കോഴിക്കോട്​ സ്വദേശി ദുബൈയിൽ മരിച്ച നിലയിൽ

ദുബൈ: കോഴിക്കോട്​ സ്വദേശിയായ 20കാരനെ ദുബൈയിൽ മരിച്ച നിലയിൽ കണ്ടെത്തി. ബാലുശേരി വ​ട്ടോളി ബസാർ കുളത്തി​െൻറമീത്തൽ നാസറി​െൻറ മകൻ മുഹമ്മദ്​ യാസീനാണ്​ മരിച്ചത്​. അതേസമയം, സംഭവത്തിൽ ദുരൂഹതയുണ്ടെന്നാരോപിച്ച്​ പിതൃ സഹോദരൻ ഇഖ്​ബാൽ പൊലീസിനെ സമീപിച്ചു.

വിസിറ്റിങ്​ വിസയിൽ മാർച്ചിൽ ദുബൈയിലെത്തിയ യാസീൻ, ഇഖ്​ബാലിനൊപ്പമായിരുന്നു താമസം. വ്യാഴാഴ്​ച വൈകുന്നേരം ഉല്ലാസനൗകയിൽ യാത്രക്ക്​ പോകുന്ന കാര്യം ഇഖ്​ബാലിനോട്​ പറഞ്ഞിരുന്നു. എന്നാൽ, ദേരയിലേക്ക്​ പോകേണ്ട യാസീൻ വർഖയിലേക്കാണ്​ പോയത്​. സുഹൃത്തുക്കൾക്കൊപ്പം പാർട്ടിയിൽ പ​ങ്കെടുക്കുകയും ഉല്ലാസനൗകയിൽ യാത്ര ചെയ്യുകയും ചെയ്​തു. എന്നാൽ, യാസീന്​ സുഖമില്ലെന്ന്​ പറഞ്ഞ്​ വെള്ളിയാഴ്​ച പുലർച്ചെ നാലിന്​ സുഹൃത്തുക്കൾ ഇഖ്​ബാലിനെ വിളിച്ചുവരുത്തുകയായിരുന്നു.

നായിഫിലുള്ള കൂട്ടുകാരുടെ താമസ സ്​ഥലത്തെത്തിയ ഇഖ്​ബാൽ കണ്ടത്​ മരിച്ചുകിടക്കുന്ന യാസീനെയാണ്​. ബോട്ടിൽ പാട്ടുപാടി നൃത്തം ചെയ്യുന്നതിനിടെ തളർന്നീവീണെന്നാണ്​ സുഹൃത്തുക്കൾ പറഞ്ഞത്​. പ്ലസ്​ ടു കഴിഞ്ഞ്​ ജോലിയില്ലാതെ നടന്ന യാസീനെ ഇഖ്​ബാലാണ്​ ദുബൈയിലേക്ക്​ കൂട്ടിക്കൊണ്ടു വന്നത്​. കുറച്ച്​ ദിവസം കഴിഞ്ഞ്​ തിരിച്ചുപോകാനാണ്​ വന്നതെങ്കിലും ലോക്​ഡൗൺ മൂലം യാത്ര വൈകി. ഇതോടെ ഇവിടെ തന്നെ ജോലി അന്വേഷിക്കുകയും ഇഖ്​ബാൽ ജോലി ചെയ്യുന്ന സ്​ഥാപനത്തിൽ ജോലി ഉറപ്പിക്കുകയും ചെയ്​തു.

നാല്​ ദിവസം കഴിഞ്ഞാൽ പുതിയ വിസ അടിക്കുമെന്ന പ്രതീക്ഷയിൽ നിൽക്കു​േമ്പാഴാണ്​ മരണം. മൃതദേഹം ദുബൈ പൊലീസ്​ മോർച്ചറിയിലാണുള്ളത്​. നാട്ടിലേക്ക്​ കൊണ്ടുപോകാൻ ശ്രമിക്കുന്നതായി ഇഖ്​ബാൽ പറഞ്ഞു. മാതാവ്​: സാദിഖ. സഹോദരങ്ങൾ: അഹ്​സാൻ, റസാൻ.