25 വർഷത്തെ പ്രവാസം: അഷ്‌റഫ് അമ്പലത്ത് മടങ്ങുന്നു

ദുബൈ: 25 വർഷത്തെ പ്രവാസജീവിതം അവസാനിപ്പിച്ച്​ തൃശൂർ ജില്ലയിലെ തൊയക്കാവ്‌ സ്വദേശി അഷ്‌റഫ് അമ്പലത്ത് ബുധനാഴ്​ച നാട്ടിലേക്ക്​ മടങ്ങുകയാണ്.

1996 ആഗസ്​റ്റ്​​ 30ന് ഒമാനിലെ മസ്​കത്തിൽ വിമാനമിറങ്ങിയത്​ മുതലാണ് പ്രവാസം ആരംഭിക്കുന്നത്​. പ്രവാസഭൂമിയിൽ ആദ്യം ചെയ്​തത് പെട്രോൾ പമ്പിൽ ഫില്ലിങ്​ ജോലിയായിരുന്നു. വൈകാതെ ഡ്രൈവിങ്​ ലൈസൻസ് കരസ്ഥമാക്കി. ആദ്യം സലാലയിൽ ഫുഡ്​സ്​​റ്റഫ് കമ്പനിയിൽ സെയിൽസ് മാനായി. 2006ലാണ്​ ദുബൈയിൽ എത്തിയത്​. െഡയറി പ്രോഡക്ട്​ കമ്പനിയിൽ സെയിൽസ്​ മാനായി ജോലിയിൽ പ്രവേശിക്കുകയും രണ്ട് വർഷത്തിന് ശേഷം ദുബൈയിൽ സ്വന്തമായി ബിസിനസ് തുടങ്ങുകയും ചെയ്​തു. അഞ്ച് വർഷത്തിന് ശേഷം ബിസിനസ്​ ഒഴിവാക്കി സ്വകാര്യ കമ്പനിയിൽ പി.ആർ.ഒ ആയി.

ആ ജോലിയിൽ എട്ട് വർഷം പൂർത്തിയാക്കിയതിന് ശേഷമാണ് ഇപ്പോൾ നാട്ടിലേക്ക് മടങ്ങുന്നത്. ജീവിതയാഥാർഥ്യങ്ങളോട് പടപൊരുതുന്ന പച്ചയായ കുറേ മനുഷ്യരുമായി ബന്ധപ്പെടാൻ കഴിഞ്ഞതാണ്​ പ്രവാസത്തിലെ മുതൽക്കൂട്ടെന്ന്​ അഷ്‌റഫ് പറയുന്നു. ബ്ലോഗറും ആനുകാലിക വിഷയങ്ങളെ കുറിച്ചുള്ള സമൂഹമാധ്യമങ്ങളിലെ സ്ഥിരം എഴുത്തുകാരനുമായ അദ്ദേഹം 25 വർഷത്തെ പ്രവാസ ജീവിതവഴിയിലെ അനുഭവങ്ങൾ​ ചേർത്ത്​ പുസ്​തകം രചിക്കാനുള്ള തയാറെടുപ്പിലാണ്.

കഴിഞ്ഞ 10 വർഷമായി യു.എ.ഇയിലെ കോടമുക്ക് മഹല്ല് കമ്മിറ്റിയുടെ ജനറൽ സെക്രട്ടറിയും കോടമുക്ക് തൽവാർ ക്ലബി​െൻറ യു.എ.ഇ രക്ഷാധികാരിയുമാണ്. ഉമ്മയും ഭാര്യയും മൂന്ന്​ മക്കളുമടങ്ങുന്നതാണ്​ കുടുംബം. മൂന്നു സഹോദരങ്ങളുമുണ്ട്​.