സമാധാനത്തിനും ഗസ്സയിലെ ജനതയുടെ സംരക്ഷണത്തിനും ഞങ്ങൾ സൗദിക്കൊപ്പം നിൽക്കും -ആന്‍റണി ബ്ലിങ്കൻ

റിയാദ്​: ഗസ്സയിലെ ജനതയുടെ സംരക്ഷണത്തിനും മേഖലയിലെ സാമധാനത്തിനും ഞങ്ങൾ സൗദിക്കൊപ്പം നിൽക്കുമെന്ന്​ അമേരിക്കൻ സ്​റ്റേറ്റ്​ സെക്രട്ടറി ആൻറണി ബ്ലിങ്കൻ. ഹമാസ്-ഇസ്രായേൽ സംഘർഷം രൂക്ഷമായ സാഹചര്യത്തിൽ റിയാദിലെത്തിയ ബ്ലിങ്കൻ ശനിയാഴ്​ച സൗദി വിദേശകാര്യമന്ത്രി അമീർ ഫൈസൽ ബിൻ ഫർഹാനുമായി നടത്തിയ കൂടിക്കാഴ്​ചക്ക്​ ശേഷമാണ്​​ നിലപാട്​ വ്യക്തമാക്കിയത്​.

മേഖലയിൽ സമാധാനം കൊണ്ടു വരുന്നതിനും ഗസ്സയിലെ സാധാരണക്കാരുടെ സംരക്ഷണം ഉറപ്പാക്കുന്നതിനും ഉൾപ്പെടെ നിരവധി വിഷയങ്ങളിൽ ഞങ്ങൾ സൗദി അറേബ്യയുമായി ചേർന്ന് പ്രവർത്തിക്കുകയാണ്​. ഗസ്സയിൽ ‘സുരക്ഷിത മേഖലകൾ’ സ്ഥാപിക്കുന്നതിനുള്ള ശ്രമങ്ങളും അതുപോലെ ‘ഒരു മാനുഷിക ഇടനാഴി’ തുറക്കാനും അതുവഴി മാനുഷിക സഹായം ആവശ്യമുള്ള ആളുകളിലേക്ക് എത്തിക്കാനും ഞങ്ങൾ കൂട്ടായ ശ്രമം നടത്തുകയാണ്​. ഇസ്രായേലിലായാലും ഗസ്സയിലായാലും മറ്റെവിടെയായാലും സിവിലിയന്മാർ അനുഭവിക്കുന്ന ദുരിതങ്ങൾ കാണാൻ ഞങ്ങളാരും ആഗ്രഹിക്കുന്നില്ല. അവരെ സംരക്ഷിക്കാൻ ഞങ്ങൾ ഒരുമിച്ച് പ്രവർത്തിക്കുകയാണ്​ -ബ്ലിങ്കൻ കൂട്ടിച്ചേർത്തു.

എത്രയും വേഗം വെടിനിർത്തലുണ്ടാവണമെന്നാണ്​ ഞങ്ങൾ ആഗ്രഹിക്കുന്നതെന്നും അതിനായി ആഹ്വാനം ചെയ്യുകയും മാനുഷിക പ്രതിസന്ധിയെ അഭിസംബോധന ചെയ്യുകയുമാണെന്നും കൂടിക്കാഴ്​ചക്ക്​ ശേഷം അമീർ ഫൈസൽ ബിൻ ഫർഹാൻ വ്യക്തമാക്കി. ഇത് അസ്വസ്ഥജനകമായ ഒരു സാഹചര്യമാണ്. വളരെ വേദനാജനകമാണ്​. സംഘർഷത്തിന്‍റെ രൂക്ഷമായ ഫലം അനുഭവിക്കുന്നത്​ സാധാരണക്കാരാണ്. ഇരുവശത്തുമുള്ള സിവിലിയൻ ജനങ്ങളെ ഗുരുതരമായി ബാധിക്കുന്നു.

