ഹജ്ജ്: മികച്ച സൗകര്യങ്ങൾ ഏർപ്പെടുത്തിയതിന് സൗദിയെ​ പ്രശംസിച്ച്​ ലോകം

ജിദ്ദ: ഈ വർഷത്തെ ഹജ്ജ് നടത്തിപ്പ്​ വിജയകരമായി പൂർത്തിയാക്കിയതിൽ സൗദി അറേബ്യക്ക്​ പ്രശംസാ പ്രവാഹം. അന്താരാഷ്​ട്ര സംഘടനകളും പണ്ഡിത സഭകളും പ്രമുഖരും മന്ത്രിമാരും ഗവർണർമാരുമാണ്​​ തീർഥാടനകാലത്തിന്റെ വിജയകരമായ പരിസമാപ്തിയിൽ സൽമാൻ രാജാവിനെയും കിരീടകാവശി അമീർ മുഹമ്മദ് ബിൻ സൽമാനെയും പ്രശംസിച്ചത്​.

ലോകത്തി​ന്റെ വിവിധ ഭാഗങ്ങളിൽ നിന്നെത്തിയ തീർഥാടകർക്ക്​ മികച്ച സേവനങ്ങൾ നൽകി ഹജ്ജ്​ വിജയകരമാക്കിയ സൗദി ഭരണകൂടത്തെ ഒ.​ഐ.സി സെക്രട്ടറി ജനറൽ ഹുസൈൻ ഇബ്രാഹീം ത്വാഹ അനുമോദിച്ചു. ഇരുഹറമുകൾക്കും തീർഥാടകർക്കുമുള്ള സേവനങ്ങൾക്ക്​ സൽമാൻ രാജാവും കിരീടാവകാശിയും നൽകിവരുന്ന ശ്രദ്ധയും പ്രധാന്യവും അഭിനന്ദനാർഹമാണ്​. ഹജ്ജ്​ സീസണിൽ ആത്മാർഥതയോടെയും ഉദാര​തയോടെയും സൗദി അറേബ്യ നടത്തികൊണ്ടിരിക്കുന്ന സേവനങ്ങൾ അഭിമാനകരമാണെന്നും അ​ദ്ദേഹം പറഞ്ഞു.

ലോകത്തെ മുഴുവൻ ബാധിച്ച കോവിഡ്​ മഹാമാരിക്ക്​ ശേഷം തീർഥാടകരുടെ എണ്ണം 10 ലക്ഷമായി വർധിപ്പിക്കുകയും ഹജ്ജ്​ വിജയകരമാകുകയും ചെയ്​തതിൽ അഭിനന്ദനവുമായി അറബ്​ പാർലമെന്റ് സ്​പീക്കർ ആദിൽ അബ്​ദുറഹ്​മാനും രംഗത്തെത്തി. തീർഥാടകരെ സേവിക്കുന്നതിന്​ ആവശ്യമായ സുരക്ഷയും ആരോഗ്യ സംവിധാനങ്ങളും പ്രതിരോധ, മുൻകരുതൽ നടപടികളും സുരക്ഷാ മാർഗങ്ങളും ഒരുക്കുന്നതിൽ സൗദി ഭരണകൂടം നടത്തിയ മഹത്തായ ശ്രമങ്ങൾ ഏറെ വിലമതിക്കുന്നതാണെന്നും അദ്ദേഹം കൂട്ടിച്ചേർത്തു.

മുസ്‍ലിം വേൾഡ് ലീഗും സൗദി അറേബ്യയെ അഭിനന്ദിച്ചു. കോവിഡ്​ അപകടസാധ്യതകളും അതി​ന്റെ പ്രത്യാഘാതങ്ങളും നേരിട്ട് തീർഥാടകരുടെ ആരോഗ്യം സംരക്ഷിച്ചതിനെ ലീഗ്​ പ്രശംസിച്ചു. മഹത്തായ വിജയമാണിതെന്ന് മുസ്​ലിം വേൾഡ്​ ലീഗ്​ സെക്രട്ടറി ജനറൽ ഡോ. മുഹമ്മദ് ബിൻ അബ്​ദുൽ കരീം അൽഇസ്സ പ്രസ്താവനയിൽ പറഞ്ഞു. സൽമാൻ രാജാവി​ന്റെ ഭരണകൂടം തീർഥാടകർക്ക്​ നൽകിവരുന്ന സേവനങ്ങൾ ലോകത്തെ മുഫ്​തിമാരുടെയും പണ്ഡിതന്മാരുടെയും ശ്രദ്ധപിടിച്ചുപറ്റിയതായും അദ്ദേഹം വ്യക്തമാക്കി.

സൗദി പണ്ഡിത സഭ, ഈജിപ്​തിലെ ശൈഖുൽ അസ്​ഹർ ​ഡോ. അഹ്​മദ്​ അൽത്വയിബ്​, സൗദി അറ്റോർണി ജനറലും പണ്ഡിതസഭാംഗവുമായ ശൈഖ്​ സഊദ് ബിൻ അബ്​ദുല്ല അൽമുഅ്​ജബ്​, വിവിധ മന്ത്രിമാർ തുടങ്ങിയവരും സൽമാൻ രാജാവിനെയും കിരീടാവകാശിയേയും അഭിനന്ദിച്ചു.