നനഞ്ഞൊലിച്ച്​ മക്കയിലെ തെരുവുകൾ

മക്ക: കാലാവസ്ഥ​ക്ക്​ മാറ്റം പ്രഖ്യാപിച്ച്​ സൗദിയിൽ വിവിധ ഭാഗങ്ങളിൽ ആരംഭിച്ച മഴ മക്കയിലും കനത്തു. വ്യാഴാഴ്​ച രാവിലെ ഹറമിനടുത്തും​ മക്ക നഗരത്തി​െൻറ മറ്റു ഭാഗങ്ങളിലും ഇടിയോടുകൂടിയ മഴയാണുണ്ടായത്​. മേഖലയുടെ ചില ഭാഗങ്ങളിൽ രാവിലെ 10 മുതൽ രാത്രി 10​ വരെ മിതമായും ശക്തമായും മഴയുണ്ടാകുമെന്നും ദൂരക്കാഴ്​ച കുറയുമെന്നും കാലാവസ്ഥ വകുപ്പ്​ നേരത്തേ മുന്നറിയിപ്പ്​ നൽകിയിരുന്നു. ​​രാവിലെ മുതൽ ആകാശം മൂടിക്കെട്ടിയ നിലയിലായിരുന്നു. ഇതേതുടർന്ന്​ മുനിസിപ്പാലിറ്റി, റെഡ്​​ ക്രസൻറ്​, സിവിൽ ഡിഫൻസ്​ തുടങ്ങിയ വകുപ്പുകൾ ആവശ്യമായ മുൻകരുതൽ സ്വീകരിച്ചിരുന്നു.

ഏത്​ അടിയന്തര ഘട്ടവും നേരിടാൻ വിവിധ മേഖലകളിൽ സിവിൽ ഡിഫൻസ്​ നിലയുറപ്പിച്ചിരുന്നു. മഴവെള്ളം തിരിച്ചുവിടുന്ന ഒാവുചാലുകൾ പരിശോധിക്കാൻ മുനിസിപ്പാലിറ്റി ഉദ്യോഗസ്ഥർ രംഗത്തുണ്ടായിരുന്നു. റോഡിൽ കെട്ടിനിന്ന വെള്ളം നീക്കംചെയ്യാനും ശുചീകരണത്തിനും ആവശ്യമായ തൊഴിലാളികളെ നിയോഗിക്കുകയും ഇവർക്കാവശ്യമായ ഉപകരണങ്ങൾ ഒരുക്കുകയും ചെയ്​​തിരുന്നു.