മൂന്ന് ആഗോള നേട്ടങ്ങളുമായി യാംബു പുഷ്പമേള

യാംബു: നാലുവർഷത്തെ ഇടവേളക്ക് ശേഷം വീണ്ടുമെത്തിയ യാംബു പുഷ്പമേള വീണ്ടും ആഗോള ശ്രദ്ധനേടുന്നു. ലോകത്തെ ഏറ്റവും വലിയ പൂ പരവതാനി ഒരുക്കി നേരത്തെ രണ്ടു തവണ ഗിന്നസ് വേൾഡ് റെക്കോർഡ് നേടിയ പുഷ്പമേള ഇത്തവണ മൂന്ന് ആഗോള നേട്ടങ്ങളാണ് സ്വന്തമാക്കുന്നത്​. പൂക്കൾ കൊണ്ട് എഴുതിയ ‘സൽമാൻ’ എന്ന ഏറ്റവും വലിയ വാക്കാണ് അതിലൊന്ന്​. സൗദി ഭരണാധികാരിയുടെ പേരിനെ സൂചിപ്പിക്കുന്ന, പൂക്കളാൽ കോർത്തിണക്കിയ ‘സൽമാൻ’ എന്ന വാക്ക് ലോകത്ത് പൂക്കൾ കൊണ്ട് എഴുതിയ ഏറ്റവും വലിയ വാക്കെന്ന റെക്കോർഡ്​ സ്വന്തമാക്കി. 19,474 ചുവന്ന റോസാപ്പൂക്കളാണ് ഇതിന്​ ഉപയോഗിച്ചത്​.

ലോകത്തിലെ ഏറ്റവും വലിയ പൂക്കൊട്ടയെന്നതാണ്​ രണ്ടാമത്തെ നേട്ടം. വെള്ളയും ചുവപ്പും നിറങ്ങളിലെ 1,27,224 പെറ്റൂണിയ പൂക്കളാണ് ഇതിന് ഉപയോഗിച്ചത്.

നേട്ടങ്ങളുടെ കൂട്ടത്തിൽ മൂന്നാമത്തേത് പുനരുപയോഗക്ഷമമായ വസ്തുക്കളാൽ നിർമിച്ച ഏറ്റവും വലിയ റോക്കറ്റിന്റെ മാതൃകയാണ്. റീസൈക്കിൾ ചെയ്ത വസ്തുക്കൾ മാത്രം ഉപയോഗിച്ചാണ് ഈ കൂറ്റൻ റോക്കറ്റിന്റെ നിർമിതി. സുസ്ഥിരതക്കും പരിസ്ഥിതി സംരക്ഷണത്തിനുമുള്ള പുഷ്പമേളയുടെ പ്രതിബദ്ധത പ്രതിഫലിപ്പിക്കുന്ന ഈ അതുല്യ ശിൽപം മരം, പ്ലാസ്​റ്റിക്, അലുമിനിയം, ഇരുമ്പ് തുടങ്ങിയ വസ്തുക്കൾ ഉപയോഗിച്ച് പരിസ്ഥിതി വകുപ്പാണ് നിർമിച്ചത്. ലോകത്തിലെ ഏറ്റവും വലിയ തിളങ്ങുന്ന പൂന്തോട്ടവുമായി മറ്റൊരു സവിശേഷതയും ഇത്തവണത്തെ മേളക്കുണ്ട്​. രണ്ടര ലക്ഷം പൂക്കൾകൊണ്ട്​ ഒരുക്കിയതാണ്​ ഇത്​.

നൂതന ആശയങ്ങളും അതിശയകരമായ തയ്യാറെടുപ്പുകളും കൊണ്ട് ഓരോ വർഷവും യാംബു പുഷ്പമേള വേറിട്ട് നിൽക്കുന്നു. ‘വിഷൻ 2030’ ലക്ഷ്യങ്ങളുടെ ഭാഗമായ യുവതിയുവാക്കളുടെ കഴിവുകൾ വികസിപ്പിക്കുന്നതിനുള്ള പദ്ധതികളും മേളക്ക്​ പിന്നിലുണ്ട്​. യാംബു റോയൽ കമീഷ​െൻറ മേൽനോട്ടത്തിൽ വിവിധ സർക്കാർ വകുപ്പുകൾ ചേർന്നാണ്​ മേളയുടെ സംഘടിപ്പിക്കുന്നത്​. വ്യാഴാഴ്ച ആരംഭിച്ച മേള മാർച്ച്​ ഒമ്പത്​ വരെ 24 ദിവസമാണ്​. മേള നഗരിയിലേക്ക്​ പതിനായിരങ്ങളാണ് ഒഴുകിയെത്തുന്നത്. സൗദിയിലെ വിവിധ ഭാഗങ്ങളിൽ നിന്ന് കഴിഞ്ഞ ദിവസം പ്രവാസികളും വിവിധ കൂട്ടായ്‌മകളുടെയും പ്രവാസി സംഘടനകളുടെയും കീഴിൽ പ്രത്യേകം വാഹനങ്ങളിൽ മേള സന്ദർശിക്കാൻ എത്തിയിരുന്നു. 11.50 റിയാലാണ് പ്രവേശന ടിക്കറ്റ് ചാർജ്. https://yanbuflowerfestival.com.sa/en എന്ന സൈറ്റിൽ നിന്ന്​ ടിക്കറ്റ്​ എടുക്കാം. എല്ലാ ദിവസങ്ങളിലും മേള സന്ദർശിക്കാൻ ഒറ്റ തവണയെടുക്കുന്ന ടിക്കറ്റ്​ മതിയാകും. രണ്ടു വയസിന് താഴെയുള്ള കുട്ടികൾക്ക് പ്രവേശനം സൗജന്യമാണ്.