കെട്ടിടത്തിന്‍റെ ടെറസിൽ ഉപേക്ഷിക്കപ്പെട്ട നിലയിൽ യു.പി സ്വദേശി; കെ.എം.സി.സി പ്രവർത്തകർ തുണയായി

റിയാദ്​: പ്രമേഹം മൂർഛിച്ച്​ കാലിലെ വ്രണം പഴുത്ത്​ ദുർഗന്ധം വമിക്കാൻ തുടങ്ങിയതോടെ ഒപ്പം താമസിക്കുന്നവർ മുറിക്ക്​ പുറത്താക്കിയ യു.പി. സ്വദേശിക്ക്​ മലയാളി സാമൂഹിക പ്രവർത്തകർ തുണയായി. റിയാദിൽ ജോലി ചെയ്​തിരുന്ന ഉത്തർ പ്രദേശ് മഹാരാജ്ഖണ്ഡ്​ സ്വദേശി ജാഹിർ അലി (59) ആണ്​ താമസ കെട്ടിടത്തി​െൻറ ടെറസിൽ കഴിഞ്ഞിരുന്നത്​.

കാലിലെ മുറിവ് പഴുത്ത് ദുർഗന്ധം വമിക്കുന്നതിനാൽ റൂമിലുള്ളവർ കെട്ടിടത്തി​െൻറ മുകളിലേക്ക്​ മാറ്റുകയായിരുന്നു. അവിടെ ഉപേക്ഷിക്കപ്പെട്ട നിലയിലാണ്​ സഹായിക്കാൻ ​ചെന്ന മലയാളി സാമൂഹിക പ്രവർത്തകൻ കണ്ടത്​. സന്ദർശക വിസയിൽ സൗദി കിഴക്കൻ പ്രവിശ്യയിലെ ജുബൈലിൽ എത്തിയ മകൻ പിതാവിനെ ത​െൻറ അടുത്ത്​ എത്തിക്കാൻ റിയാദിലുള്ള ടാക്​സി ഡ്രൈവർ സാദിഖ്​ വല്ലപ്പുഴയെ ഏൽപിക്കുകയായിരുന്നു. കൊണ്ടുപോകാൻ വേണ്ടി റിയാദിലെ താമസസ്ഥലത്ത്​ ചെന്നപ്പോഴാണ്​ ടെറസിൽ കഴിയുന്ന രോഗിയെ കണ്ടത്​.

ജാഹിർ അലിയുടെ ദയനീയാവസ്ഥ കണ്ട സാദിഖ്​ റിയാദ് കെ.എം.സി.സി സെൻട്രൽ കമ്മിറ്റി വെൽഫെയർ വിങ് ചെയർമാൻ സിദ്ദീഖ് തുവ്വൂരിനെ ബന്ധപ്പെട്ട്​ സഹായം തേടി. കൺവീനർ യൂസുഫി​െൻറ നേതൃത്വത്തിൽ ജുബൈലിൽ നിന്നെത്തിയ ജാഹിർ അലിയുടെ മകനും ചേർന്ന്​ അടിയന്തര ചികിത്സക്കായി റിയാദ്​ ശുമൈസിയിലെ ആ​ശുപത്രിയിൽ പ്രവേശിപ്പിച്ചു. കാലിൽ ശക്തമായ അണുബാധയുണ്ടെന്നും ഇത്​ ജീവന് അപകടമാണെന്നും പരിശോധിച്ച ഡോക്ടർ അറിയിച്ചു. തുടർന്ന്​ കുടുംബത്തി​െൻറ സമ്മതത്തോടെ കാൽ മുറിച്ചു. അപകടനില തരണം ചെയ്​തതിനെ തുടർന്ന്​ ആശുപത്രിയിൽ നിന്ന്​ ഡിസ്​ചാർജ്​ ചെയ്​ത്​ റൂമിൽ തിരിച്ചെത്തി. എന്നാൽ വീണ്ടും ആരോഗ്യനില വഷളായതിനെ തുടർന്ന്​ അമീർ മുഹമ്മദ് ആശുപത്രിയിൽ പ്രവേശിപ്പിച്ചു.

രണ്ടാഴ്ചത്തെ ചികിത്സക്ക് ശേഷം ഡിസ്ചാർജ് ചെയ്​ത ജാഹിർ അലിയെ നാട്ടിലെത്തിക്കാനുള്ള ശ്രമങ്ങളും കെ.എം.സി.സി പ്രവർത്തകർ നടത്തി. എയർപ്പോർട്ടിലെ എമിഗ്രേഷൻ കൗണ്ടറിൽ വിരലടയാളമുൾപ്പെടെ ചില സാങ്കേതിക പ്രശ്നമുണ്ടായതിനെ തുടർന്ന്​ ആദ്യ തവണ തിരിച്ചയച്ചു. തുടർന്ന്​ ഉദ്യോഗസ്ഥരുടെ സഹായത്താൽ പ്രശ്​നപരിഹാരമുണ്ടാക്കി വ്യാഴാഴ്​ച ലക്നോയിലേക്കുള്ള സ്പൈസ് ജെറ്റ്​ വിമാനത്തിൽ നാട്ടുകാരനായ ജാവേദി​െൻറ കൂടെ യാത്രയാക്കി. വെൽഫെയർ വിങ്ങ് മെഡിക്കൽ ടീം സുഫ്യാൻ ചൂരപ്പുലാൻ, ഹബീബ്, ഷബീർ, അബ്​ദുൽ സമദ്, ഇർഷാദ് തുവ്വൂർ, നേവൽ, ഇന്ത്യൻ എംബസി ഉദ്യോഗസ്ഥരായ ആഷിഖ്​, ഷറഫ് എന്നിവർ വിവിധ ഘട്ടങ്ങളിൽ സഹായത്തിനുണ്ടായിരുന്നു.

നിരവധി വർഷത്തെ സേവനാനന്തര ആനുകൂല്യമുൾപ്പെടെ വലിയൊരു തുക സ്പോൺസറിൽ നിന്ന് ജാഹിർ അലിക്ക്​ ലഭിക്കാനുണ്ട്. മതിയായ രേഖകളില്ലാത്തതിനാൽ യഥാസമയം ചികിത്സ തേടാനും കഴിഞ്ഞിരുന്നില്ല. ചികിത്സ നിഷേധിച്ചതും ശമ്പള കുടിശ്ശിക നൽകാത്തതും കാട്ടി മനുഷ്യാവകാശ കമീഷനിൽ പരാതിപ്പെടാൻ സഹായിക്കാമെന്ന് കെ.എം.സി.സി വളൻറിയർമാർ അറിയിച്ചെങ്കിലും കാലതാമസമെടുക്കുമെന്ന് പറഞ്ഞ് കുടുംബം അത് നിരസിക്കുകയായിരുന്നു.