യു.എ.ഇ എംബസിയുടെ പേരിലെ വ്യാജ വെബ്​സൈറ്റ്​ ബ്ലോക്ക്​ ചെയ്​തു​

ദുബൈ: യാത്രവിലക്ക്​ മൂലം നാട്ടിൽ കുടുങ്ങിയ പ്രവാസികളിൽനിന്ന്​ പണം തട്ടാൻ ശ്രമിച്ച സംഭവത്തിൽ ഇന്ത്യയിലെ യു.എ.ഇ എംബസിയുടെ പേരിലെ വ്യാജ വെബ്​സൈറ്റ്​ ബ്ലോക്ക്​ ചെയ്​തു​.

യു.എ.ഇ എംബസിയുടെ വെബ്​സൈറ്റ്​ എന്ന്​ തോന്നിക്കുന്ന uaeembassy.in എന്ന സൈറ്റാണ്​ ബ്ലോക്ക്​ ചെയ്​തത്​. തട്ടിപ്പ്​ ശ്രദ്ധയിൽപെട്ടതിനെത്തുടർന്ന്​ യു.എ.ഇയിൽ പ്രവാസിയായ മുൻ മന്ത്രി എ.കെ. ബാല​െൻറ മരുമകൾ നമിത പരാതി നൽകിയിരുന്നു. ഇതോടെയാണ്​ വെബ്​സൈറ്റ്​ ബ്ലോക്ക്​​ ചെയ്യാൻ​ നടപടി സ്വീകരിച്ചത്​.

നമിതയുടെ വിസ അവസാനിക്കാറായ സാഹചര്യത്തിൽ യാത്രാനുമതി ലഭിക്കുമോ എന്നതുൾപ്പെടെയുള്ള കാര്യങ്ങൾ അറിയാനാണ്​ വെബ്​സൈറ്റ്​ പരിശോധിച്ചത്​. uaeembassy.in എന്ന വ്യാജ വെബ്​സൈറ്റിലെ മെയിൽ വഴിയാണ്​ വിശദാംശങ്ങൾ ​തേടിയത്​. തുടർന്ന്​ ഫോൺവഴി ബന്ധപ്പെട്ടയാൾ ഡൽഹിയിലുള്ള ഒരാളുടെ നമ്പർ നൽകി. ഇൗ നമ്പറിൽ നിന്ന്​ വാട്​സ്​ആപ്​​ വഴിയാണ്​ നമിതയെ ബന്ധപ്പെട്ട്​ യാത്രാനുമതിക്ക്​ രേഖകളും പണവും ചോദിച്ചത്​. ഇതോടെ തട്ടിപ്പാണെന്ന്​ ബോധ്യപ്പെട്ടതോടെ നാട്ടിൽ പരാതി നൽകി. തുടർന്ന്​ പാലക്കാട്​ സൈബർ സെൽ അന്വേഷണം ആരംഭിച്ചു. ഈ സാഹചര്യത്തിലാണ്​ വെബ്​സൈറ്റ്​ ബ്ലോക്ക്​ ചെയ്​തിരിക്കുന്നത്​.

യു.എ.ഇ എംബസിയുടെ സൈറ്റ്​ സെർച്​ ചെയ്യുന്നവർക്ക്​ ഗൂഗ്​ളിൽ ആദ്യം ഒാപ്​ഷനായി വന്നിരുന്നത്​ വ്യാജ സൈറ്റ്​ അഡ്രസായിരുന്നു. https://www.mofaic.gov.ae/en/missions/new-delhi എന്നതാണ്​ യഥാർഥ എംബസി വെബ്​സൈറ്റ്​ അഡ്രസ്​.