അടിയന്തര സഹായവുമായി 12 ട്രക്കുകൾ ഗസ്സയിലെത്തി

ദുബൈ: ഇസ്രായേൽ അധിനിവേശത്തിൽ ദുരിതത്തിലായ ഗസ്സയിലെ ഫലസ്തീൻ ജനതയെ ചേർത്തുപിടിച്ച്​ വീണ്ടും യു.എ.ഇ. അടിയന്തര സഹായവുമായി 12 ട്രക്കുകൾ യു.എ.ഇയിൽ നിന്ന്​ ഗസ്സ മുനമ്പിലെത്തി. ഒക്​ടോബറിന്​ ശേഷം യു.എ.ഇയിൽ നിന്ന്​ ഗസ്സ മുനമ്പിലേക്ക്​ പ്രവേശിക്കുന്ന ആദ്യ സഹായമാണിതെന്ന്​ അധികൃതർ അറിയിച്ചു. 150 ടൺ മാനുഷിക സഹായ വസ്തുക്കളാണ്​ 12 ട്രക്കുകളിലായുള്ളത്​. 30,000 പേരുടെ ആവശ്യങ്ങൾ നിറവേറ്റാൻ ഇത്​ സഹായകമാവും. വടക്കൻ ഗസ്സയിലെ ഇറസ്​ ക്രോസിങ്​, തെക്കൻ ഗസ്സയിലെ കറം അബു സലിം ക്രോസിങ്​ എന്നിവയിലൂടെയാണ്​ ട്രക്കുകൾ ഗസ്സ മുനമ്പിലേക്ക്​ പ്രവേശിച്ചത്​.

അമേരിക്കൻ നിയർ ഈസ്റ്റ റഫ്യൂജീ എയ്​ഡി (അനിറ)ന്‍റെ സഹകരണത്തോടെയാണ്​ സഹായങ്ങൾ എത്തിക്കുന്നത്​. ഗസ്സയി​ലെ വിനാശകരവും അനുദിനം മോശമാകുന്നതുമായ മാനുഷിക സാഹചര്യം നേരിടുന്നതിനായി യു.എ.ഇ വിപുലമായ പദ്ധതികൾ നടപ്പിലാക്കിവരുന്നുണ്ട്​. ഇതിന്‍റെ തുടർച്ചയായാണ്​ കഴിഞ്ഞ ദിവസം അടിയന്തര സഹായങ്ങൾ എത്തിച്ചത്​. വിവിധ പദ്ധതികളിലായി ഇതു വരെ 40,000 ടൺ അവശ്യ വസ്തുക്കൾ യു.എ.ഇ വിതരണം ചെയ്തു കഴിഞ്ഞു.

സാധ്യമായ എല്ലാ വഴികളിലൂടെയും സുസ്ഥിരമായ സഹായ വിതരണം തുടരുമെന്നും വിദേശകാര്യ സഹ മന്ത്രി സുൽത്തൻ മുഹമ്മദ്​ അൽ ശംസി പറഞ്ഞു. ഫലസ്തീനികൾക്കായി സഹായഹസ്തം നീട്ടുന്നതിനും കര, കടൽ അല്ലെങ്കിൽ വ്യോമമാർഗ്ഗം വഴി മാനുഷിക ദുരിതാശ്വാസ സംരംഭങ്ങൾ നടപ്പിലാക്കുന്നതിനും യു.എ.ഇ പ്രതിജ്ഞാബദ്ധമാണെന്നും അൽ ഷംസി പറഞ്ഞു.