തകർന്നുവീണ കാർ പാർക്കിങ്​​ ഏരിയയിൽ നിന്ന്​ സൗദി പൗരനെ രക്ഷിക്കുന്ന വിഡിയോ വൈറൽ

ദമ്മാം: ദിവസങ്ങൾക്ക്​ മുമ്പ്​ അൽഖോബാർ ദമ്മാം ഹൈവേയിലെ റാക്കയിൽ അൽസഈദ്​ ടവറി​െൻറ തകർന്നുവീണ പാർക്കിങ്​​ ഭാഗത്തിനടിയിൽ നിന്ന്​ സിവിൽ ഡിഫൻസ്​ വിഭാഗവും അഗ്​നിശമന സേനയും സംയുക്തമായി അതിസാഹസികമായി സൗദി പൗരനെ രക്ഷപ്പെടുത്തുന്ന ചിത്രങ്ങൾ സമൂഹ മാധ്യമങ്ങളിൽ വൈറലായി. ജീവിതത്തിനും മരണത്തിനുമിടിയിൽ അദ്ദേഹം ജീവിച്ചുതീർത്ത നിമിഷങ്ങളും അതിസങ്കീർണമായ രക്ഷാപ്രവർത്തനങ്ങളിലൂടെ അദ്ദേഹത്തെ രക്ഷപ്പെടുത്തുന്നതും കണ്ട്​ സോഷ്യൽ മീഡിയ ​ൈകയ്യടിക്കുകയാണ്​. പ്രാർഥനയും അഭിനന്ദനങ്ങളുമായി ലക്ഷക്കണക്കിന്​ ആളുകളാണ്​ ഇപ്പോൾ ഈ വിഡിയോ കണ്ടുകൊണ്ടിരിക്കുന്നത്​.

സൗദി പൗരനായ മിഷാരി വാഹനം പാർക്ക്​ ചെയ്​ത്​ പുറത്തേക്ക്​ ഇറങ്ങി നടക്കുന്നതിനിടയിലാണ്​ മുകൾ ഭാഗം ഇടിഞ്ഞുവീഴുന്നത്​. അദ്ദേഹം ഭാരമേറിയ ഇരുമ്പു ബീമുകൾക്കും കോൺക്രീറ്റുഭാഗങ്ങൾക്കും ഇടയിൽ കുടുങ്ങി​േപാവുകയായിരുന്നു. തനിക്കും സീലിങ്ങിനുമിടയിൽ കേവലം ഒരു സെൻറിമീറ്റർ മാത്രമേ വിടവുണ്ടായിരുന്ന​ുള്ളൂ എന്ന്​ മിഷാരി പറയുന്നു. തുടർന്ന്​ ഏറെ പ്രയാസപ്പെട്ട്​ കുഴി മാന്തി ശ്വാസം കഴിക്കാൻ പാകത്തിലാക്കുകയായിരുന്നത്രേ.

സിവിൽ ഡിഫൻസ്​ രക്ഷാപ്രവർത്തനങ്ങൾ ആരംഭിച്ച ഇടനേ തന്നെ ഇതിൽ ആളുകൾ കുടുങ്ങിക്കിടക്കുന്നുണ്ടെന്ന്​ മനസിലാക്കിയിരുന്നു. ദയവായി തന്നെ ഉപേക്ഷിക്കരുതേയെന്ന്​ മിഷാരി വിളിച്ചു പറയുന്നുണ്ടായിരുന്നു. എങ്കിൽ ശബ്​ദം പുറത്തേക്ക്​ വരാൻ പ്രയാസമായിരുന്നു. ഇത്തരത്തിൽ കുടുങ്ങിക്കിടന്ന നാല്​ പേരെയാണ്​ സിവിൽ ഡിഫൻസും അഗ്​നിശമന സേനയും ചേർന്ന്​ രക്ഷിച്ചത്​. പുറത്തുള്ള വാഹനങ്ങളും ഇരുമ്പ്​ ബീമുകളും കോൺക്രീറ്റും മാറ്റിയാലല്ലാതെ ഇവരെ രക്ഷിക്കുക സാധ്യമായിരുന്നില്ല. എന്നാൽ ഉദ്യോഗസ്ഥരുടെ സമർപ്പണവും കരുത്തും കഴിവും സമന്വയിച്ചപ്പോൾ അതിസാഹസികമായി അവർക്ക്​ മിഷാരിയെ രക്ഷപ്പെടുത്തി ജീവിതത്തിലേക്ക്​ തിരിച്ചെത്തിക്കാൻ സാധിച്ചു.

ഇത്​ മുഴുവൻ ഷൂട്ട്​ ചെയ്​ത്​ അൽയൗം അൽഅഖ്​ബരിയാ ചാനലിൽ പ്രദർശിപ്പിക്കുകയായിരുന്നു. ഉദ്യോഗസ്ഥരുടെ വീരകഥകൾ അറബ്​ ജനത ആവേശപൂർവമാണ്​ ഏറ്റെടുത്തത്​​. രണ്ട്​ ദിവസം നീണ്ട അക്ഷീണ യത്​നത്തിനൊടുവിലാണ്​ തകർന്നുവീണ കാർപാർക്കിനടിയിൽ നിന്ന്​ വാഹനങ്ങളും അവശിഷ്​ടങ്ങളും നീക്കം ചെയ്യാൻ സാധിച്ചത്​. അതുവരെ ഈ സ്ഥലങ്ങൾ സിവിൽ ഡിഫൻസി​േൻറയും പൊലീസി​േൻറയും സംരക്ഷണയിലായിരുന്നു. ഇത്ര വലിയ അപകടമായിട്ടും സമയം പാഴാക്കാ​തെ സ്ഥലത്ത്​ കുതിച്ചെത്തി രക്ഷാപ്രവർത്തനം നടത്തിയ ഉദ്യോഗസ്ഥരാണ്​ മരണത്തിലേക്ക്​ വിട്ടുകൊടുക്കാതെ ആളുകളെ സംരക്ഷിച്ചത്​. കിഴക്കൻ പ്രവിശ്യ മേയർ എൻജി. ഫഹദ് ബിൻ മുഹമ്മദ് സ്ഥലം സന്ദർശിച്ചു.