടെന്നും അദ്ദേഹം ഊന്നിപ്പറഞ്ഞു.

മുഴുവനാളുകളും പ്രതിരോധനടപടികൾ പാലിക്കണം. അവയിൽ അലസത കാണിക്കരുതെന്നും പ്രതിരോധ കുത്തിവെ​പ്പുകളും ബൂസ്റ്റർ ഡോസും പൂർത്തിയാക്കാൻ മുൻകൈയെടുക്കണമെന്നും ആവശ്യപ്പെടുന്നു. രാജ്യത്തുള്ള 97 ശതമാനം കോവിഡ്​ രോഗികളും വാക്​സിൻ എടുക്കാത്തവരോ ഒരു ഡോസ്​ മാത്രം എടുത്തവരോ ആണെന്നും ഡോ. അൽഖുവൈസാനി പറഞ്ഞു.

കോവിഡിന്‍റെ പുതിയ വകഭേദമായ ഒമിക്രോണിന്‍റെ ആവിർഭാവത്തിന്​ ലോകത്തിലെ പല പ്രദേശങ്ങളും രാജ്യങ്ങളും സാക്ഷ്യം വഹിക്കുന്ന സാഹചര്യത്തിൽ എല്ലാവരും ജാ​ഗ്രത പുലർത്തണമെന്ന്​ ആരോഗ്യവക്​താവ്​ ഡോ. മുഹമ്മദ്​ അബ്​ദുൽ അലി പറഞ്ഞു. കോവിഡ്​ സംബന്ധിച്ച പുതിയ സംഭവവികാസങ്ങൾ വിശദീകരിക്കാൻ വിളിച്ചുചേർത്ത പത്രസ​മ്മേളനത്തിലാണ്​ ആരോഗ്യ വക്താവ്​ ഇക്കാര്യം പറഞ്ഞത്​. പ്രതിരോധ കുത്തിവെപ്പിനു വേണ്ടത്ര നടപടികൾ സ്വീകരിക്കാത്തതിന്‍റെയോ മുൻകരുതൽ നടപടികൾ പ്രയോഗിക്കുന്നതിലെ അശ്രദ്ധയുടെയോ ഫലമായാണ് ചില രാജ്യങ്ങളിൽ പുതിയ വകഭേദമുണ്ടാകുന്നതെന്ന്​ ആരോഗ്യ വക്താവ്​ ചുണ്ടിക്കാട്ടി.

കോവിഡിനെ നിയന്ത്രിക്കുന്നതിൽ ലോക രാജ്യങ്ങളിൽ നിന്ന് വ്യത്യസ്തമായ സാഹചര്യമാണ്​ സൗദി അറേബ്യയിലുള്ളതെന്നും അതിനു ദൈവത്തെ സ്​തുതിക്കുന്നുവെന്നും വക്താവ്​ പറഞ്ഞു. രോഗബാധിതരുടെയും ഗുരുതരാവസ്ഥയിലുള്ളവരുടെയും എണ്ണം ദിനംപ്രതി കുറഞ്ഞുവരുന്നുണ്ട്​. രണ്ട്​ ഡോസ്​ വാക്​സിൻ എടുത്തുകഴിഞ്ഞ്​ ആറ്​ മാസം കഴിഞ്ഞവർ ബൂസ്​റ്റർ ഡോസ്​ എടുക്കണം. ചിലരുടെ ഭാഗത്തു നിന്നുള്ള അവഗണന മറ്റുള്ളവരുടെയും സമൂഹത്തിന്‍റെയും സുരക്ഷക്ക്​ ഭീഷണിയാകാൻ കാരണമാകരുതെന്നും ആരോഗ്യ വക്താവ്​ പറഞ്ഞു. രാജ്യത്ത്​ നൽകിയ കോവിഡ്​ വാക്സിനുകളുടെ എണ്ണം 47 ദശലക്ഷം കവിഞ്ഞു. രണ്ട്​ ഡോസ്​ പൂർത്തിയാക്കിയ പൗരന്മാരുടെയും താമസക്കാരുടെയും എണ്ണം 22.3 ദശലക്ഷം ആയെന്നും വക്താവ്​ പറഞ്ഞു.