തുർക്കിയയിൽ കാണാതായ സൗദി വനിതയുടെ മൃതദേഹം കെട്ടിടാവശിഷ്​ടങ്ങൾക്കിടയിൽ കണ്ടെത്തി

ജിദ്ദ: തുർക്കിയയിൽ ഭൂകമ്പത്തെ തുടർന്ന്​ കാണാതായ സൗദി വനിതയുടെ മൃതദേഹം കെട്ടിട അവശിഷ്​ടങ്ങൾക്കിടയിൽ കണ്ടെത്തി. സ്​ത്രീയെ കാണാനില്ലെന്ന് ബന്ധുക്കളിൽ നിന്ന്​​ വിവരം ലഭിച്ചതിനെ തുടർന്ന് നടത്തിയ തെരച്ചിലിനിടയിലാണ്​​​ തുർക്കിയയിലെ അന്തോക്യ നഗരത്തിൽ ഇവർ താമസിച്ചിരുന്ന കെട്ടിടത്തി​​െൻറ അവശിഷ്​ടങ്ങൾക്കിടയിൽ നിന്ന്​​ കണ്ടെത്തിയത്​.

കാണാതായ സ്​ത്രീയുടെ മരണം ​സ്ഥിരീകരിച്ചതായി തുർക്കിയയിലെ സൗദി എംബസി ഉദ്യോഗസ്​ഥൻ ഫഹദ് അൽഹഖ്​ബാനി അറിയിച്ചു. അടുത്ത ബന്ധുക്കൾ​ മൃതദേഹം തിരിച്ചറിഞ്ഞു​. ഉമ്മയെ കാണാതായ വിവരം ഇവരുടെ പെൺമക്കൾ എംബസിയുടെ ചുമതലയുള്ള മുഹമ്മദ് അൽഹർബിയെ അറിയിക്കുകയായിരുന്നു​.

തുർക്കിയ സർക്കാർ അനുവദിച്ച രക്ഷാസംഘമാണ് തെരച്ചിൽ നടത്തിയതെന്ന് എംബസി ഉദ്യോഗസ്​ഥൻ മുഹമ്മദ്​ അൽഹർബി പറഞ്ഞു. രണ്ട് ദിവസമായി തെരച്ചിൽ തുടരുകയായിരുന്നു. സംഭവമറിഞ്ഞ ഉട​നെ മൂന്ന് മക്കളും തുർക്കിയയിൽ എത്തിയിരുന്നു​. രണ്ട് പേർ സൈപ്രസിൽ നിന്നും മൂന്നാമത്തെ ആൾ സൗദി അറേബ്യയിൽ നിന്നുമാണ്​ എത്തിയത്​. സൗദി എംബസി അവരെ അദാനയിൽ വെച്ച്​ സ്വീകരിച്ചു.

മാതാവിനെ തിരിച്ചറിയാൻ അവരെ അന്തോക്യയിലെ അപകട സ്ഥലത്തേക്ക് കൊണ്ടുപോയി. മൂന്നുമണിക്കൂർ എടുത്ത ആ യാത്രക്കിടെ മൃതദേഹം കണ്ടെത്തിയതായി വിവരം ലഭിക്കുകയായിരുന്നു. കെട്ടിടം തകർന്നുവീണ സ്ഥലത്തായിരുന്നു മൃതദേഹം. മക്കൾ എത്തി മൃതദേഹം​ തിരിച്ചറിയുകയായിരുന്നെന്ന്​ മുഹമ്മദ്​ അൽഹർബി പറഞ്ഞു.

ഭൂകമ്പ ബാധിത പ്രദേശങ്ങളിൽനിന്ന് ഇതുവരെ സൗദി എംബസി പുരുഷന്മാരും സ്ത്രീകളുമായി 45 പൗരന്മാരെ ഒഴിപ്പിച്ചു​. ഇൗ പ്രദേശങ്ങളിലുള്ളവർ എത്രയും വേഗം എംബസിയുമായി ബന്ധപ്പെടാൻ ആവശ്യപ്പെട്ടിരുന്നു​.