കൂടുതൽ സിവിലിയൻ കഷ്​ടപ്പാടുകൾ അവസാനിപ്പിക്കുന്നതിനാണ് ഇപ്പോൾ മുൻഗണന നൽകേണ്ടത്. മേഖലയിൽ വേഗത്തിൽ സമാധാനം തിരികെ കൊണ്ടുവരാനും അക്രമം അവസാനിപ്പിക്കാനും ഇനി ഇത്തരമൊരു സാഹചര്യം ഉണ്ടാവാതിരിക്കാനും സാധ്യമായ ഒരു വഴി കണ്ടെത്തേണ്ടതുണ്ടെന്നും സൗദി മന്ത്രി ഊന്നിപ്പറഞ്ഞു. ഇരുവശത്തുമുള്ള സാധാരണക്കാരായ ജനങ്ങളെയാണ്​ ബാധിക്കുന്നത്​. ഏത് സമയത്തും ഏത്​ കാരണത്താലും സിവിലിയന്മാരെ ലക്ഷ്യം വെക്കുന്നതിനെ നമ്മളെല്ലാവരും അപലപിക്കുന്നു എന്നത് പ്രധാനമാണ് -അമീർ ഫൈസൽ കൂട്ടിച്ചേർത്തു.

ഗസ്സയിലെ അക്രമം നിയന്ത്രിക്കാൻ സഹായം തേടാനും ഏറ്റവും പുതിയ സംഭവവികാസങ്ങൾ ചർച്ച ചെയ്യാനും നടത്തുന്ന അറബ്​, പശ്ചിമേഷ്യൻ പര്യടനത്തി​ന്‍റെ ഭാഗമായി ആൻറണി ബ്ലിങ്കൻ വെള്ളിയാഴ്​ച രാത്രിയിലാണ്​ സൗദിയിലെത്തിയത്​. സംഘർഷം പടരുന്നത് തടയാനും ബന്ദികളെ ഉടനടി സുരക്ഷിതമായി മോചിപ്പിക്കാനും സിവിലിയന്മാരുടെ സംരക്ഷണത്തിനുള്ള സംവിധാനങ്ങൾ സാധ്യമാക്കാനും സഹായിക്കുന്നതിനുള്ള ശ്രമങ്ങളിൽ പശ്ചിമേഷ്യയിലെയും അറബ്​ മേഖലയിലെയും സൗഹൃദരാജ്യങ്ങളുടെ പിന്തുണയും ഇടപെടലും തേടിയാണ്​ സെക്രട്ടറിയുടെ പര്യടനമെന്ന്​ സ്​റ്റേറ്റ് ഡിപ്പാർട്ട്‌മെൻറ്​ വക്താവ് മാറ്റ് മില്ലർ കഴിഞ്ഞ ദിവസം പ്രസ്താവനയിൽ വ്യക്തമാക്കിയിരുന്നു.

ജോർദാൻ രാജാവ്​ അബ്​ദുല്ല രണ്ടാമനും ഫലസ്​തീൻ പ്രസിഡൻറ്​ മഹ്​മൂദ്​ അബാസുമായും ആൻറണി ബ്ലിങ്കൺ വെള്ളിയാഴ്​ച കൂടിക്കാഴ്​ച നടത്തിയിരുന്നു. പിന്നീട്​ ഖത്തറിലെത്തി പ്രധാനമന്ത്രിയും വിദേശകാര്യ മന്ത്രിയുമായ മുഹമ്മദ്​ ബിൻ അബ്​ദുറഹ്​മാൻ അൽതാനിയുമായും ചർച്ച നടത്തിയ ശേഷമാണ്​ റിയാദിലെത്തിയത്​. ഫലസ്​തീൻ ഇസ്രായേൽ സംഘർഷം ആരംഭിച്ച്​ ഏഴാമത്തെ ദിവസമാണ്​ അമേരിക്കൻ സ്​റ്റേറ്റ്​ സെക്രട്ടറിയുടെ അറബ്​ പര്യാടനം. ഒരൊറ്റ ദിവസത്തിലാണ്​ നാല്​ രാജ്യങ്ങൾ സന്ദർശിച്ചത്​. ഞായറാഴ്​ച യു.എ.ഇയിലെത്തും.