ഉംറ തീർഥാടനം രണ്ടാംഘട്ടം ഞായറാഴ്​ച മുതൽ

ജിദ്ദ: ഉംറ തീർഥാടനം രണ്ടാംഘട്ടം ഞായറാഴ്​ച ആരംഭിക്കും. രണ്ടാഴ്​ച നീണ്ടു നിൽക്കുന്നതാണിത്​. ഇൗ ഘട്ടത്തിൽ 'ഇഅ്​തമർനാ' ആപ്പിലൂടെ അനുമതി പത്രം നേടുന്ന രാജ്യത്തെ സ്വദേശികളും വിദേശികളുമടങ്ങുന്ന തീർഥാടകരെ മക്കയിൽ പ്രവേശിപ്പിക്കും. ആളുകളെ ഹറമിൽ നമസ്​കരിക്കാനും മസ്​ജിദുന്നബവിയിലെ റൗദ സന്ദർശിക്കാനും അനുവദിക്കും. ഇൗ ഘട്ടത്തിൽ രണ്ടര ലക്ഷം തീർഥാടകരെയാണ്​ ഉംറക്ക്​ അനുവദിക്കുന്നത്​. ആറുലക്ഷത്തോളം പേർ നമസ്​കരിക്കാൻ ഹറമിലെത്തുമെന്ന് പ്രതീക്ഷിക്കുന്നതായി​ ഹജ്ജ്​, ഉംറ ദേശീയ സമിതി അംഗം ഹാനി അലി അൽഉമൈരി പറഞ്ഞു.

ഹജ്ജ്​–ഉംറ മന്ത്രാലയം പ്രഖ്യാപിച്ച ​ഷെഡ്യുളനുസരിച്ച്​ നവംബർ ഒന്ന്​ (റബീഉൽ അവ്വൽ 15) മുതൽ​ വിദേശരാജ്യങ്ങളിൽനിന്നുള്ള ഉംറ തീർഥാടകരെ അനുവദിക്കും​. എന്നാൽ, രാജ്യത്തേക്ക്​ അവരുടെ വരവ്​ സംബന്ധിച്ച്​ മറ്റു കാര്യങ്ങളിൽ ഇതുവരെ തീരുമാനമായിട്ടില്ല. ഏതൊക്കെ രാജ്യങ്ങൾക്കാണ്​ അനുമതി എന്ന തീരുമാനം​ എല്ലാവരും കാത്തിരിക്കുകയാണെന്നും ഹാനി അലി അൽഉമൈരി പറഞ്ഞു​. മുൻകരുതൽ നടപടിയായി ബസുകളിൽ തീർഥാടകരുടെ എണ്ണം സീറ്റുകളുടെ 40 ശതമാനത്തിൽ കവിയരുതെന്നും ഒരു റൂമിൽ രണ്ടാളുകളിൽ കൂടുതൽ താമസിപ്പിക്കരുതെന്നും നിർദേശമുണ്ട്​. ഉംറ നിർവഹിക്കുന്നതിനും മസ്​ജിദുൽ ഹറാമിലെ നമസ്​കാരത്തിനും മദീന റൗദ സന്ദർശനത്തിനും ഇഅ്​തമർനാ ആപ്​ വഴി അനുമതി പത്രം നേടിയിരിക്കണമെന്നും അദ്ദേഹം പറഞ്ഞു.

കോവിഡിനെ തുടർന്ന്​ നിർത്തിവെച്ച ഉംറ തീർഥാടനം ഒക്​ടോബർ നാലിനാണ്​ പുനരാരംഭിച്ചത്​. ആദ്യ ഘട്ടത്തിനാണ്​ അന്ന്​ തുടക്കം കുറിച്ചത്​. പ്രതിദിനം ആറു സമയങ്ങളിലായി 6,000 തീർഥാടകരെ മാത്രമാണ്​ ഉംറ​ക്ക്​ അനുവദിച്ചത്​​. ഹജ്ജ്​–ഉംറ മന്ത്രാലയത്തി​െൻറ 'ഇഅ്​തമർനാ' ​ആപ്പിൽ രജിസ്​റ്റർ ചെയ്​ത്​ അനുമതി ലഭിക്കുന്നവരെ മാത്രമാണ്​ മക്കയിൽ പ്രവേശിപ്പിക്കുന്നത്​. പ്രതിദിനം ആറായിരം പേർ ​വീതം നിലവിൽ ഉംറ നിർവഹിക്കുകയാണ്​. ഞായറാഴ്​ച മുതൽ രണ്ടാംഘട്ടം ആരംഭിക്കുന്നതോടെ പ്രതിദിന എണ്ണം വർധിപ്പിക്കും. നിരവധി ആളുകളാണ്​ ഉംറക്ക്​ റജിസ്​റ്റർ ​ചെയ്​തു കാത്തിരിക്കുന്നത്​. രണ്ടാംഘട്ടത്തിലും 'ഇഅ്​തമർനാ' ആപ്​ വഴിയാണ്​ ഉംറക്ക്​ അനുമതി നൽകുക. മസ്​ജിദുൽ ഹറാമിൽ നമസ്​കരിക്കുന്നതിനും റൗദ സന്ദർശനത്തിനുമുള്ള അനുമതിപത്രം കൂടി ആപ്പിൽ പുതുതായി ഉൾപ്പെടുത്തിയിട്ടുണ്ട്​.