ആ​രോഗ്യ മുൻകരുതൽ ലംഘനം; സൗദിയിൽ സ്വകാര്യ സ്ഥാപനങ്ങൾക്ക്​ മുന്നറിയിപ്പ്​

ജിദ്ദ: രാജ്യത്ത്​ കോവിഡ്​ വ്യാപനം തടയാൻ നിശ്ചയിച്ച മുൻകരുതൽ നടപടികൾ ലംഘിക്കുന്ന സ്വകാര്യ സ്ഥാപനങ്ങൾക്ക്​ ആഭ്യന്തര മന്ത്രാലയത്തിന്‍റെ മുന്നറിയിപ്പ്​. ലംഘനങ്ങൾക്ക്​ 10,000 റിയാൽ മുതൽ ഒരു ലക്ഷം റിയാൽ വരെ പിഴ ചുമത്തും.

കുറ്റം ആവർത്തിച്ചാൽ പിഴ രണ്ടുലക്ഷം റിയാൽ വരെയാകും. സ്ഥാപന മാനേജ്​മെന്‍റിനും ലംഘനം നടത്തുന്നയാൾക്കും പിഴയുണ്ടാകുമെന്നും​ മന്ത്രാലയം ട്വീറ്റ്​ ചെയ്തു. കോവിഡ്​ വ്യാപനം വീണ്ടും ശക്തമാകുന്നതിനിടെയാണ്​ അധികൃതരുടെ ആവർത്തിച്ചുള്ള മുന്നറിയിപ്പ്​. രണ്ടക്ക സംഖ്യയിലേക്ക്​ ഏറ്റവും താഴ്​ന്ന രാജ്യത്തെ പ്രതിദിന കോവിഡ്​ കേസുകളുടെ എണ്ണം ഇപ്പോൾ ഏറ്റവും ഉയർന്നുനിൽക്കുകയാണ്​.

വെള്ളിയാഴ്ച മാത്രം 5628 പേർക്കാണ്​ പുതുതായി കോവിഡ്​ സ്ഥിരീകരിച്ചത്​. ചികിത്സയിലുള്ളവരുടെ എണ്ണം 37,223 ആയി ഉയർന്നു. ഈ സാഹചര്യത്തിലാണ്​ കോവിഡ്​ പ്രോട്ടോക്കോളുകൾ രാജ്യത്താകെ കർശനമാക്കുന്നത്​. ആരോഗ്യ മുൻകരുതൽ ലംഘനവും അതിനുള്ള പിഴശിക്ഷയും ഏതെല്ലാമെന്ന്​ ചുവടെ വിവരിക്കുന്നു.

നിയമലംഘനങ്ങൾ:

-സ്ഥാപനങ്ങളിലേക്ക് ആളുകളെ ക്ഷണിക്കുകയും ഒത്തുചേരലുകൾ നടത്തുകയും ചെയ്യൽ.

-രോഗബാധ സ്ഥിരീകരിച്ചവർക്ക്​ സ്ഥാപനങ്ങളിൽ പ്രവേശനം അനുവദിക്കൽ.

-അണുനാശിനികൾ ഒരുക്കാതിരിക്കൽ.

-സ്ഥാപനങ്ങൾക്കുള്ളിൽ അനുവദനീയമായ ആളുകളുടെ എണ്ണം പാലിക്കാതിരിക്കൽ.

-'തവക്കൽന' ആപ്പിലൂടെ ആരോഗ്യനില പരിശോധിക്കാതിരിക്കൽ.

-സ്ഥാപനങ്ങൾ ജീവനക്കാർക്ക് വേണ്ട ആ​രോഗ്യ പരിശോധന നടത്താതിരിക്കൽ.

-വാണിജ്യ കേന്ദ്രങ്ങളിലെ പ്രവേശന കവാടങ്ങളിൽ ജീവനക്കാരുടെയും ഉപഭോക്താക്കളുടെയും ശരീരോഷ്മാവ്​ പരിശോധിക്കാതിരിക്കൽ.

-ഓരോ ഉപയോഗത്തിന് ശേഷവും ട്രോളികളും ഷോപ്പിങ്​ ബാസ്​ക്കറ്റുകളും അണുമുക്തമാക്കാതിരിക്കൽ.

-വാക്സിനേഷൻ എടുക്കാത്തവർക്ക് പ്രവേശനം അനുവദിക്കൽ.

-മൂക്കും വായും മറക്കാതെ മാസ്ക് ധരിക്കുന്നവർക്ക്​ പ്രവേശനം നൽകൽ.

-റസ്റ്റാറന്‍റുകളിലെ കുട്ടികളുടെ കളിസ്ഥലങ്ങൾ അടയ്ക്കാതിരിക്കൽ.

-കെട്ടിടത്തിനുള്ളിലും പ്രതലങ്ങളും അണുമുക്തമാക്കാതിരിക്കൽ.

-നൂറിൽ കൂടുതൽ ആളുകളെ ഉൾക്കൊള്ളാൻ അനുവദിക്കുന്ന കടക​ൾക്കും മാളുകൾക്കും അതിനുള്ള പെർമിറ്റ് ഇല്ലാതിരിക്കൽ.

ലംഘനങ്ങൾക്കുള്ള പിഴകൾ:

-ഒന്ന്​ മുതൽ അഞ്ച്​ വരെ ജീവനക്കാരുള്ള ചെറുകിട സ്ഥാപനത്തിനും നിയമലംഘനം നടത്തിയയാൾക്കും പിഴ 10,000 റിയാൽ.

-ആറ്​ മുതൽ 49 വരെ ജീവനക്കാരുള്ള സ്ഥാപനത്തിനും ഉത്തരവാദിയായ വ്യക്തിക്കും പിഴ 20,000 റിയാൽ.

-50 മുതൽ 249 വരെ ജീവനക്കാരുള്ള സ്ഥാപനത്തിനും ഉത്തരവാദിയായ വ്യക്തിക്കും പിഴ 50,000 റിയാൽ.

-250 ജീവനക്കാരും അതിൽ കൂടുതലുമുള്ള വലിയ സ്ഥാപനത്തിനും ഉത്തരവാദികളായവർക്കും പിഴ ഒരു ലക്ഷം റിയാൽ.

-ലംഘനം ആവർത്തിച്ചാൽ പിഴ ഇരട്ടിയാകും. അത്​ രണ്ട്​ ലക്ഷം റിയാൽ വരെയാവാം. ആവശ്യമെങ്കിൽ സ്ഥാപനം ആറ്​ മാസം വരെ അടച്ചുപൂട്ടും.

റസ്റ്റാറന്‍റുകൾ, കഫേകൾ എന്നിവക്ക്​ അടച്ചുപൂട്ടൽ ശിക്ഷയുടെ കാലയളവിൽ ഇളവുണ്ട്​. ആദ്യ തവണ 24 മണിക്കൂറും രണ്ടാം തവണ 48 മണിക്കുറും മൂന്നാം തവണ ഒരാഴ്‌ചയും നാലാം തവണ രണ്ടാഴ്‌ചയും അഞ്ചാം തവണയോ അതിലധികമോ ഒരു മാസവുമാണ്​ അടച്ചുപൂട്ടുക.