ജിദ്ദയിൽ പള്ളിക്കുള്ളിലേക്ക്​ ട്രക്ക്​ ഇടിച്ചുകയറി അഞ്ച്​ പേർക്ക്​ പരിക്ക്​

ജിദ്ദ: പള്ളിക്കുള്ളിലേക്ക്​ ട്രക്ക്​ ഇടിച്ചുകയറി അഞ്ച്​ പേർക്ക്​ പരിക്കേറ്റു. ജിദ്ദയുടെ തെക്ക് കിഴക്ക് അൽ മുൻതസഹാത്തിലെ അൽ അമാർ പള്ളിയിലേക്കാണ്​ ട്രക്ക് ഇടിച്ചുകയറിയത്​. പള്ളിയിൽ നമസ്​കരിച്ചു കൊണ്ടിരുന്ന അഞ്ച്​ പേർക്കാണ് പരിക്കേറ്റത്​.

റോഡ്​ ഭാഗത്തെ പള്ളിയുടെ ചുവർ ഭാഗികമായി തകർന്നു. പരിക്കേറ്റവരെ ആശുപത്രിയിൽ പ്രവേശിപ്പിച്ചതായി ട്രാഫിക്​ വകുപ്പ്​ ട്വിറ്ററിൽ അറിയിച്ചു. വിവരമറിഞ്ഞു സിവിൽ ഡിഫൻസും ട്രാഫിക്​ പൊലീസും രക്ഷാപ്രവർത്തനത്തിനു സ്ഥല​ത്തെത്തിയിരുന്നു.

അപകടത്തിൽ പരിക്കേറ്റ്​ ആശുപത്രിയിൽ കഴിയുന്നവരുടെയും പള്ളിയിലുണ്ടായിരുന്ന ആരോഗ്യ സ്ഥിതി മതകാര്യ വകുപ്പ്​ മന്ത്രി ഡോ. അബ്​ദുൽ ലത്തീഫ്​ ബിൻ അബ്​ദുൽ അസീസ്​ ആലുശൈഖ് അന്വേഷിച്ചു.

പള്ളി വീണ്ടും തുറക്കുന്നതിനെക്കുറിച്ച്​ പഠിക്കാനും കെട്ടിടത്തിന്റെ സുരക്ഷ ഉറപ്പുവരുത്താനും അടിയന്തിര കമ്മിറ്റി രൂപവത്കരിക്കാൻ ബന്ധപ്പെട്ടവർക്ക്​ നിർദേശം മന്ത്രി നൽകി.