ദുബൈയിൽ 762 ബസ് കാത്തിരിപ്പുകേന്ദ്രം കൂടി നിർമിക്കും

ദുബൈ: എമിറേറ്റിലെ പ്രധാന ഇടങ്ങളിലായി 762 ബസ്​ കാത്തിരിപ്പുകേന്ദ്രങ്ങൾകൂടി നിർമിക്കുമെന്ന്​ പ്രഖ്യാപിച്ച്​ ദുബൈ റോഡ്​സ്​ ആൻഡ്​ ട്രാൻസ്​പോർട്ട്​ അതോറിറ്റി (ആർ.ടി.എ). 2025ൽ മുഴുവൻ ബസ്​ കാത്തിരിപ്പുകേന്ദ്രങ്ങളുടെയും നിർമാണം പൂർത്തീകരിക്കും​. ആകർഷകമായ ഡിസൈനോടുകൂടിയായിരിക്കും നിർമാണം. വാസ്തുവിദ്യ രൂപകൽപനയെ മികവുറ്റതാക്കുന്ന ഘടകങ്ങൾ ഉൾപ്പെടുത്തിയായിരിക്കും കാത്തിരിപ്പുകേന്ദ്രങ്ങളുടെ നിർമാണം.

ഇത്​ ദുബൈയുടെ പരിഷ്കൃത സ്വഭാവം വിളിച്ചോതുന്നവയായിരിക്കും. കൂടാതെ, സുരക്ഷിതവും സുസ്ഥിരവുമായ നഗരജീവിതത്തിന്‍റെ ഒരു പ്രതിരൂപമായും ഇതിനെ അവതരിപ്പിക്കാനാണ്​ ആർ.ടി.എ തീരുമാനം. ചില കമ്പനികളുമായി ചേർന്ന്​ ​ പരീക്ഷണാടിസ്ഥാനത്തിൽ ​ത്രീഡി പ്രിന്‍റിങ്​ സാ​ങ്കേതികവിദ്യകളും നിർമാണത്തിന്​ ആർ.ടി.എ തേടുന്നുണ്ട്​​. ദുബൈയിലെ പൊതുഗതാഗത സേവനങ്ങൾ മെച്ചപ്പെടുത്തുന്നതിനായി ആർ.ടി.എ തുടർന്നുവരുന്ന പ്രവൃത്തികളുടെ ഭാഗമായാണ്​ പുതിയ ​ബസ്​ കാത്തിരിപ്പുകേന്ദ്രങ്ങൾ എന്ന്​ ചെയർമാനും ഡയറക്ടർ ജനറലുമായ മതാർ അൽ തായർ പറഞ്ഞു. വീൽചെയറുകളിലുള്ളവർ ഉൾപ്പെടെ നിശ്ചയദാർഢ്യ വിഭാഗങ്ങൾക്ക്​ എത്തിപ്പെടാനും ഉപയോഗിക്കാനും കഴിയുന്ന​ രീതിയിലുള്ള രൂപകൽപനയായിരിക്കും നിർമാണത്തിൽ ഉപയോഗിക്കുക. ദുബൈ നഗരത്തെ ഭിന്നശേഷിസൗഹൃദമാക്കാൻ ലക്ഷ്യമിട്ട്​ യു.എ.ഇ എക്സിക്യൂട്ടിവ്​ കൗൺസിൽ ചെയർമാനും ദുബൈ കിരീടാവകാശിയുമായ ശൈഖ്​ ഹംദാൻ ബിൻ റാശിദ്​ ആൽ മക്​തൂം പ്രഖ്യാപിച്ച ‘എന്‍റെ സമുദായം.. എല്ലായിടവും എല്ലാവർക്കും’ എന്ന സംരംഭത്തെ പിന്തുണക്കുന്നതാണ്​ ഈ തീരുമാനമെന്നും മതാർ അൽ തായർ കൂട്ടിച്ചേർത്തു.

ജനസാന്ദ്രതയുള്ള പ്രദേശങ്ങൾ, നിലവിൽ പൊതു ബസ്​ സർവിസുകൾ തുടരുന്നതും ഭാവിയിൽ കൂടുതൽ ആവശ്യമുള്ളതുമായ സ്ഥലങ്ങൾ, ശരിയായ അടിസ്ഥാന സൗകര്യങ്ങൾ ആവശ്യമായ സ്ഥലങ്ങൾ തുടങ്ങി നിരവധി ഘടകങ്ങൾ വിലയിരുത്തിയായിരിക്കും പുതിയ ബസ്​ കാത്തിരിപ്പുകേന്ദ്രങ്ങൾ നിർമിക്കുക. ഇതിനായി ബസ്​ സ്​റ്റോപ്​ ഉപയോഗിക്കുന്നവരുടെ എണ്ണം അടിസ്ഥാനമാക്കി നാലു വിഭാഗങ്ങളായി മേഖലകളെ തരംതിരിച്ചിട്ടുണ്ട്​. പ്രതിദിനം 750 പേർ ഉപയോഗിക്കുന്ന ബസ് സ്​റ്റോപ്പുകളെ​ മെയിൻ സ്​റ്റോപ്പുകളായി പരിഗണിക്കും. 250 മുതൽ 750 വരെ യാത്രക്കാരാണെങ്കിൽ സെക്കൻഡറി സ്​റ്റോപ്പായും 100 മുതൽ 250 വരെ യാത്രക്കാരുണ്ടെങ്കിൽ പ്രൈമറി സ്​റ്റോപ്പായും 100 യാത്രക്കാർ ദിവസവും ഉപയോഗിക്കു​ന്നുണ്ടെങ്കിൽ പിക് അപ്​/ഡ്രോപ്​ സ്​റ്റേഷനുകളായും പരിഗണിക്കും.

മെയിൻ സ്​റ്റോപ്പിൽ നിർമിക്കുന്ന കാത്തിരിപ്പുകേന്ദ്രങ്ങളുടെ ഒരു ഭാഗം ശീതീകരിച്ചവയായിരിക്കും. എല്ലാ കേന്ദ്രങ്ങളിലും ഒരു ഔട്ട്​ഡോർ ഏരിയയും പരസ്യങ്ങൾക്കായുള്ള ഇടങ്ങളും ഉണ്ടായിരിക്കും. ബസ്​ റൂട്ടുകൾ, ഷെഡ്യൂളുകൾ, ബസ്​ എത്തുന്ന സമയം, യാത്രക്കാരുമായി ബന്ധപ്പെട്ട മറ്റു​ പ്രധാന സേവനവിവരങ്ങൾ എന്നിവയും കേന്ദ്രങ്ങളിൽ സജ്ജീകരിക്കും.