മദീനയിൽ സംസം ടാങ്കറുകൾക്ക്​ ട്രാക്കിങ്​ പദ്ധതി

മദീന: മസ്​ജിദുന്നബവിയിൽ സംസം ടാങ്കർ ലോറികൾക്ക്​ സ്വയം ട്രാക്കിങ്​ പദ്ധതി നടപ്പാക്കി. ടാങ്കറുകളിൽ ചിപ്പുകൾ ഘടിപ്പിച്ചാണ്​ സ്വയം ട്രാക്കിങ്​ പദ്ധതി പൂർത്തിയാക്കിയിരിക്കുന്നതെന്ന്​ പരിസ്ഥിതി സംരക്ഷണ, പകർച്ച വ്യാധി നിയന്ത്രണ വിഭാഗം ഡയറക്​ടർ യൂസുഫ്​ അൽഅൗഫി പറഞ്ഞു. ഇതിലൂടെ വാഹനങ്ങളുടെ ചലനങ്ങളും എത്തുന്ന സമയവും മറ്റും അറിയാൻ സാധിക്കും.

തിരക്കേറുന്ന റൂട്ടുകൾ നിർണയിക്കാനും അറിയിപ്പുകൾ നൽകാനും സാധിക്കും. ടാങ്കറുകളിൽ സംസം കൊണ്ടുപോകുന്ന സമയത്ത്​ ജലമലിനീകരണം ഒഴിവാക്കാനും സന്ദർശകരുടെ സുരക്ഷയും കണക്കിലെടുത്താണ്​ പദ്ധതി നടപ്പാക്കിയിരിക്കുന്നതെന്നും അദ്ദേഹം പറഞ്ഞു.

വയോധികർക്കും ഭിന്നശേഷിക്കാർക്കും പ്രത്യേക ട്രാക്കുകൾ​

ജിദ്ദ: മക്കയിൽ ഹറം മത്വാഫിൽ (കഅ്​ബ​ക്ക്​ ചുറ്റുമുള്ള മുറ്റം) വയോധികർക്കും ഭിന്നശേഷിക്കാർക്കും രണ്ട്​ പ്ര​ത്യേക ട്രാക്കുകൾ നിശ്ചയിച്ചു.155 മീറ്റർ നീളത്തിലാണ്​ ഒരു ട്രാക്ക്​. 55 ഉന്തുവണ്ടികൾക്ക്​ ഇതിലൂടെ ഒരുസമയം സഞ്ചരിക്കാനാവും. രണ്ടാ​മത്തെ ട്രാക്ക്​ കഅ്​ബയോട്​ ചേർന്നുള്ള ഭാഗത്താണ്​​. ഉന്തുവണ്ടി ഉപയോഗിക്കാത്ത, വയോധികർക്ക്​ മാത്രമാണിത്​.​

145 മീറ്റർ നീളമുള്ള ഇൗ​ ട്രാക്കിൽ 50 പേരെ ഉൾക്കൊള്ളാനാകും. പ്രായം കൂടിയവർക്കും ഭിന്നശേഷിക്കാർക്കും​ ത്വവാഫ്​ കർമം എളുപ്പമാക്കുന്നതിനാണ്​ പ്രത്യേക ട്രാക്കുകൾ നിശ്ചയിച്ചതെന്ന്​ ഇരുഹറം കാര്യാലയത്തിന്​ കീഴിലെ ക്രൗഡ്​ മാനേജ്​മെൻറ്​ വകുപ്പ്​ മേധാവി എൻജി. ഉസാമ അൽഹുജൈലി പറഞ്ഞു.